Шъолъырхэм гъэтэрэзыжьынхэм ащатегущыIэщтых
IофшIэнымкIэ Кодексым гъэтэрэзыжьынхэу фашIымэ шIоигъохэр партиеу «Единэ Россием» Къэралыгъо Думэм къащыхилъхьагъэх. IофшIэпIэ чIыпIэм пэIудзыгъэхэу лэжьэнхэ зэралъэкIыщт шIыкIэхэр зыщыгъэнэфэгъэ законопроектым партием ионлайн-брифинг щытегущыIагъэх.
«Единэ Россием» ифракциеу Къэралыгъо Думэм щыIэм ипащэ иапэрэ гуадзэу Андрей Исаевым зэрэхигъэунэфыкIыгъэмкIэ, законопроектым дистанционнэ IофышIэхэм яфедэхэр къегъэгъунэх. ГущыIэм пае, IофшIэнымкIэ Кодексым хагъэкIыжьыщтых IофшIэн къязытыхэрэм ахэр IуагъэкIынхэмкIэ лъапсэу щыIагъэхэм ащыщхэр. Ащ къызэрэщыдэлъытагъэмкIэ, IофшIапIэм пэIудзыгъэу лажьэхэ зыхъукIи IофышIэхэм ялэжьапкIэ къафэнэжьыщт. IофышIэхэм яшIошIхэр къыдалъытэзэ, шэпхъэ-правовой актхэр аштэщтых.
Партиеу «Единэ Россием» ифракциеу Къэралыгъо Думэм щыIэм ипащэу Сергей Неверовым зэрилъытэрэмкIэ, IофшIэнымкIэ Кодексым мэхьэнабэ зиIэ гущыIэхэр щагъэфедэхэ хъущтэп. Шапхъэхэр гурыIогъошIухэу, юридическэ лъэныкъохэр икъоу къащыдэлъытагъэу щытынхэ фае. IофшIэнымкIэ Кодексым нэбгырэ миллион 75-мэ яфедэхэр къызэригъэгъунэрэм къыхэкIэу ащ зэхъокIыныгъэу фашIыщтхэм шъолъырхэм ащатегущыIэнхэ фае.
«Нэбгырэ пэпчъ ащ ишIошI къыриIолIэнэу, игупшысэхэмкIэ къыддэгощэнэу тыфай», — къыIуагъ партиеу «Единэ Россием» и Генеральнэ совет исекретарэу Андрей Турчак. Законопроектыр Къэралыгъо Думэм зэрэрахьылIагъэм ыпкъ къикIыкIэ шъолъырхэм япредложениехэу партием икъутамэхэм къаугъоищтхэр ятIонэрэ, ящэнэрэ хэплъэгъухэмкIэ къыдалъытэщтых.
«Законопроектэу къахэтлъхьагъэм цIыфхэр тырагъэгущыIэнхэу, профсоюзхэм ячIыпIэ объединениехэмрэ IофшIэн язытыхэрэмрэ ащ къыхагъэлэжьэнхэу тишъолъыр къутамэхэм игъо афэтлъэгъущт. Шъолъыр парламентхэми тизаконопроект щатегущыIэнхэм мэхьанэшхо иI», — къыIуагъ Андрей Турчак. 2021-рэ илъэсым щылэ мазэм и 1-м къыщегъэжьагъэу шэпхъакIэхэм кIуачэ яIэ хъунэу партиеу «Единэ Россием» хэтхэр мэгугъэх.