Джаущтэу елъытэ гъогу патруль къулыкъум ихэушъхьафыкIыгъэ ба­тальон иротэу N 1-м иинспекторэу, полицием истаршэ лейте­нан­тэу Бырдж Асхьад. МэфэкIым ипэгъокIэу ащ зыIудгъэкIагъ ыкIи къулы­къум фэгъэхьыгъэ упчIэу фэдгъэзагъэхэм яджэуапхэр къы­риты­жьыгъэх.

Къэралыгъо автоинспекцием иIофышIэхэр анахь тыгъэр къыз­щеIыхрэми, къесыми, къещхыми къулыкъур ахьын, водительхэми лъэсрыкIохэми гъогуры­кIоным ишапхъэхэр зэрагъэцакIэхэрэм лъыплъэнхэ фае. Ныбжь зиIэхэми, кIэлэцIыкIу­хэми ящынэгъончъагъэ ахэм къаухъу­мэ. Адэ гъогу инспекторэу Iоф пшIэныр псынкIа? ШIоигъоныгъэ зиIэ пстэуми а сэнэхьатым Iоф рашIэшъущта? Мы упчIэхэм бэп ягупшысэхэрэр, къызгурыIохэрэр.

Бырдж Асхьад Iоф зишIэрэр бэшIагъэп нахь мышIэми, къиныгъоу къэуцухэрэм къамыгъащтэу, илъагъо пытэу теуцон ылъэ­кIыгъ. Хьатыгъужъыкъое гурыт еджапIэм ыуж Адыгэ къэ­ралыгъо университетым июридическэ факультет къызеухым, хэгъэгу кIоцI IофхэмкIэ Минис­терствэм вневедомственнэ ухъу­мэнымкIэ иотдел IофшIэныр щы­ригъэжьагъ. Ащ илъэситIурэ хэтыгъэу гъогурыкIоныр щынэгъончъэнымкIэ инспекцием зигъэзэжьыгъ.

— IофшIэн пстэуми ежь ­икъин гъэнэфагъэхэр хэлъых, — еIо Асхьад. — Ау уиIофшIэн шъэфэу хэлъхэр къызыпIэкIахьэхэу, пшъэдэкIыжьэу уиIэр къыбгурыIозэ, уипшъэрылъхэр бгъэ­ца­кIэхэ зыхъукIэ пэрыохъухэм уапэшIуекIощт. Анахь шъхьаIэхэм ащыщ уисэнэхьат шIу плъэгъуныр. Сэ сицIыкIугъом къыще­гъэжьагъэу полицием сызэрэхэ­хьащтыр сыгукIэ зыдэсIыгъыгъ. АщкIэ щысэшIу сфэхъугъэх сшы­нахьыжъитIу: зыр военнэу, Бурятием къулыкъур щехьы, адрэр — илъэс пчъагъэм МЧС-м хэтыгъ. Джащ фэдэу сиIофшIэн къысфэзгъэпсынкIэхэрэм ащыщых типащэхэу ПIатIыкъо Ич­рамрэ Гъонэжьыкъо Айдэмыррэ. Ахэр илъэс пчъагъэхэм къа­кIоцI тисэнэхьаткIэ IэпэIэсэныгъэ куу зыIэкIэлъ хъугъэ Iофы­шIэх, ныбжьыкIэу къакIохэрэм ящысэтехыпIэх.

СигущыIэгъу автоинспекцием Iоф зыщишIэрэр илъэси 6 нахь мыхъугъэми, шIыкIэ-амалхэр къызIэкIигъэхьагъэх, ищытхъу арегъаIо. IофшIэн зэфэшъхьаф­хэр ыгъэцакIэхэзэ къырэкIо ыкIи мы уахътэ ар взводым икомандир игуадз. ИIофшIэн зэрэшIогъэшIэгъоныр, игуапэу зэригъэцакIэрэр къыхигъэщыгъ.

— Мафэ къэс цIыф зэфэ­шъхьафыбэхэм таIокIэ, — къе­Iуатэ Бырдж Асхьад. — Шъыпкъэ, ахэр анэгукIэ зэрэзэфэ­мыдэхэм фэдэу яшэнхэмкIи зэ­текIых. Машинэм къикIэу къы­тэхъонхэри къахэкIых, гущыIэ дахэхэр къытпэзыгъохыхэрэри ахэ­тых. ЗэкIэми зэфэдэу та­фыщытын, щэIэгъэ ин, пытагъэ адызетхьан фае. Ащ дакIоу хэбзэгъэуцугъэу къежьэхэрэр икъу фэдизэу инспекторым ышIэнхэу щыт.

Интернетыр щыIэныгъэм джы пытэу зыщыхэуцуагъэм шIуагъи, дэи къыхьырэр макIэп. Социальнэ хъытыухэм бэрэ арытэлъагъох полицием икъулыкъушIэхэм атырахырэ видеохэр. Ахэм джы уафэхьазырынэу щыт. Ау мытэрэзхэм сэ ахэслъытэрэр инспекторхэм къулыкъур зыщахьырэ чIыпIэхэр сайтхэм къазэрэрагъахьэхэрэр ары. Сыд пае ешъуагъэм а чIыпIэхэр къыу­хьэзэ, лажьэ зимыIэ цIыф­хэм тхьамыкIагъор къафихьэу зыкIэбгъэкIон фаер?

Асхьад зыхэт ротэу N 1-м Мыекъопэ районыр, къалэу Мыекъуапэ ыкIи ащ хэхьэрэ къоджэ псэупIэхэр епхыгъ.

— Аужырэ илъэс зэкIэлъыкIохэм зэхатшIэу къалэм дэт автомобильхэм япчъагъэ хэ­хъуагъ, — къыIуагъ сигущыIэгъу. — Ащ дакIоу, езгъэжьэгъэкIэ водительхэми къахэхъуагъ. Къа­лэм игъогу зэхэкIыпIэхэу анахьэу авариехэр зыщыхъухэрэм, зыгъэпсэфыпIэ чIыпIэхэу лъэс­рыкIохэр бэу зыдэщыIэхэм къу­лыкъур ащытхьыным тыпылъ.

ТизэдэгущыIэгъу зылъыIэсыгъэхэм ащыщ тигъогухэм къатехъухьэрэ хъугъэ-шIагъэхэм япчъагъэ зэрэхахъорэр. Ушъхьагъоу ащ яIэр зэфэшъхьаф, на­хьыбэрэмкIэ гузэжъогъум, псын­кIэ зекIоным ахэр къахэкIых. ЗэкIэри ехьыжьагъэхэу мачъэх, гъогум шъхьэкIэфэныгъэ зэфыряIэп.

— НыбжьыкIэхэм ялажьэкIэ авариябэ мэхъу, — къыIуагъ Асхьад, — хэкIотагъэхэри, езгъэжьэгъэкIэ водительхэри джащ фэдэх. Ешъуагъэу къэдгъэуцу­хэрэри макIэп, ау ахэм ялажьэ зыхэлъ хъугъэ-шIагъэхэр нахь макIэ хъугъэх. ГъогурыкIоным хэлэжьэрэ пстэуми агу илъын фаер зы — анахь къызэрыкIо шапхъэр заукъокIэ тхьамыкIа­гъоу къыздихьыщтыр бэшъ, са­къыныгъэ зыхэжъугъэлъ!

Бырдж Асхьад IофшIэнэу ыгъэцакIэрэм дакIоу, гъогурыкIоныр щынэгъончъэнымкIэ Къэ­ралыгъо автоинспекцием и Гъэ­­IорышIапIэ зэхищэрэ зэнэкъо­къухэм ахэлажьэ. «ГИБДД-м иинспектор анахь дэгъу» зыфиIоу 2016-рэ илъэсым щыIа­гъэм я 2-рэ чIыпIэр къыщыдихыгъ. Зэнэкъокъоу «Автомногоборье» зыфиIоу илъэс къэс Урысыем ишъолъыр зэфэшъхьафхэм ащызэхащэрэм изичэзыу кIогъу хэ­лэжьагъ. Шъолъыр 83-мэ къа­рыкIыгъэхэр Санкт-Петербург щызэрэугъоигъагъэх, Асхьад я 8-рэ чIыпIэр къыщыфагъэшъошагъ. Ащ фэдиз нэбгырэ пчъагъэ зыхэлэжьэгъэ зэнэкъокъумкIэ ар кIэух дэеп. СигущыIэгъу щэрыоныр зикIасэхэу, къыздэ­хъухэрэм ащыщ, мастер хъуным­кIэ кандидатыцIэр ригъэкъугъ.

IофшIэным изакъоп цIыфым ищыIэныгъэ зэпхыгъэр. Хъулъфыгъэм унагъо ышIэнэу щыт. А лъэныкъомкIи Бырдж Асхьад уехъопсэнэу щыт, ишъхьэгъусэу Джэнэтрэ ежьыррэ пшъашъэрэ (Бэлла) кIалэрэ (Бислъан) зэ­дапIу.

Гъэзетыр къызфигъэфедэзэ, Асхьад иIофшIэгъухэм, ветеранхэм (ахэр зыщагъэгъупшэхэрэп) ямэфэкI мафэкIэ афэгушIо. Псауныгъэ пытэрэ кIуа­чIэрэ яIэхэу, яунагъо­хэм адатхъэ­хэу, ядунай ма­мырэу щыIэнхэу афэлъаIо.

ЗиIофшIэн фэшъыпкъэхэу, лIыбланэхэу, гъэпсэф зимыIэу Iоф зышIэрэ къулыкъушIэхэр зэрэтиIэхэр зыщыдгъэгъупшэхэ хъущтэп, яфэшъошэ уасэ афэтшIын фае. Я 6 — 7-рэ нэкIубгъохэр зыгъэхьазырыгъэхэр

Iэшъынэ Сусан.