Урысые Федерацием и Президентэу Владимир Путиным Къэралыгъо корпорациеу «Росатомым» игенеральнэ директорэу Алексей Лихачевым мэкъуогъум и 17-м зэIукIэгъу дыриIагъ. Къэралыгъом ипащэ ипресс-къулыкъу ащкIэ макъэ къыгъэIугъ.

Къэралыгъо корпорацием ипащэ компанием иIофхэр зэрэзэпыфэхэрэм, проекты­шхохэр зэрагъэцакIэхэрэм, урысые атом промышленностым иIофхэм язытет афэгъэхьыгъэу Президентым къыфиIотагъ. Джащ фэдэу Алексей Лихачевым Адыгэ электростанцием игугъуи Владимир Путиным фишIыгъ.

— ХэгъэгумкIэ ветропарк анахь иныр – мегаватти 150-рэ зилъэшыгъэ Адыгэ электростанциеу жьыкIэ Iоф зышIэрэр жъоныгъуакIэм и 1-м ттIупщыгъэ. Джыри Ставропольем ащ фэдэу зы щыдгъэпсыщт. Ари джырэ шапхъэхэм адиштэщт, — хигъэунэфыкIыгъ Алексей Лихачевым.

Шъугу къэтэгъэкIыжьы жьыкIэ Iоф зышIэрэ Адыгэ электростанциер АО-у «НоваВинд» — Къэралыгъо корпорациеу «Рос­атомым» идивизион зэригъэ­псыгъэр. Адыгэ РеспубликэмкIэ Шэуджэн, Джэджэ районхэм ягъунапкъэ ар щашIыгъ. Мегаватти 2,5-рэ зырыз зилъэшыгъэ энергетическэ пкъыгъо 60 электростанцием хэхьэ. Илъэсым къыкIоцI электроэнергиеу киловатт/сыхьат миллион 354-рэ ащ къытынэу къырадзэ.

«Республикэр зыфыщыкIэрэ электроэнергием ипроцент 20-р мы проектым къыригъэкъу­жьыщт. Адыгеим иэкономикэ хэхъоныгъэ езыгъэшIыщт, инвестициехэр къыхязыгъэлъхьащт амалхэм ар зэу ащыщ», — хигъэунэфыкIыгъагъ тапэкIэ Адыгеим и ЛIышъхьэ электростанцием зэкIом.

«Россети ФСК ЕЭС»-м мегаватти 150-рэ зилъэшыгъэ Адыгэ электростанциер мэкъуогъум электрическэ сеть зыкIым пишIагъ. IофшIэнхэм сомэ миллион 650,7-рэ апэIухьагъ.