Хъоджэе Аслъан: «Лъэпкъхэм якультурнэ кIэн къэгъэнэжьыгъэным мэхьэнэшхо иI»
Къэралыгъо къэшъокIо ансамблэу «Налмэсым» ихудожественнэ пащэу Хъоджэе Аслъан бэдзэогъум и 1-м ымакъэ ытыгъ. АР-м инароднэ, Пшызэ шъолъыр ыкIи Абхъаз Республикэм язаслуженнэ артист зэрилъытэрэмкIэ, гъэтэрэзыжьынэу къэралыгъом и Закон шъхьаIэ фашIыгъэхэм лъэпкъ зэфэшъхьафыбэу Урысыем щыпсэухэрэм якультурэ хэхъоныгъэхэр егъэшIыгъэнхэм фэIорышIэнэу ахэтыр макIэп.
— Къэралыгъом кIочIэшхо иIэмэ нэбгырэ пэпчъ тищыIакIэ дэгъущт, — къыIуагъ ащ. — ЕтIани, обществэмкIэ гуманистическэ уасэхэм мэхьанэ яI. Ахэр зэкIэ къыздэлъытэгъэ гъэтэрэзыжьынхэм сымакъэ афэстыгъ. Лъэпкъхэм якультурэ къызэтенэмэ, ахэм этическэ, этническэ ыкIи нэмыкI гъэхъагъэу яIэхэм ахахъозэ лъыкIотэщт. Ащ фэдэ гугъапIэ зэрэщыIэм илъэсыбэ хъугъэу къашъом ыбзэкIэ адыгэ лъэпкъым зрителыр нэIуасэ фэтшIынэу, уахътэм диштэу зытыушъомбгъунэу, УФ-м лъэпкъ ыкIи культурнэ хэхъоныгъэхэр ышIынхэм тиIахь хэтлъхьанэу амал къытеты.