Адыгэ Республикэм и ЛIышъхьэу КъумпIыл Мурат Мыекъопэ райо­ным зыщэIэм автомобиль гъогоу «Черниговская — Тыгъэмыпс» зы­фиIорэм ишIын зэрэлъыкIуатэрэр зэригъэлъэгъугъ. Республикэмрэ Краснодар краимрэ зэгъусэхэу мы проектыр агъэцакIэ.

Гъогум икIыхьагъэ елъытыгъэу апэрэ едзыгъом къыдыхэ­лъытагъэу километри 10,355-рэ Адыгеим щашIы. Ащ сомэ мил­лиард 1,94-рэ фэдиз пэIуагъэ­хьащт, непэрэ мафэм ехъулIэу сомэ миллион 200 агъэфедагъ.

IофшIэнхэр 2019-рэ илъэсым рагъэжьагъэх. Ащ пае пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Дортранссервис» зыфиIорэм къэралыгъо зэзэгъыныгъэ да­шIыгъ. Мы мафэм ехъулIэу Iофэу ашIагъэм къытегущыIагъ АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Карта­мышевыр. Мы гъогу Iахьыр къушъхьэ чIыпIэм зэрэщыIэр къыдалъыти, гъэхьазырын Iоф­шIэнхэм анахьэу анаIэ тыра­гъэтыгъ. Планэу щыIэм ипро- цент 30-р агъэцэкIагъ.

Гъогум изы Iахь ухыжьыгъэ зыхъукIэ я IV-рэ категорие зиIэ, шэпхъэшIухэм адиштэрэ псэуа­лъэ щыIэ хъущт. Джащ фэдэу зыгъэпсэфыпIэ чIыпIэхэр, дэ­хыгъохэр агъэпсыщтых, гъогу тамыгъэхэр, нэмыкIхэр тыра­гъэуцощтых.

Ащ нэмыкIэу поселкэу Гъо­зэрыплъэ икIэу Лэгъо-Накъэ екIолIэрэ автомобиль гъогум ишIыни республикэм щылъагъэ­кIуатэ. Ащ икIыхьагъэ километрэ 17,08-рэ мэхъу, ащ щыщэу километри 9,8-р апэрэ едзыгъом къыдыхэлъытагъ, 2021-рэ илъэсым объектым ишIын аухынэу агъэнафэ.

— ГъогурыкIоныр щынэгъончъэу щытыным, экологием ылъэныкъокIэ шапхъэхэр гъэцэ­кIэгъэнхэм мэхьанэшхо ятэты. Мыщ фэдэ екIолIакIэм ишIуа­гъэкIэ цIыфхэм щыIэкIэ амалэу аIэкIэлъхэм ахэхъо, инвестициехэмкIэ Адыгеир нахь хъопсагъо мэхъу, — къыIуагъ КъумпIыл Мурат.

АР-м и ЛIышъхьэ ипресс-къулыкъу