Сэнэхьат пэпчъ имэфэкI зыщыхигъэунэфыкIырэ мэфэ гъэнэфагъэ илъэсым иI. Къэралыгъо автоинспекцием ащ фэдэ мафэу иIэр бэдзэогъум и 3-р ары.

Хабзэ зэрэхъугъэу, илъэс къэс мы къулыкъум Iоф щызышIэхэрэм, гъэ­хъагъэ зиIэхэм ягугъу къэтэшIы. ГъогурыкIоныр щынэгъончъэным зиIа­хьышIу хэлъ структурэм имэхьанэ общест­вэм ыгу къэдгъэкIыжьыныр типшъэрылъ.

Пстэуми тызэресагъэу, полицейскэ хъулъфыгъэхэр ары нахьыбэрэмкIэ зигугъу къэтшIыхэрэр. Ау Адыгеим и Къэралыгъо автоинспекцие къэзыгъэ­дэхэрэ бзылъфыгъэхэр хэтых. Непэ ахэм ащыщхэм нэIуасэ шъуафэтшIыщт.

Тазэ Сурэт

Хьакурынэхьаблэ гурыт еджапIэр къызеухым, Адыгэ къэралыгъо уни­верситетым юридическэ сэнэхьатымкIэ Сурэт гъэ­сэныгъэ щызэригъэгъо­тыгъ. Хэгъэгу кIоцI Iоф­хэмкIэ отделэу Шэуджэн районым щыIагъэм 2003-рэ илъэсым IофшIэныр щыригъэжьагъ. Илъэсищрэ ащ щыIи, гъогурыкIоныр щынэгъончъэнымкIэ Къэралыгъо автоинспекцием и ГъэIорышIапIэу Адыгеим щыIэм къэкIо­жьыгъ. Зэхэщэн-зэфэхьысыжь IофымкIэ отделым истаршэ инспекторэу Сурэт илъэс 14 хъугъэу мэлажьэ, полицием имайор.

— СиIофшIэн лъэшэу сыгу рехьы ыкIи шIу сэлъэгъу, — къеIуатэ ащ. — Джыри еджапIэм сы­чIэсыгъ теубытагъэ хэ­лъэу полицием сызэрэхэхьащтыр къасIо зэхъум. Ащ фэдэу IофшIэным угукIэ уфэщагъэ зыхъукIэ, ар къыбдэхъущт ыкIи къыпфэпсынкIэщт. Сурэт имэфэ гушIуа­гъо­хэр зэрипхырэр ­ишъаоу Батыр ары.

Лъащэкъо Зар

ЩыIэныгъэ гъогум уте­тэу урыкIозэ, чIыпIэ гъэ­нэфагъэ щыуубытынэу мэхъу. Узыфеджэгъэ сэнэхьатым Iоф рымышIэу, гухэлъ чыжьэхэмкIэ узыкIэхъопсыщтыгъэм зы­фэбгъазэу къыхэкIы. Ащ фэдэу хъугъэ Зарэ иIофи. Илъэс 17 хъугъэ автоинспекцием Iоф зыщишIэрэр. Ар пропагандэмкIэ отделым истаршэ инспектор, полицием икапитан.

— Зы мафэ сыкIэгъо­жьэу къыхэкIыгъэп мыщ сыкъызэрэкIуагъэмкIэ, — еIо Зарэ. — СиIофшIэн лъэшэу сыгу рехьы. Сыда пIомэ мафэ къэс цIыф зэфэшъхьафхэм таIукIэн фаеу мэхъу, гъогурыкIоныр­­ щынэгъончъэным игъэ­­пытэнкIэ кIэлэцIыкIу­хэм Iоф адэтэшIэ, игъэ­кIотыгъэ Iофтхьабзэхэу гъогум ащызэхатщэхэрэм водительхэри, лъэсрыкIо­хэри къахэтэгъэлажьэх.

Зарэ IофшIэн закъор арэп къызыщыхэщырэр, ар сабыибэ зиIэ ныхэм ащыщ. Ишъхьэгъусэу Рус­темрэ ежьыррэ сабыиплI зэдапIу. Унэгъо ныбжьы- кIэ зэдэIужьыр хэткIи щы­сэтехыпI.

ХъутIыжъ Анжел

Анжелэ апшъэрэ гъэ­­сэ­ныгъитIу зэригъэгъотыгъ: бухгалтер ыкIи юрист. Апэ­рэ сэнэхьатым тIэкIурэ Iоф ришIагъэу, ыгукIэ зэрэрымыразэр къыгурыIуагъ. Амал щыIэ зэрэ­хъугъэм тетэу гъогу автоинспекцием IофшIэныр щыригъэжьагъ. Анжелэ зыфэгъэзэгъэ IофшIэныр дэгъоу егъэцакIэ. Пшъэшъэ нэгушIу, узэреупчIырэм зэхэугуфыкIыгъэу джэуапыр къыретыжьы, «узыфэзыщэрэ цIыфхэм» афэд. Адыгеим и Къэралыгъо автоинспекцие ар илъэси 8 нахь хъугъэп зыIутыр, ау иIофшIэн ыгу зэрэрихьырэр, езэщынэу игъо зэримы­фэрэр къыхигъэщыгъ. ГъэIорышIапIэм иканце­лярие иинспектор, зэрэ­хъурэмкIэ, мыщ къакIорэ ыкIи икIырэ тхыгъэхэр, цIыфхэм яписьмэхэр, нэмыкI до­кументхэр зэре­гъафэх. Секретариат Iоф­шIэнри Анжелэ ащ де­гъэцакIэ.

Ишъхьэгъусэу Нурбыйрэ ежьыррэ унэгъо зэкIужь цIыкIу зэдашIагъ, Самирэрэ Аминэрэ зэ­дапIу.