УФ-м и Правительствэ иунашъоу мэкъуогъум и 16-м къыдэкIыгъэм къызэрэщыдэлъытагъэм тетэу, Адыгеим социальнэ-экономическэ хэхъоныгъэхэр ышIынхэм фытегъэпсыхьэгъэ унэе программэм къыщыдэлъытагъэхэм ягъэцэкIэн пае федеральнэ бюджетым къыхэхыгъэу мылъку къыфэкIощт.

2020-рэ илъэс бюджетым, 2021 — 2022-мкIэ агъэнэфагъэ­хэм зэхъокIыныгъэхэр афэшIыгъэнхэу, а уахътэм илъэс къэс сомэ миллиардкIэ бюджетыр нахьыбэ шIыгъэнэу, УФ-м икъэ­ралыгъо программэу «Экономическое развитие и инновационная экономика» зыфиIорэм къыды­хэлъытагъэу Адыгеим социальнэ-экономическэ хэхъоныгъэхэр егъэшIыгъэнхэм фэшI субсидие фигъэкIоным пае УФ-м мэкъу-мэщымкIэ и Министерствэ ар етыгъэнэу унашъом къыщеIо.

2020 — 2024-рэ илъэсхэм ате­лъы­тэгъэ унэе программэу Адыгеим социальнэ-экономическэ хэхъоныгъэхэр егъэшIыгъэн­хэм фытегъэпсыхьагъэр мэлылъфэгъу мазэм аштагъ ыкIи УФ-м и Правительствэ ипащэу Михаил Мишустиныр кIэтхэжьыгъ. Ащ къыщыдэлъытэгъэ Iофтхьабзэхэм япхырыщын пае илъэситфым федеральнэ бюджетым къыхэхыгъэу сомэ миллиарди 5 республикэм къыфэкIощт.

Правительствэм иунашъокIэ 2020 — 2022-м илъэс къэс сомэ миллиард къатIупщынэу федеральнэ бюджетым къыщыдэ­лъытагъ. АР-м и ЛIышъхьэу КъумпIыл Мурат къызэриIуа­гъэмкIэ, ахъщэр зыпэIухьащтыр гъэнэфэгъахэу щыт. ПстэумкIи Iофтхьэбзэ 30 агъэнэфагъэр. Ащ щыщэу 2020-рэ ыкIи 2021-рэ илъэсхэм проект инхэу 12 пхыращын гухэлъ яI. Социальнэ мэхьанэ зиIэ псэуалъэхэри ахэм ащыщых.

Мылъкоу къакIорэр гъэстыныпхъэ шхъуантIэр зэбгырызытIупщырэ станциеу поселкэу Краснооктябрьскэм дэтым, станицэу Дахъом икIэу бгы сэтхэу Лэгъо-Накъэ кIорэ автомобиль гъогум ягъэкIэжьын, бэнэнымкIэ спорт еджапIэм иинфраструктурэ игъэпсын, кIэ­лэцIыкIу поликлиникэр, медицинскэ реабилитационнэ гупчэр, цэхэм зыщяIазэхэрэ поликлиникэр, лабораториеу ахэр зыщашIыхэрэр зычIэтыщтхэ унэхэм яшIын апэIуагъэхьащт. Джащ фэдэу поселкэхэу Инэмрэ Яблоновскэмрэ культурэм епхыгъэ псэуалъэу адэтхэр агъэкIэжьыщтых, Пушкиным ыцIэ зыхьырэ народнэ Унэм игъэцэкIэжьын лъагъэкIотэщт, псыхъоу Шъхьэгуащэ инэпкъэу Мыекъуапэ зэпызычыхэрэр агъэпытэщтых. Программэм къыдыхэлъытагъэ­хэр пхырыщыгъэнхэм пае гъогу картэр агъэпсыгъ ыкIи УФ-м мэкъу-мэщымкIэ и Министерствэ ар щаштагъ, IофшIэнхэм ягъэцэкIэн фэгъэзэгъэщтхэр, пшъэдэкIыжь зыхьыщтхэр агъэ­нэфагъэх.

Ащ ыпэкIэ АР-м и ЛIышъхьэу КъумпIыл Мурат программэм къыщыдэлъытагъэхэр игъом ыкIи икъоу пхырыщыгъэнхэм ищыкIагъэр хэзыгъэ имыIэу зэшIуа­хынэу пшъэрылъ къышIыгъ.

— Республикэм охътэ кIэкIым социальнэ-экономическэ хэхъоныгъэ­хэр ышIынхэмкIэ, инвестициеу къыхалъхьэрэр нахьыбэ хъунымкIэ мы программэр мэхьанэшхо зиIэ IэпыIэгъу тедзэу щыт. Субъектым иIофыгъохэр дэгъэзыжьыгъэнхэм, цIыфхэм ящыIакIэ нахьышIу хъуным ар фэIорышIэщт, — къыIуагъ республикэм ипащэ.

Промышленностым, мэкъу­мэщ хъызмэтым хэхъоныгъэхэр ягъэшIыгъэнхэм, бизнес цIыкIум ыкIи гурытым, кооперацием заушъомбгъуным пае амалы­шIухэр ятыгъэнхэм, инфраструктурэм ылъэныкъокIэ щыкIагъэ­хэр дэгъэзыжьыгъэнхэм, цIыф­хэм щыIэкIэ тэрэз яIэ хъуным фытегъэпсыхьагъэу программэм къыщыдэлъытэгъэ Iофтхьабзэхэм япхырыщынкIэ УФ-м и Правительствэ къытIупщырэ ахъщэр IэпыIэгъушхо хъущт.

Унэе программэм ишIуагъэкIэ республикэм имылъку шъхьаIэ инвестициеу къыхалъхьэрэр, зы нэбгырэм телъытагъэмэ, сомэ мин 70,9-м нэсыщт, цIыфхэм гъотэу яIэр, гурытымкIэ лъытагъэу, сомэ мин 42,6-рэ хъущт, узэрэпсэун плъэкIыщт ахъщэ анахь макIэм зигъот нэмысыхэрэм япчъагъэ къыщыкIэщт.

АР-м и ЛIышъхьэ ипресс-къулыкъу.