Илъэс къэс мэкъуогъум и 22-м Iофтхьабзэу «ШIэжьым ишэф остыгъ» зыфиIорэм къыдыхэлъытагъэу зэрэ Урысыеу чэщым шэф остыгъэхэр щыхагъанэх. Мы мафэм Хэгъэгу зэошхом хэкIодагъэхэр агу къагъэкIыжьых, яшIэжь агъэлъапIэ.

Iофтхьабзэу «ШIэжьым ишэф остыгъ» зыфиIоу Хэгъэгу зэошхор къызежьагъэр илъэс 79-рэ зэрэхъурэм фэгъэхьыгъэр Урысыем ыкIи IэкIыб къэралыгъохэм ащыщхэм шъыгъо ыкIи шIэжь мафэу ащыкIощт. Мы илъэсым ар онлайн шIыкIэм тетэу рагъэ­кIокIыщт.

Хэгъэгу зэошхом щыфэхыгъэ­хэм язэхэт саугъэтэу Мыекъуа­пэ итемыр лъэныкъокIэ щыIэм мэкъуогъум и 21-м сыхьатыр 21.00-м волонтерхэр хэкIода­гъэхэм зы такъикърэ афэшъыгъощтых ыкIи шэф остыгъэхэр афыхагъэнэщтых. Коронавирусым зимыушъомбгъунымкIэ щынэгъончъагъэм иамалхэр агъэфедэщтых.

Джащ фэдэу Iофтхьабзэр онлайн шIыкIэм тетэу къагъэлъэгъощт. Мэкъуогъум и 22-р къызыщихьэрэ чэщым шIоигъоныгъэ зиIэ нэбгырэ пэпчъ шэф остыгъэ хигъэнэн видео зытырихынышъ, социальнэ хъытыум къыригъэуцон ылъэкIыщт.

Iофтхьабзэм икIэщакIохэр: Адыгэ Республикэм гъэсэны­гъэмрэ шIэныгъэмрэкIэ и Министерств, добровольчествэм и Ресурснэ гупчэу «Волонтеры Адыгеи» зыфиIорэр, чIыпIэ зыгъэIорышIэжьыпIэхэр.

Iэшъынэ Сусан.