Зыпкъ итэу, хъугъэ-шIагъэ хэмытэу рекIокIыгъ
Урысые Федерацием и Конституцие гъэтэрэзыжьынхэр фэшIыгъэнхэмкIэ голосованиеу мэфи 7-рэ щыIагъэр аухыгъ. Мы Iофтхьабзэр зэрэрекIокIыгъэм, кIэухэу фэхъугъэхэм афэгъэхьыгъэ пресс-конференцие Адыгэ Республикэм и Общественнэ палатэ зэхищагъ. Ащ хэлэжьагъэх Урысыем иполитикэ партиехэм яшъолъыр отделениехэм ялIыкIохэр, лъыплъакIохэм ащыщхэр, къэбар жъугъэм иамалхэр.
Общественнэ палатэм ипащэу Устэ Руслъан Iофтхьабзэр къызэIуихызэ, голосованиеу щыIагъэм кIэух гъэнэфагъэ фашIынэу, еплъыкIэу яIэхэмкIэ зэдэгощэнхэу зэрэзэрэугъоигъэхэр хигъэунэфыкIыгъ.
— Сигуапэу хэзгъэунэфыкIымэ сшIоигъу къэралыгъомкIи, цIыфхэмкIи мэхьэнэшхо зиIэ Iофтхьабзэр республикэм дэгъоу зэрэщырекIокIыгъэр, — къыIуагъ Устэ Руслъан. – Адыгеим иобщественнэ организациехэмрэ партиехэмрэ яшъолъыр отделениехэм ялъыплъэкIо 1600-м ехъу голосованием хэлэжьагъ. Адыгеим къыщызэIуахыгъэгъэ хэдзыпIэ чIыпIэ 264-р санитарнэ ыкIи щынэгъончъэным ишапхъэхэм адиштэщтыгъэх. Зыпкъ итэу цIыфхэм амакъэ атыгъ.
Политическэ партиехэу «Единая Россия» ыкIи «Справедливая Россия» зыфиIохэрэм яшъолъыр отделениехэм япащэхэу АфэшIэгъо Рэмэзанрэ Александр Лободарэ къызэгущыIэхэм, Урысые Федерацием и Конституцие гъэтэрэзыжьынхэр фэшIыгъэнхэмкIэ зэрэ Урысыеу щыкIогъэ мэкъэтыныр политикэ хъугъэ-шIэгъэшхоу зэрэщытыр хагъэунэфыкIыгъ. Адыгеим исхэр чанэу ащ зэрэхэлэжьагъэхэм хэгъэгум политикэу щызэрахьэрэр лъагъэкIуатэ зэрашIоигъор къызэригъэлъэгъуагъэр ахэм къыхагъэщыгъ. Джащ фэдэу мы рекIокIыгъэ Iофтхьабзэм апэрэу щагъэфедэгъэ мэкъэтын шIыкIэхэр тапэкIи къыдыхалъытэзэ ашIымэ, цIыфхэмкIэ зэрэIэрыфэгъущтыр къаIуагъ.
Пресс-конференцием кIэух зэфэхьысыжь гущыIэ къыщишIыгъ ассоциациеу «Независимый общественный мониторинг» зыфиIорэм иэкспертэу Щыкъ Раситэ. Ассоциацием иплатформэ пстэумкIи мэкъэгъэIуи 5 къыIукIагъэр, ахэри хъугъэ-шIагъэхэм зэрафэмыгъэхьыгъагъэхэр ащ къыIуагъ. ХэдзыпIэ чIыпIэхэм ащыхъурэр, санитарнэ шапхъэхэр зэрагъэцакIэхэрэр, зэхэшIыкI фыряIэу Iофтхьабзэм къызэрекIолIагъэхэр цIыфхэм техыгъэхэу къагъэхьыгъэх. Джащ фэдэу голосованием хэлэжьагъэхэм аIэ зэкIэдзагъэу IофшIэнышхоу зэрахьагъэмкIэ «тхьашъуегъэпсэу» Щыкъ Раситэ къариIуагъ.
Iэшъынэ Сусан.