Ошъум зэрарышхо къафихьыгъ
Адыгеим ишъолъыр ошъу зыхэт ощхышхоу, жьыбгъэ лъэшэу щыIагъэхэм цIыфхэм зэрарышхо къафихьыгъ. Анахьэу ыгъэфыкъуагъэр Красногвардейскэ районыр (къуаджэу Хьатикъуай) ары.
Мыщ мэкъуогъум и 17-м, пчыхьэм кIэнкIэм фэдизэу къыщехыгъэ ошъум цIыф псэупIэхэм ыкIи социальнэ псэуалъэхэм яунашъхьэхэр, автомобильхэр, хэтэрыкIхэр зэхикъутагъэх. ЦIыф хэкIодагъэп.
Красногвардейскэ район администрацием къызэритыгъэмкIэ, Хьатикъуае дэт унэ 642-р ошъум зэщигъэкъуагъэх. Джащ фэдэу къоджэ псэупIэм иадминистарцие зычIэт унэри, кIэлэцIыкIу IыгъыпIитIуми ашъхьэ зэхикъутагъ. Зэхащэгъэ комиссием мы уахътэм ошъум зэрарэу къыхьыгъэр зыфэдизыр ыкIи чIэнагъэу ашIыгъэр къелъытэ.
Шъугу къэдгъэкIыжьын, икIыгъэ тхьамафэм тишъолъыр мыщ фэдэ ошIэ-дэмышIагъэ чIыпIэ-чIыпIэу ащыIагъ. Ау ошъур зэрэмыиныгъэм ишIуагъэкIэ псэупIэхэр ыгъэфыкъуагъэхэп, ау чъыгхэр ыкIи хэтэрыкIхэр зэхиубэтагъэх. Ошъум пэшIуекIорэ къулыкъум ишIуагъэкIэ Мыекъопэ, Джэджэ, Кощхьэблэ районхэр ащ щаухъумэнхэ алъэкIыгъ.
Адыгэ Республикэм и ЛIышъхьэу КъумпIыл Мурат ошъум зэрарышхо зэрихыгъэ Красногвардейскэ районым ит къуджэу Хьатикъуае тыгъуасэ щыIагъ. Iофхэм язытет зыщигъэгъозагъ, цIыфхэм гущыIэгъу афэхъугъ.
ОшIэ-дэмышIагъэм гумэкIыгъоу къыздихьыгъэхэр псынкIэу дэгъэзыжьыгъэнхэ, цIыфхэм IэпыIэгъу афэхъугъэн зэрэфаер республикэм ипащэ хигъэунэфыкIыгъ, ащкIэ район администрацием ыкIи ащ фэгъэзэгъэ къулыкъухэм пшъэрылъхэр афишIыгъэх.