Медицинэм иIофышIэ и Мафэ ипэгъокIэу АР-м и ЛIышъхьэу КъумпIыл Мурат псауныгъэм икъэухъумэнкIэ республикэм исистемэ иIофхэм зыщатегущыIэгъэхэ зэхэсыгъо пэIудзыгъэ шIыкIэм тетэу зэхищэгъагъ.

АР-м и Премьер-министрэ игуадзэу Наталья Широковар, псауныгъэм икъэу­хъумэнкIэ министрэу Мэрэтыкъо Рустем, шIокI зимыIэ медицинэ страхованиемкIэ ЧIыпIэ фондым ипащэу Людмила Ялинар, медицинэм иучреждениехэм яврач шъхьаIэхэр, профсоюз ыкIи общественнэ организациехэм ялIыкIохэр ащ хэлэжьагъэх.

Республикэм ипащэ зэхэсыгъор къы­зэIуихызэ, пстэумэ апэу медицинэм иIофышIэхэм япрофессиональнэ мэфэ­кIэу къэблагъэрэм пае къафэгу­шIуагъ, зэпахырэ узэу дунаир зэлъызыкIугъэм къиныгъуабэ къыздихьыгъэ нахь мышIэми, зэгурыIохэу, аIэ зэкIэдзагъэу Iоф зэрашIэрэм пае къызэрафэразэм къыкIигъэтхъыгъ.

— Псауныгъэм икъэ­ухъумэнкIэ республикэ системэм мы аужырэ мэзищыр ушэтыпIэ фэхъугъ, — къыIуагъ Адыгэ Республикэм и ЛIышъхьэ. — Медицинэм иIофышIэу, сымаджэхэм ящыIэныгъэ, япсауныгъэ зэрафэбанэхэрэм имызакъоу, ежьхэм ящынэгъончъагъэ лъыплъэн фаеу хъугъэхэр, зигупсэхэр охътабэм къыкIоцI зымылъэгъухэрэр анахь къин хэтых. Арэу щытми, врачхэм, медсестрахэм япсэемыблэ­жьыгъэ ишIуагъэкIэ цIыфхэм япсауныгъэ зэтеуцожьы. Шъуи­пшъэрылъхэр хэзыгъэ имыIэу зэрэжъугъэцакIэхэрэм, непэ Iофышхоу шъушIэрэм апае «тхьашъуе­гъэпсэу» къышъотэIо.

АР-м псауныгъэм икъэ­ухъумэнкIэ иминистрэу Мэрэтыкъо Рустем коронавирусым пэшIуекIорэ Iофэу зэшIуа­хыхэрэм игъэкIотыгъэу къатегущыIагъ. Ащ дакIоу медицинэм епхыгъэ организациеу зэфэшIыгъагъэхэм яIофшIэн зэрэзэтырагъэуцожьыщтым иплан зэрэзэхагъэуцуагъэр, Роспотребнадзорым АР-мкIэ и ГъэIорышIапIэ ар зэриштагъэр къыIуагъ.

Мы уахътэм санитарнэ шапхъэхэр гъэлъэшыгъэу щагъэцакIэзэ Адыгэ рес­публикэ сымэджэщым епхыгъэ диагностическэ Гупчэм Iоф ешIэ. Эпидемиологием ылъэныкъокIэ пстэури нахь зэтеуцожьмэ, поликлиникэхэми цIыфхэр рагъэблэгъэнхэу, зищыкIагъэхэр сымэ­джэщхэм ачIагъэгъолъхьанхэу рагъэжьэ­жьыщт.

КъумпIыл Мурат медицинэм иучреждениехэр къызэIуахыжьхэмэ ахэм санитарнэ шап­хъэхэр хэзыгъэ имыIэу агъэ­цэкIэнхэм лъыплъэнхэу псауныгъэм икъэу­хъумэнкIэ министерствэм къыфигъэпытагъ.

— ЦIыфхэм вирусыр къызэ­ряуалIэрэр джыри къэуцугъэп, ау тызщяIэ­зэщтыри, оборудованиеу, уц Iэзэгъоу ищыкIа­гъэхэри икъоу тиIэх. Ахэм Iоф ащызышIэщт специалистхэри хьазырых. Республикэр игъо­рыгъоу нахьыпэкIэ иIэгъэ щыIакIэм техьажьы, медицинэм иучреждениехэми Iоф зэрашIэщтыгъэм къыфагъэзэжьы, — къыIуагъ КъумпIыл Мурат.

Зэпахырэ узым зызэ­риу­шъом­бгъу­рэм ыпкъ къикIыкIэ, цIыфхэм яфэIо-фашIэу амыгъэцэкIагъэхэм къафагъэ­зэ­жьынэу, сымэджэщхэм ачIа­фэхэрэм япсауныгъэ изэте­гъэу­цожьын, ягъэшхэн нахьыбэу анаIэ атырагъэтынэу къа­фигъэпытагъ.

Джащ фэдэу цIыфэу за­къыфэзгъа­зэхэрэм, Урысые политическэ партиеу «Единая Россия» зыфиIорэм и Общественнэ приемнэ екIуалIэхэрэри ахэтхэу, ялъэIу афэгъэцэкIэгъэным, гумэкIыгъоу яIэр дэгъэ­зыжьыгъэным ыуж итынхэу, нэбгырэ пэпчъ анаIэ тырагъэтынэу къа­риIуагъ.

Нэужым ащ фэдэу зыкъы­фэзгъэзагъэ­хэм ащыщхэм ягугъу къышIыгъ. Пшъэ­рылъхэр гъэцэкIагъэ зэрэхъухэрэм зэрэ­лъыплъэжьыхэрэр щысэхэмкIэ къыушыхьатыгъ. ЦIыфхэм тхьаусыхэу яIэхэм ядэгъэзыжьын игъом ыуж уихьаным, сыма­джэхэм язытет, зэряIазэхэрэр яIахьыл-гупсэхэм алъыгъэIэсыгъэным мэхьэнэ ин зэряIэм республикэм ипащэ къыкIигъэтхъыгъ.

Коронавирусыр къызэолIагъэ­хэм Iоф адэзышIэрэ врачхэм IофшIэгъу ужым акIуачIэ зэтырагъэуцожьыным, загъэ­псэ­фыным, игъом ахэр зэбла­хъунхэм анаIэ тырагъэтынэу псауныгъэм икъэу­хъумэнкIэ министерствэм къыфигъэпы­тагъ. Мыекъопэ къэралыгъо технологическэ университетым имедицинэ ин­ститут ыкIи колледжым кадрэхэр зэращагъэ­хьазырхэрэм фэгъэхьыгъэ пшъэрылъ гъэнэфагъэхэри ЛIышъхьэм къышIыгъэх.

Адыгэ Республикэм и ЛIышъхьэ ипресс-къулыкъу.