«Адыгэ Республикэм икъуаджэхэм зэдиштэу хэхъоныгъэ ягъэшIыгъэныр» зыфиIорэ къэралыгъо программэм къы­дыхэлъытагъэу унэ сертификатхэр ятыгъэным иIофыгъокIэ зэхэсыгъо Адыгеим и ЛIышъхьэу КъумпIыл Мурат тыгъуасэ видеоселектор шIыкIэм тетэу зэхищагъ.

Зэхэсыгъом хэлэжьагъэх Адыгэ Рес­публикэм и Премьер-министрэу Александр Наролиныр, Адыгэ Республикэм и Премьер-министрэ игуадзэу Сапый Вячеслав, Адыгэ Республикэм мэкъу- мэщымкIэ иминистрэу Къуанэ Анзаур, муниципальнэ образованиехэм япащэхэр.

Республикэм и ЛIышъхьэ къызэрэхигъэ­щыгъэмкIэ, мы илъэсым пхыращэу аублэгъэ къэралыгъо программэм къо­джэдэсхэм ящыIэкIэ-псэукIэ нахьышIу зышIыщт Iоф­тхьабзэхэр къыщыдэлъытагъэх.

«Унэгъо ныбжьыкIэхэм IэпыIэгъу ягъэгъотыгъэныр, демографическэ Iо­фы­гъор зэшIохыгъэныр, къуаджэм хэхъоныгъэ егъэшIыгъэныр — Уры­сыем и Президентэу Владимир Путиным къыгъэнэфэгъэ социальнэ по­литикэм илъэ­ныкъо шъхьаIэхэм ащыщых. Адыгеим исхэм ящыIэ­кIэ-псэукIэ зыкъегъэIэтыгъэнымкIэ тапэкIи тфэ­лъэкIыщтыр зэрэтшIэщтыр джыри зэ къыкIэсэIотыкIыжьы», — къыIуагъ КъумпIыл Мурат.

Джэджэ, Кощхьэблэ, Красногвардейскэ, Мыекъопэ, Тэхъутэмыкъое районхэм адэс нэбгырэ 11-мэ унэ сертификатхэр аратыгъэх. Ахэм ахэтых АПК-м, псауныгъэм икъэухъумэн, гъэсэныгъэм, социальнэ лъэныкъом яIофышIэхэр.

Адыгэ Республикэм мэкъу-мэщымкIэ иминистрэ зэрэхигъэунэфыкIыгъэмкIэ, федеральнэ, шъолъыр, чIыпIэ бюджетхэм къахэкIыгъэ сомэ миллион 12-р а гу­хэлъхэм апэIуагъэхьагъ. КъумпIыл Мурат ящыIэкIэ амалхэр нахьышIу зэрэхъугъэ­хэмкIэ унэгъо ныбжьыкIэхэм къафэгушIуагъ ыкIи шIоу щыIэр зэкIэ къадэхъу­нэу афэлъэIуагъ.

Къуаджэхэм ащыпхыращырэ проектхэм къатегущыIэзэ, республикэм и ЛIышъхьэ инженер, гъогу инфраструктурэм хэхъоныгъэ зэришIырэм, фельдшер-мамыку пунктхэр, культурэмкIэ унэхэр, спорт псэуалъэхэр зэрагъэ­псыхэрэм шъхьафэу къащыуцугъ. Къуа­джэхэм зэдиштэу хэхъоныгъэ ашIыным тегъэпсыхьэгъэ къэралыгъо программэм къыдыхэлъытагъэу мы аужырэ илъэси 5-м Адыгеим ащ фэдэ IофшIэнхэр зэрэщырагъэкIокIыхэрэр зэхэсыгъом щыхагъэунэфыкIыгъ. А уахътэм къыкIоцI къуаджэхэм газрыкIопIэ километри 130-рэ, псырыкIопIэ километри 162,5-рэ, фельдшер-мамыку пункти 8, унэгъо врачым иофис, зы гурыт еджапIэ ащагъэпсыгъ. Унэгъо, специалист ныбжьыкIэ 87-мэ сертификатхэр къаратхи, псэупIэ амалэу яIэхэр нахьышIу хъугъэ.

Къэралыгъо программакIэм диштэу мы илъэсым зэрахьанэу рахъухьэгъэ Iофтхьабзэхэм апае сомэ миллион 917,3-м нэсэу мылъку къыхагъэкIыщт. А мылъкумкIэ газрыкIопIэ километрэ 70-м къехъу, псырыкIопIэ километрэ 13, гъогу километри 7,5-рэ, культурэмкIэ Уни 2 Красногвардейскэ районым, фельдшер-мамыку пункт Джэджэ районым ащагъэпсынэу рахъухьэ. Ащ дакIоу Кощхьэблэ, Мыекъопэ, Шэуджэн районхэм ячIыпIэ гъэнэфагъэхэм язэтегъэ­псыхьанкIэ проект 12-мэ Iоф адашIэщт. Ахэм ащыщэу 3-р агъэцэкIэгъах, физкуль­турэм зыщыпылъынхэ, япсауныгъэ зыщагъэпытэн алъэкIыщт парк цIыкIу Теуцожь районым щызэтырагъэпсыхьагъ.

Республикэм и ЛIышъхьэ джащ фэдэу къызэрэхигъэщыгъэмкIэ, къэралыгъо программэм хэмыхьэгъэ Iофтхьабзэхэри къуаджэхэм ащызэрахьэх. Ахэр зыфэгъэхьыгъэхэр электролиние километри 4 гъэпсыгъэныр, культурэмкIэ Унэр Адыгэкъалэ щыгъэцэкIэжьыгъэныр, Мыекъопэ районым культурэмкIэ Уни 4-рэ кIэлэцIыкIу IыгъыпIи 3-рэ игъэкIотыгъэу щыгъэцэкIэжьыгъэнхэр, зы гурыт еджапIэ Шэуджэн районым щыгъэцэкIэжьыгъэныр ары. Район сымэджэщ­хэм апае автомобиль 13-рэ гурыт еджа­пIэхэм атегъэпсыхьэгъэ автобуси 8-рэ къащэфыгъах.

Къоджэдэсхэм щыIэкIэ-псэукIэу яIэр нахьышIу шIыгъэн зэрэфаем къытегущыIэзэ, республикэм и ЛIышъхьэ зэрэхигъэунэфыкIыгъэмкIэ, унэгъо ныбжьыкIэ пэпчъ ыпашъхьэ къитэджэрэ Iофыгъо шъхьаIэхэм ар зэу ащыщ.

«Къэралыгъом цIыфхэм мылъку­шхо къафыхегъэкIы. Ащ фэдэ IэпыIэгъур шъори къышъулъыIэсыгъ. Нахь гупсэфэу джы хэхъоныгъэ шъушIын, шъулэ­жьэн шъулъэкIыщт. Къуаджэм ихэхъо­ныгъэ шъуиIахь хэшъушIыхьэ зэрэшъушIоигъом мэхьанэшхо иI», — къы­Iуагъ КъумпIыл Мурат программэм хэлажьэхэрэм зафигъазэзэ.

Субсидиехэр къызэратыгъэхэм респуб­ликэм и ЛIышъхьэ тхьауегъэпсэу ра­Iуагъ къуаджэхэм адэс унэгъо ныбжьыкIэхэм, анахьэу сабыибэ зэрысхэм, яфэныкъоныгъэхэм язэшIохын ренэу ынаIэ зэрэтыригъэтырэм фэшI. КъумпIыл Мурат ахэм гухэлъэу яIэхэмкIэ яупчIыгъ, гъэ­хъагъэхэр тапэкIи ашIынхэу афэлъэ­Iуагъ.

Адыгэ Республикэм и ЛIышъхьэ ипресс-къулыкъу