Адыгеим и ЛIышъхьэу КъумпIыл Мурат Мыекъопэ районымкIэ къушъхьэлъэ чIыпIэхэм адэжь псыугъоипIэ зэрэщашIы­рэр, районым хэхьэрэ псэупIэхэмрэ Мыекъуапэрэ къякIолIэщт псырыкIуапIэм изы Iахь зэрагъэпсырэр ыуплъэкIугъ.

«Стратегическэ мэхьанэ зиIэ мы псэуалъэр загъэпсыкIэ, псырыкIуапIэр жъы зэрэхъугъэм къыхэкIэу цIыфхэм икъоу псыр зэраIэкIэмыхьэщтыгъэм епхыгъэ Iофыгъор зэшIохыгъэ хъущт. Ащ ишIуагъэкIэ Мыекъуапэрэ Мые­къопэ районымрэ ащы­псэу­хэрэм къушъхьэпс дэгъур аIэ­кIэ­хьащт», — хигъэунэфыкIыгъ КъумпIыл Мурат.

Шъугу къэдгъэкIыжьын псырыкIопIэ зэхэтыр 1982-рэ илъэ­сым зэрагъэпсыгъэр ыкIи жъы хъугъэ трубэхэр бэшIагъэу зэ­блахъун зэрэфэягъэр. Федеральнэ программэу «2008 — 2013-рэ илъэсхэм Урысыем и Къыблэ хэхъоныгъэ егъэшIыгъэныр» зы­фиIорэм диштэу республикэм сомэ миллиард 1,2-у къыIукIагъэмкIэ псырыкIопIэ километрэ 57,6-рэ агъэпсын алъэкIыгъ.

Мэхьанэшхо зиIэ пшъэрылъым изэшIохынкIэ федеральнэ гупчэр IэпыIэгъу къафэхъугъ. Адыгеим ыцIэкIэ Урысые Федерацием и Къэралыгъо Думэ щыIэ депута­тэу Владислав Резник ащкIэ Iофышхо зэшIуихыгъ. Мы проек­тым игъэцэкIэн пае 2018-рэ илъэ­сым Адыгеим сомэ миллиарди 3,5-м ехъу къыфыхагъэкIыгъагъ.

Псэуалъэм ишIын зыфежьагъэ­хэр 2018-рэ илъэсым имэлылъфэгъу ары. Джырэ уахътэм ди­штэрэ технологиехэр къызфагъэ­федэхэзэ, инженер псэолъэшхор зыгъэпсыхэрэр ООО-у «Монтаж» зыфиIорэм хэтхэр ары. IофшIэн­хэм азыныкъо нахьыбэр зэкIолIэгъуаеу щыт къушъхьэлъэ чIыпIэ­хэр ары зыщагъэцакIэрэр. Джащ пае технологие пэрытхэм арэгъуазэх.

«Тиягъэ чIыопсым етымыгъэ­кIэу цIыфхэр зыфэныкъо инфраструктурэ псэуалъэр дгъэпсыным мэхьанэшхо иI. IофшIэнхэр зэкIэ игъом ыкIи дэгъоу зэшIохыгъэнхэ фае», — хигъэунэфыкIыгъ КъумпIыл Мурат.

Адыгэ Республикэм псэо­лъэшIынымкIэ, транспортымкIэ, псэу­пIэ-коммунальнэ ыкIи гъогу хъызмэтымкIэ и Министерствэ ипащэу Валерий Картамышевым Адыгеим и ЛIышъхьэ къызэрэфи­IотагъэмкIэ, графикым диштэу IофшIэнхэр зэхащэх. Псыхъоу Цыцэ нэсыщт псырыкIуапIэм изы Iахь лъэшэу къагъэгъунэрэ чIы­опс чIыпIэу «Адыгеим икъу­шъ­хьалъ» зыфиIорэм пхырыкIы­нэу щытыгъэти, проектым зэ­хъо­кIы­ныгъэхэр фашIыгъэх. Зи­гугъу къэт­шIыгъэ чIыопс чIы­пIэр къы­даухьэзэ псырыкIуапIэр агъэпсыгъ.

ООО-у «Монтаж» зыфиIорэм ипащэхэм къызэраIуагъэмкIэ, псырыкIуапIэм игъэпсынкIэ Iоф­шIэнхэм азыныкъо нахьыбэр зэшIуахыгъах. Ащ щыщэу ки­лометрэ 64-р агъэпсыгъах, по­селкэхэу Табачнэм, Тульскэм, ста­ницэу Къурджы­псым якIолIэрэ псырыкIуапIэхэр агъэтIылъыгъэх.

ЧIыопсыр къадеIэмэ, илъэсыр имыкIызэ проектым игъэцэкIэн аухынэу псэолъэшI­хэр мэгугъэх. Къа­фанэжьыгъэр псы­хъоу Цы­цэ­рэ псы­шкуашкоу Во­до-па­дистэмрэ адэжь псыугъоипIэ­­хэр щы­­гъэпсы­гъэнхэр, километрэ 25-рэ зикIыхьэгъэ псырыкIуапIэр шIыгъэныр ары.

ПсырыкIуапIэр загъэпсыкIэ, чэщ-зымафэм цIыфхэм псы кубометрэ мини 140-м нэс къа­IэкIэхьащт. Джыдэдэм анахьыбэ дэдэмкIи чэщ-зымафэм ахэм къаIукIэрэр псы кубометрэ мини 100 ныIэп.

Адыгеим и ЛIышъхьэ зэрэхигъэунэфыкIыгъэмкIэ, мы инфраструктурэ псэуалъэм елъыты­гъэщт Мыекъуапэрэ Мыекъопэ районымрэ адэсхэм зыпкъ итэу псыр зэраIэкIэхьащтыр, турист комплексым республикэм икъу­шъхьэлъэ чIыпIэхэм зызэращиушъомбгъущтыр.

АР-м и ЛIышъхьэ ипресс-къулыкъу