АР-м и ЛIышъхьэу КъумпIыл Мурат медицинэм иIофышIэ и Мафэ фэгъэхьыгъэ зэхэсыгъо видеоконференцие шIыкIэм тетэу зэхищэгъагъ. Псауныгъэм икъэухъумэн икъулыкъу епхыгъэ организациехэм япащэхэмрэ яIофышIэхэмрэ ащ къыхэлэжьагъэх.

Республикэм ипащэ пстэумэ апэу медицинэм иветеранхэмрэ непэ щылажьэхэрэмрэ япрофессиональнэ мэфэкIкIэ къафэгушIуагъ, зышъхьамысыжьхэу яIофшIэн зэрагъэцакIэрэм, дунаир зэлъызыкIугъэ зэпахырэ узым пэшIуекIогъэным яIахьы­шхо зэрэхалъхьэрэм къыкIи­гъэтхъыгъ.

Аужырэ мэзэ къинхэм госпитальхэм чэщи мафи ачIэтхэм, сымаджэу унэм исхэм яIазэ­хэрэм, зищыкIагъэ хъурэ пстэуми елбэтэу медицинэ IэпыIэгъу язгъэгъотыхэрэм зэкIэми «тхьа­шъуегъэпсэу» къариIуагъ.

— Вирусым апэу пэуцужьырэр шъоры, ар къызэолIагъэ­хэм шъуапэблагъэу, шъузэмыблэжьэу мафэ къэс Iоф шъошIэ. Зэпахырэ узэу дунаир зэлъызыкIугъэр Адыгеим къызихьагъэм къыщыубла­гъэу медицинэм иIофышIэ нэбгырэ 79-мэ ар къяолIагъ. ГухэкIми, нэбгыритIур дунаим ехы­жьыгъ. Шъуипсауныгъэ иягъэ екIыным ищынагъо зэрэ­шъушъ­хьащытым, IофшIэныр зэрэкъиным пае къэмынэу, шъуипшъэрылъхэр хэзыгъэ имыIэу шъогъэцакIэх, цIыфхэм ящыIэныгъэ къэшъогъэнэжьы, япсауныгъэ зэтешъогъэуцо­жьы, — къыIуагъ ЛIышъхьэм.

Мы лъэныкъом иветеранхэм яшIушIагъэхэр анахьэу къыхигъэщыгъэх. Ты­гъуасэ зыныбжь илъэс 75-рэ хъугъэу, Адыгэ республикэ клиническэ сымэджэщым компьютернэ томографиемкIэ иотделение ипащэу Цуамыкъо Мирэ, Хэгъэгу зэошхом иветеранэу, Къырым шъхьафит шIыжьыгъэным хэлэжьагъэу Кукэнэ Зулихъэ ацIэ къыриIуагъ.

Профессиональнэ мэфэкIым ипэгъо­кIэу «АР-м псауныгъэм икъэухъумэнкIэ изаслуженнэ IофышI» зыфиIорэ щытхъу­цIэр афагъэшъошагъ Хэгъэгу зэошхом иветеранхэу Татьяна Грольрэ Буба Медведевамрэ. ТIури медсестрау зэуапIэм Iутыгъэх, зэо ужыми яIофшIэн падзэжьыгъагъ.

Джащ фэдэу АР-м и ЛIышъхьэ ирэзэныгъэ тхылъкIэ медицинэм иорганизацие зэфэшъхьафхэм яIофышIэ 34-рэ къыхагъэщыгъ, АР-м и Къэралыгъо Совет – Хасэм ащ фэдэ итхылъ нэбгырэ 24-мэ афагъэшъошагъ.

— ИIофшIэн хэшIыкI ин фызиIэ профессионал шъыпкъэу тимедицинэ щылажьэрэр зэрэмымакIэр зэпахырэ узэу Адыгеим къихьагъэм къыушыхьатыгъ, — къыIуагъ КъумпIыл Мурат. — Коронавирусым зимыушъомбгъуным зиIа-­­ хьы­шхо хэзылъхьагъэхэм сызэрафэразэр тхылъхэмкIэ къыхэзгъэщыгъ. ЗэкIэми зырызэу тафэгушIонэу, аIапэ тыубытынэу джыдэдэм амал щыIэп, ау муниципальнэ образованиехэм ар ащагъэцэкIэнэу тэгугъэ. Вирусым къыздихьыгъэ къиныгъохэр текIыхэмэ тызэIукIэщт, уз мэхъа­джэм пэшIуекIогъэным зиIахьышхо хэзылъхьагъэхэр зэкIэри къыхэдгъэщыщтых.

Псауныгъэ пытэ яIэнэу, гъэхъагъэхэр ашIынхэу зэкIэми АР-м и ЛIышъхьэ къафэлъэIуагъ. Коронавирусыр къызэолIагъэхэм яIэзэгъэным ищыкIэгъэ медицинэ оборудованиер, ащ ущызыухъумэрэ псэуалъэхэр икъоу респуб­ликэм иIэнхэмкIэ IэпыIэгъу хъугъэхэ Урысые народнэ фронтым, партиеу «Единая Россия» зыфиIорэм я Адыгэ шъолъыр къутамэхэм ялIыкIохэм, волонтерхэм, предпринимательхэм, спонсорхэм лъэшэу зэрафэразэри къыкIи­гъэтхъыгъ.

Нэужым медицинэм иIофышIэхэм япрофессиональнэ мэфэкI пае къафэгушIуагъэх АР-м и Къэралыгъо Совет — Хасэм и Тхьаматэу Владимир Нарожнэр, псауныгъэм икъэухъумэнкIэ министрэу Мэрэтыкъо Рустем ыкIи медицинэм иIофышIэхэм япрофсоюз организацие ипащэу Любовь Усачевар.

Мы системэм щылажьэхэрэм ацIэкIэ къэгущыIагъэх зэпахырэ узхэм зыщяIазэхэрэ госпиталитIум яврач шъхьа­Iэхэу Сергей Доллинымрэ Владимир Лободарэ. АР-м и ЛIышъхьэ, хэбзэ органхэм, волонтерхэм IэпыIэгъушхо къызэраратырэм, къотэгъу зэрафэхъу­хэрэм афэшI «тхьашъуегъэпсэу» ахэм къараIуагъ.

— Мы уахътэм госпиталитIум нэбгырэ 285-мэ Iоф ащашIэ. Ахэм язэмыблэжьыгъэ ишIуагъэкIэ цIыфхэм япсауныгъэ зэтеуцожьы. Лъэшэу тышъущэгугъы. ШъуиIофшIэн нахь къышъуфэпсынкIэным пае тэ талъэныкъокIэ тшIэнэу къыттефэрэм тапэкIи къыщыдгъэкIэщтэп. Адыгеим имедицинэ хэбзэшIоу сыдигъокIи иIагъэхэр лъышъогъэкIуатэх, зэкIэхэмкIи щысэтехыпIэ шъухъугъ, — къы­Iуагъ КъумпIыл Мурат.

АР-м и ЛIышъхьэ ипресс-къулыкъу.