АдыгеимкIэ мы илъэсым гурыт еджапIэр нэбгырэ 1814-мэ къау­хы. Ау аттестатыр къаратынымкIэ урысыбзэмрэкIэ ыкIи хьисапымрэкIэ зэтыгъо къэралыгъо ушэтыныр мыгъэ зэрамытыщтым къыхэкIэу экзамен зытынэу фаер нэбгырэ 1656-рэ.

ЕГЭ-р зэхэщэгъэнымкIэ рес­публикэ бюджетым сомэ миллиони 9,7-м ехъу къыхагъэ­кIыгъ. Ушэтынхэр затыщтыр бэдзэо­гъум и 3-м къыщегъэжьагъэу и 25-м нэс, мэфэ тедзэхэр – шышъ­хьэ­Iум и 3 – 8-р. Ащ нэбгырэ 1814-рэ хэлэжьэщт, 1660-р мы илъэсым еджа­пIэм къы­чIэкIы­гъэх. УрысыбзэмкIэ экзаменым еджэкIо нахьыбэ хэлэжьэщт – нэбгырэ 1587-рэ ыкIи мэфитIум къыкIоцI атыщт (бэ­дзэогъум и 6 – 7-м).

Мыгъэ ЕГЭ-м изэфэхьысыжьхэр аттестатым дэхьащт кIэуххэм яягъэ екIыщтэп. Апшъэрэ еджапIэм чIахьэ зышIоигъохэр ары экзаменыр зытыщтхэр. Нэбгыри 158-р апшъэрэ еджапIэм чIэхьанхэу фаехэп.

УрысыбзэмкIэ ушэтыным еджэкIо анахьыбэ хэлэжьэщт – нэбгырэ 1587-рэ. Ежь яшIоигъоныгъэкIэ атынэу къыхахыгъэ предметхэм ащыщэу общество­знаниер мыгъэ апэ ит – нэбгырэ 732-рэ. Ащ къыкIэлъэкIо хьисапыр (профильнэ шапхъэр) – еджэкIо 726-рэ.

– Мы илъэсым атынэу анахь макIэу къыхахыгъэ предметхэм ащыщых географиер, литературэр, информатикэр ыкIи IэкIыб къэралыгъуабзэхэр. СыдигъокIи ахэр еджапIэр къэзыуххэрэм япроцент нахь макIэм къыхахых, – къыIуагъ Адыгэ Республикэм гъэсэныгъэмрэ шIэныгъэмрэкIэ иминистрэу КIэрэщэ Анзаур.

ЗыкI къэралыгъо ушэтыныр адрэ илъэсхэм афэдэу зэрэзэ­хэщэгъэщтыр зэблахъугъэп, ау санитарнэ шапхъэхэр гъэлъэшыгъэу къыщыдыхалъытэщт.

ЕГЭ-р зэхэщэгъэнымкIэ рес­публикэ бюджетым сомэ миллиони 9,7-м ехъу къыхагъэ­кIыгъ. Ушэтынхэр затыщтыр бэдзэо­гъум и 3-м къыщегъэжьагъэу и 25-м нэс, мэфэ тедзэхэр – шышъхьэ­Iум и 3 – 8-р. Ащ нэбгырэ 1814-рэ хэлэжьэщт, 1660-р мы илъэсым еджапIэм къы­чIэкIыгъэх. УрысыбзэмкIэ экзаменым еджэкIо нахьыбэ хэлэжьэщт – нэбгырэ 1587-рэ ыкIи мэфитIум къыкIоцI атыщт (бэ­дзэогъум и 6 – 7-м).

Ащ нэмыкIэу экзаменхэр зыщатыщтхэ чIыпIэхэр мыгъэ нахьыбэ ашIыгъ (10). Аудиториехэм яинагъэ елъытыгъэу нэбгыри 9 – 12 нахьыбэ ачIагъэтIысхьащтхэп. Маскэхэр, Iалъэ­хэр, дезинфекцие зэрашIыхэрэр къащэфых. ЧIэхьагъухэм аIутыщтхэ медицинэ IофышIэхэр санитарнэ шапхъэхэм алъыплъэщтых: апкъышъол мэплъымэ ашыщт, пэтхъу-Iутхъум инэшанэ яIэмэ ауплъэкIущт.

ЦIыфхэм ялъэIухэм къапкъырыкIызэ, Адыгеим и ЛIышъхьэу КъумпIыл Мурат ушэтынхэр зыщатыщт аудиториехэм къэзгъэучъыIырэ системэхэр чIарегъэуцох.

Непэ Iофхэм язытет елъытыгъэу мы илъэсым ушэтынхэр зытыхэрэр нэмыкI муниципалитетхэм жъугъэу агъэкIонхэр шапхъэм къыдыхэлъытагъэп. Ащ дакIоу, мыщ фэдэ чIыпIэхэр зимыIэхэ Теуцожь ыкIи Шэуджэн районхэм якIэлэеджакIохэм ЕГЭ-р атыным фэшI Адыгэ­къалэрэ станицэу Джаджэмрэ ащэщтых. ЕджэпIэ автобусхэмкIэ пунктхэм къаращэлIэщтых, водительхэр ауплъэкIущтых, салонхэр дезинфекцие ашIыщтых. Джащ фэдэу ны-тыхэм яунэе автотранспорт мы уахътэм агъэ­федэмэ хъущт.

ЕГЭ-м итын зэхэщагъэ зэрэ­хъурэм лъыплъакIохэм анаIэ тырагъэтыщт, зыхэр ушэтынхэр зыщыкIорэ чIыпIэхэм ащыIэщтых, адрэхэм – онлайн шIыкIэм тетэу япшъэрылъхэр агъэцэкIэщт.

Ушэтынхэр зыщатыщтхэ чIыпIэхэм рэхьатныгъэр ыкIи общественнэ щынэгъончъагъэр къащыухъумэгъэным къулыкъу­шIэхэр фэхьазырых.

Iэшъынэ Сусан.