Лъэпкъ проектэу «Жилье и городская среда» зыфиIорэм игъэцэкIэн зэрэ­лъыкIуатэрэм щытегу­щыIагъэх УрысыемкIэ шъолъырхэм хэхъоныгъэ ашIыным фэгъэзэгъэ Правительственнэ ко­­мис­­сием ипрези­диум тыгъуасэ зэхэсыгъоу иIагъэм.

Ви­деоконференцие шIы­кIэм тетэу кIогъэ Iофтхьабзэр зэрищагъ УФ-м и Правительствэ и Тхьаматэ игуадзэу Марат Хуснуллиным.

Адыгеим ыцIэкIэ ащ хэлэ­жьагъ республикэм и ЛIышъхьэу КъумпIыл Мурат.

ПсэупIэхэм яшIын ыкIи къызэ­хэонымкIэ щынагъоу щыт унэхэм арысхэр гъэкощыгъэнхэр ары Iофыгъо шъхьаIэу къаIэтыгъэхэр. Марат Хуснуллиным пэублэм къызэриIуагъэмкIэ, гъогу кар­тэхэм къадыхэлъытэгъэ пстэури гъэцэкIэгъэнхэм ыкIи псэупIэхэм яшIынкIэ къэгъэ­лъэгъонхэм акIэхьэгъэным пстэуми анаIэ тырагъэтын фае — ащ фэдэ пшъэрылъ къы­гъэуцугъ Урысые Федерацием и Президентэу Владимир Путиным.

Мы лъэныкъомкIэ Iофхэм язытет зыфэдэм къытегущыIагъэх УФ-м псэолъэшIынымкIэ ыкIи псэупIэ-коммунальнэ хъыз­мэтымкIэ иминистрэу Владимир Якушевымрэ шъолъырхэм япащэхэм ащыщхэмрэ.

Лъэпкъ проектым къыдыхэлъытэгъэ шъолъыр проектэу «ПсэупIэ» зыфиIорэр Адыгеим щаштагъ. Ащ къызэригъэна­фэрэмкIэ, 2024-рэ илъэсым нэс республикэм псэупIэ квадратнэ метрэ миллиони 2,1-рэ щашIынэу ары. БлэкIыгъэ илъэсым квад­ратнэ метрэ мин 257-рэ атыгъ, 2018-рэ илъэсым егъэпшагъэмэ а къэгъэлъэгъоныр проценти 137,4-рэ мэхъу. 2020-рэ илъэсым квадратнэ метрэ мин 262-м ехъу ашIын гухэлъ щыI, ащ щыщэу мини 154-м ехъур унэе псэупIэхэм ателъытагъ.

— Шъолъырым социальнэ-экономикэ хэхъоныгъэ ышIыным иунэе план игъэцэкIэн къыдыхэлъытагъэу муниципалитетхэм проектнэ-сметнэ документациер агъэхьазырыным фэшI мы илъэсым сомэ миллион 86-рэ фэдиз дгъэфедэнэу тэгъэнафэ. Илъэсым ыкIэм нэс а Iоф­шIэныр аухынышъ, къи­хьащтым инженернэ сетьхэм ягъэпсын фежьэнхэ амал яIэным пае чIыпIэхэм япащэхэм пшъэрылъ гъэнэфагъэхэр афэсшIыгъ. Ащ ишIуагъэкIэ псэупIэхэр зытырашIыхьащтхэ чIыгу Iахьхэр зэрифэшъуашэу цIыфхэм агъэфедэнхэ алъэкIыщт, — къыхи­гъэщыгъ Адыгеим и ЛIышъхьэ.

КъызэхэонымкIэ щынагъоу щыт унэхэм арысхэр гъэкощыгъэнхэм фэшI, федеральнэ проектым къыдыхэлъытагъэу, 2025-рэ илъэсым Iоныгъом и 1-м нэс АдыгеимкIэ квадратнэ метрэ мини 7,9-рэ зэрылъ псэупIэхэм арысхэм яфэIо-фа­шIэ— хэр агъэцэкIэщтых. Ащ къыхиубытэхэрэр 2017-рэ илъэсым щылэ мазэм и 1-м нэс ава­рийнэу алъытагъэхэр арых. ПсэупIэ-коммунальнэ хъыз­мэтым зэхъокIыныгъэхэр фэшIы­гъэнхэмкIэ Фондым 2019 — 2021-рэ илъэсхэм ателъытагъэу республикэм сомэ миллион 67-рэ къыфитIупщыгъ. БлэкIыгъэ илъэсым аварийнэ квадратнэ метрэ 512-мэ ащыпсэухэрэр агъэкощыгъэх, мы илъэсым ыкIэм нэс а пчъагъэм джыри квадратнэ метрэ 830-рэ къы­хэхъощт (планэу щыIэр квадратнэ метрэ 720-рэ). 2021-рэ илъэсым тыгъэгъазэм и 31-м ехъулIэу, гухэлъэу щыIэм илъэс­кIэ ыпэ итхэу, унэгъо 50 агъэкощынэу агъэнафэ, ахэр зэ­рысхэм псэупIэ квадратнэ метрэ 2000 арылъ.

АР-м и ЛIышъхьэ ипресс-къулыкъу.