ГъэIорышIэкIо компаниехэм афагъэпытагъ
Коронавирусым зызэриушъомбгъурэм къыхэкIыкIэ Мыекъопэ къэлэ прокуратурэр зылъыплъэрэ шъолъыр чIыпIэхэм ащыпсэурэ цIыфхэм яфитыныгъэхэр къэухъумэгъэнхэмкIэ зэдагъэфедэрэ чIыпIэхэр дезинфекцие зэрашIыхэрэр ыуплъэкIугъ.
Фэтэрыбэу зэхэт унэхэм ячIэхьапIэхэр ыкIи зэдагъэфедэрэ чIыпIэхэр мафэ къэс гъэIорышIэкIо компаниехэм дезинфекцие ашIын фаеу Адыгеим и ЛIышъхьэ унашъоу ышIыгъэр аукъуагъэу къыхигъэщыгъ.
ЗэрагъэунэфыгъэмкIэ, дезинфекцие Iофтхьабзэхэр игъом зэрахьанхэмкIэ ищыкIэгъэщт ахъщэр къалэм игъэIорышIэкIо компаниехэм ащыщхэм къыхагъэкIыгъэп. Ащ дакIоу, дезинфекцие Iофтхьабзэхэр щынэгъончъэу зэрэзэрахьащт шIыкIэхэм афэгъэхьыгъэу фэтэрыбэу зэхэт унэхэм ащыпсэухэрэм икъоу макъэ арагъэIугъэп.
ГъэIорышIэкIо компании 3-мэ япащэхэм хабзэр зэраукъуагъэмкIэ ыкIи цIыфхэм япсауныгъэ зэрар къыфахьынымкIэ пшъэдэкIыжь зэрахьырэмкIэ къэлэ прокуратурэм тхыгъэхэр афыригъэхьыгъэх.
Нэужым а компаниехэм хэукъоныгъэхэр дагъэзыжьыгъэх, джырэ уахътэм дезинфекцие Iофтхьабзэхэр рагъэкIокIых.