Партиеу «Единэ Россием» ифракциехэм япащэхэм я Совет игъэкIо­тыгъэ зэхэсыгъоу тыгъуасэ иIагъэр зэрищагъ партием и Тхьаматэу Дмитрий Медведевым. Видеоконференцие шIыкIэм тетэу кIогъэ Iоф­­тхьабзэм хэлэжьагъ «Единэ Россием» ишъолъыр къутамэ и Сек­ретарэу, республикэм и ЛIышъхьэу КъумпIыл Мурат.

Дмитрий Медведевым пэублэ псалъэ къышIызэ, Уры-сыем изакон шъхьаIэ гъэтэрэзыжьынхэр фэшIыгъэнхэм къыдезгъэштэгъэ, зымакъэ зытыгъэ пстэу­ми зэрафэразэр къы­Iуагъ. Хэ­дзынхэмкIэ комис­сиехэм Iофы­шхо зэрашIагъэр, кампаниер зэIухыгъэу ыкIи щы­нэгъончъэу зэрэрекIокIыгъэр хигъэунэфыкIыгъэх. Джащ фэдэу электроннэ шIыкIэм тетэу цIыфхэм амакъэ атын амал зэ­ряIагъэм шIуагъэ къызэритыгъэр, мы илъэсым «Единэ Россием» ипраймеризхэм ар зэрэщагъэфедагъэр къыхигъэщыгъ.

— Зымакъэ зытыхэрэмкIэ Iэрыфэгъоу щыт электроннэ мэкъэ тынымкIэ опытэу тIэ-кIэлъ хъугъэр тапэкIи дгъэфедэн фае. Ащ дакIоу хэдзын­хэмкIэ хэбзэгъэуцугъэм пылъ шапхъэхэр зэкIэ дгъэцэкIэнхэм тынаIэ тедгъэтыныр анахь шъхьаI, — къыIуагъ Дмитрий Медведевым.

Партием и Тхьаматэ къызэ­рэхигъэщыгъэмкIэ, Конституцием гъэтэрэзыжьынэу фашIы­гъэхэр цIыфхэм ящыIэкIэ-псэу­кIэ нахьышIу шIыгъэным, къэралыгъом игъэIорышIэн нахь шIуагъэ къытэу гъэпсыгъэным фэIорышIэщтых.

Адыгеим и ЛIышъхьэ зэхэсыгъоу щыIагъэм къытегущы­Iэзэ, Конституцием гъэтэрэзыжьынэу фашIыгъэхэр щыIэныгъэм щыпхырыщыгъэнхэмкIэ партием пшъэдэкIыжьышхо зэрихьырэр къызэрагурыIорэр хигъэунэфыкIыгъ.

— Къэралыгъом щыпсэурэ цIыфхэм анахьыбэм зыдыра­гъэштэгъэ гъэтэрэзыжьынхэм алъэныкъокIэ IофшIэныр зэрифэшъуашэу зэхэтщэныр ти­пшъэрылъ шъхьаI. Социальнэ гарантиехэр гъэпытэгъэнхэмкIэ, цIыфхэм ящыIэкIэ-псэукIэ нахьышIу шIыгъэнымкIэ, къэралыгъом хэхъоныгъэхэр ышIынхэмкIэ лъэбэкъушIу тшIыгъэ. Джы тыкъызэтеуцо хъущтэп — IофшIэнышхо дгъэцэкIэнэу къытпыщылъ, — къыIуагъ Къум­пIыл Мурат.