Аужырэ мафэхэм коронавирусыр къызэолIагъэу Адыгеим къыщыхагъэщыхэрэм япчъагъэ хэхъуагъ.

Зэпахырэ узым зимыушъомбгъуным пае, цыфыбэ зэхахьэ зэрэмыхъущтыр, санитарнэ шапхъэхэр гъэцэкIэгъэнхэр шIокI зимыIэ Iофэу зэрэщытыр мызэу, мытIоу специалистхэм къаIуагъэ нахь мышIэми, ар зымыгъэцакIэхэрэр щыIэх. ЗэрагъэунэфыгъэмкIэ, анахьэу хьэдагъэхэр ары нэбгырабэ къызэкIуа­лIэрэр, нахьыбэрэмкIи зыщызэпахы­жьырэр.

Адыгэ Республикэм ыкIи Пшызэ шъо­лъыр ащыпсэурэ быслъымэнхэм ямуфтий шъхьаIэу Къэрдэн Аскэрбый мы Iофыгъом ынаIэ тыридзагъэу, муниципальнэ образованиехэм ащыщхэр къыкIухьэхи, район ыкIи псэупIэ кой администрациехэм япащэхэм заIуигъэкIагъ. Вирусым зимыушъомбгъуным пае режим гъэнэфагъэу республикэр зытехьэгъагъэм игъорыгъоу къытекIыжьэу, бэдзэршIыпIэхэр, щапIэхэр, нэмыкIыбэхэр къызэIуахыжьыгъэ нахь мышIэми, узым зыщыуухъумэн, благъэу узэмыкIолIэныр, шапхъэхэр бгъэцэкIэнхэр шIокI зимыIэ Iофэу джыри зэрэщытыр зэIукIэгъухэм къащыхигъэщыгъ.

— Хьадагъэхэм цIыфыбэ ащызэхэмыхьэмэ нахьышIу, — къыIуагъ муфтиим тэ гущыIэгъу тызыфэхъум. – Анахьэу бзылъфыгъэхэр ары зыкъызфэзгъазэрэр. ТхьаусыхакIо кIуагъэхэми, благъэу зэмыкIуалIэхэу, IаплI зэрамыщэкIэу афэтхьаусыхэнхэ фае, ащ фэдэ шIыкIи щыI. Хъулъфыгъэхэми аIапэ амыубытымэ нахьышIу. Къин зиIэм фэтхьаусыхагъэр ащ лъыпытэу къыдэкIыжьын фае. Къуа­джэм къин къыдэхъухьагъэу, псэупIэ кой администрацием ипащэрэ къоджэ ефэндымрэ афэтхьаусыхэнхэу зыкIохэкIэ, цIыфхэр нахь макIэу зэрэзэхагъэхьащтхэм унагъор лъыплъэн фаеу зэрэщытыр, цIыфэу къекIолIагъэхэри нэбгырабэу зэхэтхэ зэрэмыхъущтыр джыри зэ агу къагъэкIыжьынэу зэIукIэгъухэм къащытIуагъ. Вирусыр джыри зэрэзэкIэмыкIожьыгъэр зыщыдгъэгъупшэ хъущтэп. Нэбгырабэ зы чIыпIэм щызэIукIэмэ, узыр зэпахынкIэ щынагъо. ЗэкIэри зыфэсакъыжьынхэ фае.

Къиным фэдэу хъярми цIыфхэр бэу зэрэщызэхахьэхэрэр къыдилъытэзэ, джэгухэр мы уахътэм зэхамыщэхэмэ зэрэнахьышIур къыIуагъ. Ащ дезымыгъа­штэу, къэзэрэщэгъэ ныбжьыкIэхэм нэ­чыхьэр афатхынэу мэщытым къызекIуа­лIэхэкIэ цIыфыбэ къызэхащэ зэрэмыхъу­щтыми къыкIигъэтхъыгъ.

ХЪУТ Нэфсэт.