ФэIо-фашIэхэр зэрагъэцэкIагъэр щынэгъончъэным ишапхъэхэм зэрадимыштэрэм къыхэкIэу ыкIи хъугъэ-шIагъэм бзылъфыгъэр зэрэхэкIодагъэм епхыгъэу Мыекъуапэ уголовнэ Iоф къыщызэIуахыгъ.

Урысыем и Следственнэ комитет иследственнэ ГъэIорышIапIэу Адыгеим щыIэм мыщ ыпкъ къикIэу илъэс 78-рэ зыныбжь бзылъфыгъэм идунай зэрихъожьыгъэмкIэ уголовнэ Iоф къызэIуихыгъ.

Следствием зэригъэунэфыгъэмкIэ, 2020-рэ илъэсым мэкъуо­гъум и 17-м Мыекъуапэ иурамэу Чкаловым ыцIэ зыхьырэм тет уцупIэу общественнэ транспортыр къызэкIуалIэрэм илъэс 78-рэ зыныбжь бзылъфыгъэр, джащ фэдэу илъэс 21-рэ зыныбжь пшъашъэр ыкIи зыныбжь имыкъугъэр тетыгъэх. Ом изытет къызэIыхьи, жьыбгъэшхо къызелъым, щынэгъончъэным ишапхъэхэм адимыштэу уцупIэм тетыгъэ павильоныр зэрагъэ­уцугъэм къыхэкIэу, гъучIкIэ шIыгъэр зыпытым къытIупщи, къэукIорэигъ. А чIыпIэм щытыгъэ бзылъфыгъэ хэкIотагъэм пкъыгъор къытефи, шъобжэу тещагъэхэм апкъ къикIэу идунай ыхъожьыгъ. Мы чIыпIэм къэсыгъэ врачхэм илъэс 21-рэ зыныбжь пшъашъэр сымэджэщым ащагъ. Зыныбжь имыкъугъэм ищыкIэгъэ IэпыIэгъур рагъэгъо­тыгъ. Мы уахътэм ар унэм ис.

Мы хъугъэ-шIагъэм лъапсэ фэхъугъэр следствием егъэунэфы, зэрар зэрихыгъэхэм адэгущыIэх, джащ фэдэу мы чIыпIэм рихьылIагъэхэм яупчIых. Ащ нэмыкIэу хьыкум ыкIи техническэ уплъэкIунхэр ашIых. УцупIэр ауплъэкIунэу ыкIи ар шапхъэ­хэм адиштэу агъэцэкIэжьынымкIэ къэлэ администрациемрэ лъыплъэн къулыкъухэмрэ следствием письмэхэмкIэ зафигъэзагъ. Уголовнэ Iофым изэхэфын лъэкIуатэ.

КIАРЭ Фатим.