Бизнес цIыкIумрэ гурытымрэ ахэхьэрэ субъектхэм ахъщэ IэпыIэгъу ягъэгъотыгъэным кредитнэ учреждениехэр ыкIи ахъщэ чIыфэ мыинхэр язытыхэрэ компаниехэр къыхагъэлажьэх.

Адыгэ Республикэм экономикэ хэхъоныгъэмкIэ ыкIи сатыумкIэ иминистрэу Геннадий Митрофановым къызэриIуа­гъэмкIэ, мы илъэсым мэкъуогъум и 5-м ехъулIэу тишъолъыр ибизнес зэфэшъхьафхэм ахэ­хьэрэ субъект 208-мэ пстэумкIи сомэ миллиардрэ миллион 57-рэ аратыгъ.

Федеральнэ программэхэм къадыхэлъытагъэу, бизнес цIыкIумрэ гурытымрэ ясубъектхэм яIофышIэхэм лэжьапкIэ аратынымкIэ процент зытемыхъорэ ахъщэ чIыфэхэр аратыгъэх, кредитэу ателъхэр зэрапщыныжьыщт пIалъэр къафалъы­тэжьыгъ, ахъщэу техъуагъэу атыгъэхэр къафызэкIагъэкIо­жьынхэм яIофыгъо мы уахътэм хэплъэх.

Бизнес зэфэшъхьафхэм ахэхьэрэ субъектхэм яIофшIэн рагъэжьэжьынымкIэ федеральнэ IэпыIэгъоу щыIэхэм проценти 2 нахь зытемыхъорэ кредитнэ программэр хагъэхьагъ. Ащ фэдэ IэпыIэгъур зищыкIагъэу тишъолъыркIэ субъект 5440-мэ зыкъагъэлъэгъуагъ. Адыгэ Рес­публикэм предпринимательствэм IэпыIэгъу фэхъугъэнымкIэ и Фонд ахъщэ чIыфэ мыинхэу 15 аритыгъ. Бизнес цIыкIумрэ гурытымрэ ясубъект 20-мэ атыжьырэ ахъщэ чIыфэм ипIалъэ афызэкIахьагъ. Ащ нэмыкIэу, Гупчэу «Мой бизнес» зыфиIорэр япродукцие IуагъэкIынымкIэ IэпыIэгъу къафэхъу.

Iэшъынэ Сусан.