Бэдзэогъум и 3-р – УФ-м и Къэралыгъо автоинспекцие и Маф
Лъытэныгъэ зыфэсшIырэ къэралыгъо инспекторхэр, ГИБДД къулыкъум иветеранхэр! Сыгу къыздеIэу шъуисэнэхьат епхыгъэ мэфэкIымкIэ сышъуфэгушIо!
Мыгъэ Къэралыгъо инспекциер зызэхащагъэр илъэс 84-рэ мэхъу. Ащ мэхьанэшхо иIэу щыт. Мы илъэс зэкIэлъыкIохэм тикъулыкъу хэхъоныгъэ ышIынымкIэ, ылъэ пытэу теуцонымкIэ гъогу кIыхьэ къыкIугъ. ГъогурыкIоныр щынэгъончъэным епхыгъэ IофшIэным хэшIыкI куу фыряIэу, IэпэIэсэныгъэ ин зыIэкIэлъ IофышIэхэм щытхъу хэлъэу ар агъэцакIэзэ мэфэкIым пэгъокIых. Аужырэ илъэсхэм ГИБДД къулыкъумрэ гъогурыкIоным хэлажьэхэрэмрэ зэфыщытыкIэ гъэнэфагъэхэр яIэхэ хъугъэ.
ГъогурыкIоныр щынэгъончъэнымкIэ Къэралыгъо инспекцием изичэзыу тарихъ нэкIубгъо зэридзэкIыгъ. АшIагъэри макIэп, ашIэн фаеу апэ илъыри ащ нахьыб. ТиIофшIэнкIэ опыт инэу тIэкIэлъ хъугъэм ишIуагъэкIэ хъугъэ-шIагъэхэр пэшIорыгъэшъэу къэтлъэгъунхэ, щынэгъончъагъэм исистемэ дгъэIорышIэн тэлъэкIы. цIыфхэм ящынэгъончъагъэ пае мафэ къэс, ом изытет емылъытыгъэу, тиIофышIэ нэбгырэ миным ехъурэмэ гъогухэм, урамхэм къулыкъур ащахьы, япсауныгъи ящыIэныгъи емыблэжьхэу яIоф агъэцакIэ.
Джащ фэдэу юбилейнэ мафэм амал къытеты тиветеран лъапIэхэм джыри зэ ягугъу къэтшIынэу. Къулыкъур ылъэ теуцонымкIэ зыкIуачIэ емыблэжьэу Iоф зышIагъэхэм, ветеранхэм ащыщэу джыри зышIэхэрэм гущыIэ фабэхэр апэсэгъохых.
Тикъэралыгъо игъогухэм ателъ правопорядкэр къаухъумэзэ зищыIэныгъэ зытыгъэ тиIофшIэгъухэм егъэшIэрэ шIэжьыр адэжь!
Шъыпкъэ, Iофыгъоу ыкIи къиныгъоу тикъулыкъу джыри иIэр макIэп. Ау, илъэсипшI пчъэгъэ гъогоу къэткIугъэм тыкъыфызэплъэкIыжьымэ, егъэжьэпIэшIоу, гухэлъышIоу зыфэдгъэуцужьыхэрэр гъэцэкIагъэ зэрэхъущтхэм, тигъогухэр зэрэщынэгъончъэщтхэм сицыхьэ телъ.
АР-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ Къэралыгъо автоинспекцием и ГъэIорышIапIэу Адыгеим щыIэм ипащэу Александр Курпас.