Коронавирусым зэрэдунаеу чIыпIэ къин ригъэуцуагъ. АIэ зэкIэдзагъэу, зэкъотхэу зэкIэ уз хьылъэм пэуцужьыгъэх. Анахьэу ащ фэгъэзагъэ хъугъэхэр врачхэр ары. Чэщи мафи ямыIэу, яунагъо исхэр тхьамэфэ зэкIэлъыкIохэм амылъэгъухэу гумэкIыгъор дэгъэзыжьыгъэ зэрэхъущтым пылъыгъэх.

Адыгеири мы узым къыухьагъэп. Ар тишъолъыр къызынэсым апэрэу пэуцужьыгъэхэр медицинэм иIофышIэхэр ары. Ахэм ягукIэгъуныгъэ, шIэныгъэу аIэкIэлъым, кIуачIэу къызпкъырахыгъэм яшIуагъэкIэ узым лъэшэу зыкъыщиштагъэп, Iофым изытет зыпкъ ит.

Красногвардейскэ район сымэджэщым иврач шъхьаIэ ипшъэрылъхэр зыгъэцэкIэрэ Бахъукъо Аминэт коронавирусым пэуцужьыгъэ врачхэм ащыщ. Пэщэ IэнатIэм техьэгъэ къодыеу гумэкIыгъор къежьагъ. Сымэджэщыр гъэлъэшыгъэ шIыкIэм тетэу лэжьэным, коллективым иIофшIэн зэрифэ­шъуашэу зэхищэным шIэныгъэу ыкIи кIуачIэу хилъхьагъэр ма­кIэп.

— Врач шъхьаIэм ипшъэрылъхэр зызгъэцакIэрэр мэзищы хъугъэ. ЫпэкIэ ащ игуадзэу Iоф сшIэщтыгъэ, — къытфеIуатэ Бахъукъо Аминэт. — Коронавирусыр республикэм къызэсым ащ цIыфхэр зэрэщытыухъумэщтхэм тыпылъыгъ. Районым зыкъыщимыштэным, къызэу­тэкIыгъэхэр цIыфхэм ахэмы­хьэхэу дгъэхъужьынхэм тыпы­лъыгъ.

ТигущыIэгъу ныбжьыкI нахь мышIэми зыфэгъэзэгъэ Iофыр чанэу, IупкIэу егъэ­цакIэ. Сымаджэхэм IэпыIэгъу зэрафэхъу­рэм дакIоу, адэгущыIэ, егъэдаIох.

— «ГущыIэ дахэм блэр гъуанэм къы­рещы», — еIо гущыIэжъэу тиIэхэм ащыщым. Ащ къыдгурегъаIо хэти рэхьа­тэу удэгущыIэным зэрэкIэхъопсырэр. Анахьэу гущыIэ дахэр IэпыIэгъу къызыфэхъурэр уз горэм ыгъэгумэкIэу сымэджэщым ипчъэхэр къызэIузыхырэр ары. Мэкъэ шъабэкIэ зыфэбгъазэу, уишIуагъэ ебгъэкIыным узэрэфэхьазырыр зэхэзышIэрэм Iэзэгъу уфэхъугъахэу къыщэхъу, — къытфеIуатэ Аминэт.

Бахъукъо Аминэт зэрылэжьэрэ сэнэхьатыр ыгукIэ къызэрэхихыгъэр нэрылъэгъу. Ыпсэ хилъхьэзэ зэригъэцакIэрэм ар къеушыхьаты.

— Я 5-рэ классым сисыгъ врачэу сыхъун гухэлъ зысэшIым, — игукъэкIыжьхэмкIэ къыддэгуащэ тигущыIэгъу. — Я 7-рэ классым къыщегъэжьагъэу мыщ сишъыпкъэу зыфэзгъэхьазырынэу езгъэ­жьагъ, мы лъэныкъомкIэ апшъэрэ гъэсэныгъэр зэзгъэгъотынымкIэ сищыкIэгъэщт предметхэм игъэкIотыгъэу сяджэщтыгъэ.

2006-рэ илъэсым Пшызэ къэралыгъо медицинэ академием ифилиалэу Мые­къуапэ дэтым тигущыIэгъу чIэхьагъ. Илъэсих еджэгъур зызэренэкIым Краснодар терапиемкIэ интернатурэр щи­хьыгъ. «Целевой» шIыкIэм тетэу еджэгъэ специалист ныбжьыкIэм къызщы­хъугъэ Красногвардейскэ районым къы­гъэзэжьыгъ ыкIи ащ иIофшIэн щыригъэ­жьагъ.

— 2013-рэ илъэсым сиIофшIэн езгъэ­жьагъ. Мыекъуапэ чIыпIэ къыщысатыщтыгъэ, ау сызщапIугъэр сыгукIэ нахь къыспэблэгъагъ, — къытфеIуатэ тигущыIэгъу. — Еджэгъу илъэсхэми Красногвардейскэ район сымэджэщым практикэр щысхьыщтыгъ, ащ къыхэкIэу мыщ къызэрэзгъэзэжьыщтыр сыгукIэ зыдэсIыгъыгъ. Сэнэхьатыр зызэсэгъэгъотым гухэлъэу сшIыгъагъэр зэблэсхъу­жьыгъэп ыкIи район сымэджэщым сы­Iухьагъ.

Бахъукъо Аминэт терапевт сэнэхьатыр къызэрэзIэкIигъэхьагъэм дакIоу профпатологиеми феджагъ. Мы лъэныкъохэмкIэ цIыфхэм зэряIэзэщтыр ышIэу сымэджэщым иIофшIэн щыригъэжьагъ.

— Апэрэ медицинэ IэпыIэгъур цIыфым ебгъэгъотыныр, ащ илажьэр охътэ кIэкIым къыкIоцI бгъэунэфынышъ уеIэзэныр IэшIэхэп. ШIэныгъэ куоу пIэкIэлъын фаем дакIоу уиIофшIэгъухэми уагурыIон, пIэ зэкIэдзагъэу узэдэлэжьэн фае. Мыщ дэжьым сигущыIэ къыщыхэзгъэщы сшIоигъу Iоф зыдасшIэрэ коллективым лъэшэу сызэрэфэразэр, — тыщегъэгъуазэ Аминэт.

ЫпэкIэ къызэрэщыхэдгъэщыгъэу, Iоф пшIэныр апэрэ мафэхэм псынкIэп. Илъэс зэкIэлъыкIохэм къакIоцI уфырагъаджэ нахь мышIэми, улэжьэнэу зебгъажьэкIэ упчIэу къэуцурэр бэ. Мыщ дэжьым Аминэт IэпыIэгъушхо къыфэхъу­гъэх иIофшIэгъухэр. Сыд фэдэ упчIэ иIэу яолIагъэми джэуапынчъэу къагъэнагъэп. Специалист ныбжьыкIэу коллективым къыхэхьагъэр зэрагъэгупсэфыщтым, гумэкIыгъо имыIэу Iоф зэришIэщтым пылъыгъэх.

— Апэрэ мафэу сыкъызIухьагъэм къыщегъэжьагъэу ащыщы сыхъугъ. ИщыкIагъэр зэкIэ чанэу агъэцакIэ, сымаджэхэм цIыфыныгъэ афыряIэу яIоф­шIэн зэхащэ, — игущыIэ лъегъэкIуатэ Аминэт. – Iоф зыдапшIэхэрэм уагурыIоным сэркIэ мэхьанэшхо иI. Ащ бэ елъы­тыгъэр. Зы унэгъо Iужъум фэдэу тызэдеIэжьзэ пшъэрылъэу тиIэр зэдэтэгъэцакIэ. ЦIыфым уеIэзэным уфеджэныр псынкIэп, ау еджэгъу илъэсхэми, джырэ уахъти Аминэт мы сэнэхьатыр къызэрэхихыгъэмкIэ кIэгъожьырэп.

— Шъыпкъэ, чIыпIэ къинэу тызэрыуцорэр макIэп, ау IэпыIэгъу узыфэхъугъэу, уишIуагъэ зэкIыгъэ цIыфыр зыплъэ­гъукIэ, узфэрэзэжь. ЫпэкIи нахь чанэу Iоф пшIэнэу ащ кIуачIэ къыпхелъхьэ, — игупшысэхэмкIэ къыддэгуащэ Аминэт.

ТигущыIэгъу апэрэ мафэу Iоф зишIэрэм къыщегъэжьагъэу зыфэгъэзэгъэ лъэныкъор IупкIэу егъэцакIэ. Пшъэ­шъэ ныбжьыкIэр зылажьэрэр илъэс заулэ тешIагъэу врач шъхьаIэм игуадзэу агъэнэфагъ. Илъэсищырэ Iоф ышIагъэу пэщэныгъэри зэрихьан фаеу хъугъэ. Къыхэгъэщыгъэн фае сыд фэдэ лъэныкъо фэгъэзагъэ хъугъэми, фэмыгъэцэкIэн гупшэсэхэр къытекIохэу зэрэзэкIэмыкIорэр. Сыдигъуи ыгу етыгъэу ипшъэ­рылъхэр зэшIуехых.

— Врач шъхьаIэм иIэнатIэ згъэцэкIэнэу езгъэжьэгъэ къодыеу коронавирусым епхыгъэ гумэкIыгъор къыт­шъхьащыуцуагъ, — къеIуатэ Аминэт. — Сымэджэщым иIофшIэн зэрэзэхищэрэр охътэ кIэкIым къыкIоцI зэблэ­хъугъэ хъугъэ. Мэзищым гъэлъэшыгъэу тылэ­жьагъ. Чэщ-зымафэм зэпымыоу сымэ­джэщыр цIыфхэм IэпыIэгъу афэ­хъущтыгъэ. Коронавирусыр къызхагъэщыгъэ цIыфхэм адэжь тыкIуагъ, сымэджэщым къэтщагъэх, унэм тщэжьыгъэх. Къыхэзгъэщы сшIоигъу медицинэм иIофы­шIэхэм шапхъэу щыIэхэр гъэлъэшыгъэу зэрагъэцэкIагъэхэр.

Непэрэ мафэм ехъулIэу Бахъукъо Аминэт зипэщэ сымэджэщым нэбгырэ 32600-м ехъу епхыгъ. Ахэм стационар, амбулаторнэ-поликлиническэ IэпыIэгъу арагъэгъоты. Красногвардейскэ районым амбулатории 10-рэ, фельдшер-мамыку IэзэпIи 6-рэ ит.

Ситхыгъэ икIэухым къыщыхэзгъэщы сшIоигъу непэ сыкъызтегущыIагъэр зэрылэжьэрэ сэнэхьатыр ыгукIэ къызэрэхихыгъэр. Специалист ныбжьыкIэм гъэхъагъэу иIэр макIэп, ау цIыфхэм яшIулъэгъоу, яшъхьэкIэфэныгъэу къы­лэжьыгъэр пстэуми анахь лъапI.

Гъонэжьыкъо Сэтэнай.