Оперативнэ штабым изэхэсыгъу
Коронавирусым зимыушъомбгъунымкIэ шъолъыр оперативнэ штабым изэхэсыгъоу иIагъэр Адыгэ Республикэм и ЛIышъхьэу КъумпIыл Мурат зэрищагъ.
Роспотребнадзорым АдыгеимкIэ и ГъэIорышIапIэ ипащэу Сергей Завгороднем къызэриIуагъэмкIэ, зэпахырэ узыр къызпыхьагъэхэмкIэ къэгъэлъэгъоныр процент 0,8-м нэс къеIыхыгъ.
Зэпахырэ узыр къызпыхьагъэхэм япчъагъэ зыщыхэхъуагъэу агъэунэфыгъэхэр къутырэу «Северо-Восточные Сады» зыфиIорэмрэ (чэщ–зымафэм нэбгыри 9) къуаджэу Очэпщыерэ.
Iофхэм язытет нахь дэи мыхъуным фэшI санитар шапхъэхэр зэрагъэцакIэхэрэм ренэу лъыплъэгъэн, чIыпIэхэм ащыпсэурэ цIыфхэм шIуагъэ къытэу Iоф адэшIэгъэн зэрэфаер, ащ дакIоу тестэу арагъэкIухэрэм язэфэхьысыжьын охътабэ рагъэхьэу бэхэм къызэрэхагъэщырэр КъумпIыл Мурат хигъэунэфыкIыгъэх. Ар дэгъэзыжьыгъэнымкIэ унэшъо гъэнэфагъэхэр ашIынхэ, медицинэ ушэтынэу арагъэкIухэрэм якIэуххэр псынкIэу къаIэкIэхьанхэм фэшI ищыкIагъэмэ ахъщэ тедзэ пэIуагъэхьан фаеу республикэм ипащэ къариIуагъ.
АР-м псауныгъэр къэухъумэгъэнымкIэ иминистрэу Мэрэтыкъо Рустем пандемием пэшIуекIогъэнымкIэ Iофэу ашIэрэм къытегущыIагъ. Непэрэ мафэм ехъулIэу шъолъырым ит госпиталитIум нэбгырэ 244-мэ ащяIазэх. Реанимацием нэбгыри 8 илъ, тIур ИВЛ-м иаппарат пыгъэнагъэх. Мы аужырэ чэщ-зымафэм IэзапIэхэм нэбгырэ 21-рэ къащагъэх, нэбгырэ 16 ачIатхыкIыжьыгъэх. Ахэм янахьыбэр Мыекъуапэ щэпсэух.
Сымаджэхэм Iэзэгъу уцхэр икъу фэдизэу аIэкIэлъых, медикхэм ящыкIэгъэ пстэури арагъэгъоты. Псауныгъэр къэухъумэгъэным иучреждениехэр режимэу щыIэм игъорыгъоу текIыжьынхэм иплан аштагъ. Мэкъуогъум и 22-м щегъэжьагъэу поликлиникэхэр, стоматологиехэр, диагностическэ ыкIи реабилитационнэ гупчэхэр, бзылъфыгъэхэм упчIэжьэгъу афэхъурэ учреждениехэр къызэIуахыжьынхэ гухэлъ щыI.
Мыщ дэжьым Iофхэм язытет къыдэлъытэгъэн ыкIи санитарнэ шапхъэхэр зэкIэ гъэцэкIэгъэнхэ зэрэфаер Адыгеим и ЛIышъхьэ къыIуагъ.
КIэлэцIыкIу IыгъыпIэхэм дежурнэ купхэр къазыщызэIуахыщтхэ мафэм епхыгъэ унашъо штабым ышIыщт. Непэ ехъулIэу учреждении 9 ащ дэгъоу фэхьазыр.
Общественнэ транспортым зэрэпсаоу иIофшIэн ригъэжьэжьынымкIэ амалэу щыIэхэм къэзэрэугъоигъэхэр атегущыIагъэх. Ащ нэмыкIэу спортымкIэ Урысыем ыкIи Адыгеим яхэшыпыкIыгъэ командэхэм ахэтхэм языгъэухьазырын падзэжьынэу агъэнафэ.
Джащ фэдэу ресторанхэм, кафехэм, нэмыкI общественнэ шхапIэхэм алъэныкъокIэ щыIэ режимыр нахь «агъэшъэбэнэу» егупшысэх. Ау ахэм санитарнэ шапхъэхэр зэкIэ агъэцэкIэнхэ фае. Ащ нэмыкIэу мэщытхэмрэ чылысхэмрэ къызэIуахыжьынхэ гухэлъ щыI.
Специалистхэм зэралъытэрэмкIэ, режимэу щыIэм текIыжьыгъэным иапэрэ едзыгъо къыдыхэлъытагъэу Адыгеим мэхьанэшхо зиIэ пIалъэ къыкIугъ. Зэпахырэ узыр къызпыхьагъэхэм япчъагъэ зыщыхэхъогъэ уахътэм ыуж а къэгъэлъэгъоныр нахь макIэ хъунэу ригъэжьагъ.
— Непэ Iофхэм язытет зыпкъ ит тIон тлъэкIыщт. Ау пандемием ебэныгъэныр джыри тыухыгъэп. Коронавирусыр къапыхьагъэу мафэ къэс республикэм щытэгъэунэфы. Зэпахырэ узым икоэффициенти зызэблехъу. Ащ къыхэкIыкIэ унэхэм тарысыным ирежим джыри лъэкIуатэ, анахьэу ар зыфэгъэхьыгъэр зыныбжь хэкIотагъэхэр арых. Чэщ-зымафэм къыкIоцI мы купым хэхьэрэ нэбгыри 9 сымэджэщым чIэфагъэх. Арышъ, оперативнэ штабым унашъоу ышIыхэрэм цIыфхэм мэхьанэшхо ратын, шапхъэхэр агъэцэкIэнхэ, гъунэгъу шъолъырхэм зэпахырэ узым зызэращиушъомбгъурэр къыдалъытэзэ сакъыныгъэ къызхагъэфэн фае, — къыхигъэщыгъ КъумпIыл Мурат.
АР-м и ЛIышъхьэ ипресс-къулыкъу.