Бзылъфыгъэр агъэмысэ
УФ-м и Следственнэ Комитет имежрайон отделэу Тэхъутэмыкъое районым щыIэм щынэгъончъэнымкIэ федеральнэ къулыкъум АдыгеимкIэ и ГъэIорышIапIэ къытыгъэ материалымкIэ илъэс 65-рэ зыныбжь бзылъфыгъэм ылъэныкъокIэ уголовнэ Iоф къызэIуихыгъ. ГъэпцIагъэ зыхэлъ бзэджэшIэгъэ ин зэрэзэрихьагъэмкIэ бзылъфыгъэр агъэмысэ.
Следствием зэригъэунэфыгъэмкIэ, 2016-рэ илъэсым чъэпыогъум Бжыхьэкъоежъ къоджэ псэупIэм ичIыгу Iахь къызIэкIигъахьэ шIоигъоу илъэс 65-рэ зыныбжь бзылъфыгъэм идокументхэр Тэхъутэмыкъое район администрацием ритыгъэх. Бэджэндэу ыIыгъ чIыгу Iахьым мэкъумэщ продукциер зычIилъхьан ылъэкIыщт склад дыхэтэу къыгъэлъэгъуагъ. Нэужым ар нэпцIэу къычIэкIыгъ.
— Лажьэ зиIэу зэгуцафэхэрэм псэуалъэр ыгъэфедэн, гъэцэкIэжьын дэгъухэр ришIылIэнхэ ылъэкIынэу Iизын къырати, ар зытыраригъэтхагъ. Нэужым гъэпцIагъэ зэрихьан гухэлъ иIэу щымыIэ псэуалъэм итхылъ нэпцIхэр къоджэ администрацием ритыгъэх ыкIи щэн-щэфын зэзэгъыныгъэ дишIыгъ. Ащ къыкIэлъыкIоу 2016-рэ илъэсым мэкъуогъум квадратнэ метрэ мин 12-м ехъу чIыгу Iахьэу Тэхъутэмыкъое районым щыIэр ежь иеу Росреестрэм щитхыгъ, — къеты УФ-м и Следственнэ Комитет иследственнэ ГъэIорышIапIэу АР-м щыIэм ипресс-къулыкъу.
Хэбзэнчъэу зекIуи, ежь ифедэ хэлъэу чIыгу Iахь бзылъфыгъэм къызэрэзIэкIигъэхьагъэмкIэ Бжыхьэкъоежъ къоджэ псэупIэм зэрарэу сомэ миллиони 2,3-рэ ригъэшIыгъ.
МыщкIэ къызэIуахыгъэ уголовнэ Iофым гъунэ лъефы щынэгъончъэнымкIэ федеральнэ къулыкъум АдыгеимкIэ и ГъэIорышIапIэ икъутамэу Адыгэкъалэ щыIэм.
Мы мафэхэм следственнэ ыкIи оперативнэ IофшIэнхэр зэрахьэх, мы бзэджэшIагъэм нэмыкIэу хэщагъэхэр зэрагъашIэх. Уголовнэ Iофым изэхэфын лъагъэкIуатэ.
КIАРЭ Фатим.