Волонтерхэм яIэпыIэгъущт зэхъокIыныгъэхэр
Конституцием зэхъокIыныгъэу фашIынэу агъэнэфагъэхэм ащыщ волонтер движением IэпыIэгъу фэхъугъэныр. Ащ епхыгъэ тхыгъэр статьяу 114-м ит.
Добровольчествэр граждан обществэм иIэубытыпI. Аужырэ илъэсхэм волонтер движениемрэ къэралыгъомрэ зэгъусэхэу зэрэзэдэлажьэхэрэр тинэрылъэгъу. Мы лъэныкъом хэхъоныгъэхэр ышIынхэм, къыхэлажьэхэрэм япчъагъэ нахьыбэ хъуным хэбзэ къулыкъухэм Iоф дашIэ.
— Непэрэ мафэм волонтерхэм Урысыем чIыпIэшхо щаубыты. Сыд фэдэ Iофтхьабзэ, акцие зэхамыщагъэми, волонтерхэр зэхэщакIохэм яIэпыIэгъух. Нэжъ-Iужъхэм яшIуагъэ арагъэкIыным, сабыеу кIодыгъэхэм якъэгъотыжьын хэлэжьэнхэм, чIыопсым икъэухъумэн фэбэнэнхэм, нэмыкI лъэныкъохэмкIи волонтерхэр сыдигъуи яшIуагъэ къагъэкIоным фэхьазырых, — къытфеIуатэ добровольческэ купым илъэс пчъагъэ хъугъэу хэт Мэлгощ Хъалидэ. — Непэрэ мафэм тикъэралыгъо волонтер миллионым ехъу ис. Ахэм мафэ къэс яшIуагъэ къызэрагъэкIощтым пылъых. Сэри ахэм сащыщ. Гурыт еджапIэм, районым, республикэм щызэхащэрэ Iофтхьабзэхэм чанэу сахэлажьэ, цIыфхэм IэпыIэгъу сафэхъуным сыпылъ. «Конституцием иволонтерхэр» зыфиIорэм джырэ уахътэ сыхэт. УФ-м и Конституцие зэхъокIыныгъэу фашIыщтхэр зыфэдэхэр цIыфхэм нахь къагурыIоным, упчIэу къэуцухэрэм джэуапхэр яттыжьынхэм тыфэхьазыр.
Конституцием ия 114-рэ статья зэхъокIыныгъэхэр фэшIыгъэнхэм фэгъэхьыгъэ гукъэкIыр зыер «ТекIоныгъэм иволонтерхэр» зыфиIорэ Урысые общественнэ движением ипащэу Ольга Амельченковар ары.
— Конституцием мыщ фэдэ зэхъокIыныгъэ иIэ зыхъукIэ, къэралыгъор волонтерхэм нахьыбэрэ IэпыIэгъу къафэхъущт, — къыIуагъ Ольга Амельченковам.
Гъонэжьыкъо Сэтэнай.