Адыгэ Республикэм и Апшъэрэ хьыкум и Тхьаматэу Б. А. Шумэныр кIэщакIо зэрэфэхъугъэм тетэу Адыгэ Республикэм ихьыкумышIхэм я Совет иунашъокIэ Адыгэ Республикэм ихьыкум системэ иветеранхэм я Совет ехьылIэгъэ Положениер мыгъэ гъэтхапэм и 18-м аухэсыгъ.

Адыгэ Республикэм ихьыкум системэ иветеранхэм яучре­дительнэ зэIукIэ мэкъуогъум и 22-м щыIагъ, общэ юрисдикциемкIэ хьыкумышIхэу, арбитраж, конституционнэ хьыкумхэм, дзэ гарнизон хьыкумым яхьыкумышIхэу отставкэм щыIэхэмрэ къэралыгъо къулыкъушIэхэу хьыкум системэм илъэс 20-рэ ыкIи ащ къехъу щылэжьагъэ­хэмрэ ащ хэлэжьагъэх.

Хьыкум ветеранхэм я Совет ренэу Iоф зышIэрэ общественнэ къулыкъоу щыт, Адыгэ Рес­публикэм ихьыкумышIхэм я Совет ар щызэхэщагъ.

ЫпшъэкIэ зигугъу къэтшIыгъэ Положением диштэу зэIукIэм Адыгэ Республикэм ихьыкум системэ иветеранхэм я Совет хэтыщтхэр щыхадзыгъэх. Ахэр — А. И. Трахъор, А. М. Набэ­къор, О. М. Кулинченкэр, Б. А. Щагу­джыр, ТI. А. Бэрэтарыр, А. Т. Гарголиныр, С. Т. КIыкIыр, В. С. Пчелкиныр, В. И. Морозовар.

ЗэкIэми зэдырагъаштэу ­Адыгэ Республикэм ихьыкум системэ иветеранхэм я Совет иапэрэ зэIугъэкIэгъу итхьаматэу ха­дзыгъ Трэхъо Аслъан Исмахьилэ ыкъор, ащ игуадзэр А. Т. Гарголиныр, секретарыр О. М. Кулинченкэр ары.

Трэхъо Аслъан Исмахьилэ ыкъом илъэс 20-м къехъукIэ Адыгэ Республикэм ихьыкум системэ пэщэныгъэ дызэри­хьагъ, илъэс 42-рэ юриди­ческэ сэнэхьатым рылэжьагъ, ащ щы­щэу илъэс 24-рэ хьыкум Iофхэм апылъыгъ. Апэрэ квалификационнэ класс иI.

А. И. Трахъор Урысые Феде­рациемрэ Адыгэ Республикэм­рэ язаслуженнэ юрист, юридическэ шIэныгъэхэмкIэ доктор, профессор, Адыгэ къэралыгъо университетым июридическэ фа­культет икафедрэ ипащ, Пшы­зэ къэралыгъо университетым ипрофессор, къэралыгъо, ведомствэ тынхэр бэу къыфагъэшъошагъэх.

Адыгэ Республикэм и Апшъэ­рэ хьыкум и Тхьаматэу Б. А. Шумэныр Адыгэ Республикэм ихьыкум системэ иветеранхэм я Совет иапэрэ зэIугъэкIэгъу хагъэхьагъэхэм къафэгушIуагъ, хьыкум Iофхэм язэхэфынкIэ Советым иIэпыIэгъу къызэрэщыгугъырэр къыIуагъ.