Адыгэ Республикэм и ЛIышъхьэу КъумпIыл Мурат машIом зыкъиштэн зилъэкIыщт уахъ­тэм мэз хъызмэтыр ыкIи мэшIогъэкIосэ къулы­къур зэрэфэхьазырхэр ыуплъэкIугъ, мэ­зым изэтегъэуцожьын, икъэухъумэн фыте­гъэпсыхьэгъэ хэушъхьэфыкIыгъэ техникэу аIэ­кIэлъыр зэрагъэфедэрэр зэригъэлъэгъугъ. Iофтхьабзэм хэлэжьагъ АР-м и Премьер-министрэ игуадзэу Сапый Вячеслав.

Республикэм ипащэ къулыкъухэм къаIэкIэхьэгъэ автомобилыкIэхэр зэригъэлъэгъугъэх, ащ ялIыкIохэм гущыIэгъу афэ­хъугъ, республикэм ичIыопс баиныгъэ къэухъумэгъэным фэшI шIуагъэ къытэу техникэр агъэфедэн зэрэфаер ари­Iуагъ.

— Сыд фэдэ ошIэ-дэмышIагъи тыфэхьазырын фае, анахьэу машIор къэхъунымкIэ щы­нэгъо гъэмафэм. МашIо къэмыхъуныр ары мыщ дэжьым анахьэу тынаIэ зытедгъэтын фаер. Ащ пае туристхэм, ти­чIыпIэгъухэм мэшIогъэкIосэным ишапхъэхэм афэгъэхьыгъэ къэбархэр игъом алъыдгъэIэ­сыным, тичIыопс баиныгъэ шъхьаIэ къэтыухъумэным фытегъэпсыхьэгъэ пэшIорыгъэшъ Iофтхьабзэхэр зэхэтщэнхэм мэ­хьанэшхо яI. Мы IофшIэныр гъэцэкIагъэ зэрэхъурэм ренэу лъэплъэ УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновыр. Мыщ фэдэ ошIэ-дэмышIагъэхэм шъолъырыр ащыухъумэгъэным фэшI лъэпкъ проектхэм амалэу къатыхэрэр къызфэтэгъэфедэх, МЧС-м зэрифэшъуашэу Iоф дэтэшIэ, зэпхыныгъэ пытэ дытиI, — къыхигъэщыгъ КъумпIыл Мурат.

Адыгеим мэзхэмкIэ и ГъэIорышIапIэ ипащэу Былымыхьэ Рэщыдэ къызэриIуагъэмкIэ, хэушъхьэфыкIыгъэ автоном уч­реждениеу «Адыгейская лесопожарная охрана» зыфиIорэм ыкIи лесничествэхэм мы илъэсым техники 3 ыкIи оборудовании 6 къаIэкIэхьагъ.

Лъэпкъ проектэу «Экологием» епхыгъэ шъолъыр проектэу «Мэзхэм якъэухъумэн» зыфи­Iорэм къыдыхэлъытагъэу техни­кэр къащэфыгъ. Ащ зэкIэмкIи сомэ миллиони 6,2-рэ пэIуагъэ­хьагъ.

АР-м мэзхэмкIэ и ГъэIоры­шIапIэ епхыгъэ организациехэм яматериальнэ-техническэ базэ гъэпытэгъэным фытегъэ­псыхьэгъэ Iофтхьабзэхэр шъо­лъырым зэрифэшъуашэу щы­зэхащэх. БлэкIыгъэ илъэс за­къом машинэ 17 къафащэфыгъ.

Федеральнэ гупчэм, респуб­ликэм ипащэхэм яшIуагъэкIэ мэз хъызмэтым иавтопарк нахь агъэкIэжьын, зэтырагъэпсыхьан алъэкIыгъ. 2012-рэ илъэсым щыублагъэу сомэ миллион 37,5-рэ зытефэрэ техникэ ыкIи обо­рудование 32-рэ шъолъырым къыIэкIэхьагъ.

Шъугу къэдгъэкIыжьын, рес­публикэмкIэ мэзхэм (ащ хэхьэ заповедникри) чIыпIэу аубытырэр гектар мин 337-м ехъу, ар зэкIэмкIи процент 40-м шIокIы.