ЦIыфхэр ригъэблэгъагъэх
АР-м и ЛIышъхьэу КъумпIыл Мурат Урысые Федерацием и Президентэу Владимир Путиным ипшъэрылъкIэ ащ иприемнэу Адыгеим щыIэм цIыфхэр тыгъуасэ ригъэблэгъагъэх.
Iофтхьабзэм хэлэжьагъэх УФ-м и Президент и ЛIыкIоу Къыблэ Федеральнэ шъолъырым щыIэм иаппарат иинспектор шъхьаIэу Сергей Дрокиныр, АР-м ипрокурор шъхьаIэу Игорь Шевченкэр, гъэсэныгъэмрэ шIэныгъэмрэкIэ министрэу КIэрэщэ Анзаур, IофшIэнымкIэ ыкIи социальнэ хэхъоныгъэмкIэ министрэу Мырзэ Джанбэч.
Республикэм ипащэ иприем къэкIогъагъ къуаджэу Кощхьаблэ щыщ пенсионер бзылъфыгъэ. Мы районым ит селоу Натырбовым дэт еджапIэу N-у 8-м материальнэ-техническэ щыкIагъэу иIэхэр ары зыгъэгумэкIырэр. Ар гъэсэныгъэ зыщарагъэгъотырэ учреждение анахь инэу муниципальнэ образованием итхэм ащыщ, нэбгырэ 400 фэдиз кIэлэеджакIоу чIэс, кIэлэегъэджэ 65-мэ Iоф щашIэ.
АР-м гъэсэныгъэмрэ шIэныгъэмрэкIэ иминистрэ зэрэщигъэгъозагъэхэмкIэ, лъэпкъ проектэу «Гъэсэныгъ» зыфиIорэм къыдыхэлъытагъэу илъэсыкIэ еджэгъоу къакIорэм ипэгъокIэу еджапIэм компьютер 30, ноутбуки 8, ахэм ягъусэн фаехэр, «интерактивнэ панелькIэ» заджэхэрэ доскэ къыфащэфыщтых. Ащ имызакъоу, кIэлэеджакIохэм гъэсэныгъэ тедзэ щызэрагъэгъотын амал яIэ хъущт. Урокхэр заухырэ ужым, техническэ, гуманитарнэ, цифрэ ыкIи нэмыкI лъэныкъохэм япрограммэхэмкIэ рагъэджэщтых.
КъумпIыл Мурат бзылъфыгъэм зыфигъазэзэ, лъэпкъ проектэу «Гъэсэныгъэм» республикэр чанэу зэрэхэлажьэрэр къыIуагъ.
— Гъэсэныгъэм исистемэ уахътэм къыздихьыгъэ амалэу иIэ пстэур къалэм щеджэхэрэми, къуаджэм щыпсэурэ кIэлэеджакIохэми зэфэдэу къызIэкIагъэхьашъуным лъэшэу тыпылъ. ГущыIэм пае, гурыт еджэпIэ 90-мэ цифрэ шIыкIэм техьан амал яIэ тшIыгъэ. Ащ изакъоу сомэ миллион 200 фэдиз пэIудгъэхьагъ, тапэкIи а Iофыр лъыдгъэкIотэщт. Цифрэм тиеджапIэхэр зытехьэхэкIэ зэкIэми зэфэдэу системэм ыгъэцак1эрэ фэIо-фашIэхэр къызIэкIагъэхьанхэ зэралъэкIыщтым Iо хэлъэп, — къыIуагъ республикэм ипащэ.
Нэужым Мыекъуапэ щыпсэурэ бзылъфыгъэу ЛIышъхьэм зыкъыфэзгъэзагъэр унэе щагу хъызмэт зэхищэмэ шIоигъоу IэпыIэгъу къыкIэлъэIугъ. Ишъхьэгъусэрэ ежьыррэ сабыитф зэдапIу, анахьыжъыр дзэм къулыкъу щихьынэу мыгъэ кIонэу щыт. Унагъом къуаджэу Мэфэхьаблэ унэ щешIы, ащ хъызмэтыри щагъэпсымэ ашIоигъу.
IофшIэнымкIэ ыкIи социальнэ хэхъоныгъэмкIэ министрэм къызэриIуагъэмкIэ, унагъоу зигъот макIэхэм къэралыгъо социальнэ IэпыIэгъу ятыгъэным фытегъэпсыхьэгъэ программэм къыхеубытэх. Социальнэ зэзэгъыныгъэу (социальный контракт) унагъом дашIыгъэм къыдыхэлъытагъэу унэе щагу хъызмэтым пае сомэ мин 80 ратыщт.
Iофтхьабзэм къыщыхэгъэщыгъэ хъугъэр мы программэм къыдыхэлъытагъэу зэшIуахыщтхэм апэIухьанэу бюджетым щагъэнафэщтыгъэ сомэ миллионрэ мин 900-р, АР-м и ЛIышъхьэ иунашъокIэ, сомэ миллиони 3-м зэрэнагъэсыгъэр ары. Социальнэ зэзэгъыныгъэ адашIыгъэу, унэгъо 22-мэ унэе щагу хъызмэт зэхащэным пае пстэумкIи сомэ миллионрэ мин 400-рэ аратыгъах.
Сабыибэ зэрыс унагъохэмкIэ ар IэпыIэгъушхоу зэрэщытыр республикэм ипащэ къыкIигъэтхъыгъ.
— Ежь иунэе Iоф зэхэзыщэ е ыгъэпсыгъэм зезгъэушъомбгъу зышIоигъоу, гъэпцIагъэ хэмылъэу ыкIуачIэкIэ лажьэхэрэм тадеIэнэу сыдигъокIи тыхьазыр. Унагъоу ялъфыгъэхэр ны-тыхэм адеIэнхэу, къотэгъу афэхъунхэу, яцIыкIугъом къыщегъэжьагъэу Iофэу ашIэрэм рыгушхонхэу зыщарагъэшIагъэр нэмыкIхэмкIэ щысэ хъун фае, — къыIуагъ КъумпIыл Мурат бзылъфыгъэм зыфигъазэзэ.
АР-м и ЛIышъхьэ ипресс-къулыкъу.