Непэ, мэкъуогъум и 30-м, парламен­тариз­мэм и Дунэе мафэ къэралыгъуишъэм ехъумэ апэрэу хагъэунэфыкIы.

Парламентхэм я Союз и Дунэе конференцие 1889-рэ илъэсым имыщ фэдэ мафэ зэхащэгъагъ. Ащ фэшI ООН-м и Генеральнэ Ассамблее парламентаризмэм и Дунэе мафэу ар къыхихыжьыгъ.

Мыщ фэдэ мафэ щыIэным кIэщакIо фэхъугъэхэм ащыщ Урысые Федерациер. Апэу предложениер къэзыхьыгъэр УФ-м и Федеральнэ ЗэIукIэ ФедерациехэмкIэ и Совет и Тхьаматэу Валентина Матвиенкэр ары. Къэралыгъуишъэм ехъумэ ар игъоу алъытагъ ыкIи резолюцием иавторхэм ащыщ хъугъэх.

Организацием ащ къызэрэдырагъэштагъэр, ащ фэдэ унашъо зэриштагъэр Урысыем изаконихъухьэхэм яIофшIэн къэгъэлъэгъоным имызакъоу, парламентхэм мэхьанэу яIэм дунаим зызэрэщиушъомбгъурэр къыхэгъэщыгъэным зэрэфэIорышIэщтым сенаторым къыкIигъэтхъыгъ. Мэкъуогъум и 30-м ар зэрэтыраубытагъэм парламентхэм язэпхыныгъэ, мы системэм иIофшIэн ямэхьанэ нахь къыкIегъэтхъэуи елъытэ.

— Мы мафэм парламентариз­мэм итарихъ чIыпIэ ин щиубытыщт. ЦIыфэу дунаим тетмэ ящыIакIэ нахьышIу хъуным, шэпхъэ гъэнэфагъэхэр щыIэнхэм фытегъэпсыхьагъэу депутатхэм Iофэу ашIэрэр нахь къыгъэлъэ­гъощт. Адыгеим идепутат пстэу­мэ мы мэфэкIымкIэ сафэгушIо, парламент Iофэу зыфэгъэзагъэ­хэм гъэхъагъэхэр щашIынхэу сафэлъаIо, — къыIуагъ АР-м и Парламент и Тхьаматэу Владимир Нарожнэм иеплъыкIэхэр къыриIотыкIызэ.

ХЪУТ Нэфсэт.