Мыекъуапэ къэзыухьащт автомобиль гъогоу ашIырэм изы чIыпIэ дэжь непэ археологическэ IофшIэнхэр щэкIох. Ащ фэдэ къэбар къыригъэхьагъ инстаграмым нэкIубгъоу щыриIэм Адыгэ Республикэм и ЛIышъхьэу КъумпIыл Мурат.

Республикэм икъэлэ шъхьаIэ къэзыухьащт автомобиль гъогум (ятIонэрэ едзыгъом къыдыхэ­лъытагъэу) дэжь щыкIорэ археологическэ IофшIэнхэр зэрэлъы­кIуатэхэрэр специа­листхэм ауплъэкIугъ. Джырэ уахътэм ехъулIэу IошъхьитIумэ (Советский — 30, Советский — 31) ушэтынхэр ащаухыгъэх, псэупIитIумэ IофшIэнхэр ащэ­кIох.

Археологхэм зэралъытэрэмкIэ, тиэрэ ыпэкIэ я 6 — 5-рэ лIэшIэгъухэм меотхэм япсэупIэрэ Iуашъхьэрэ мы чIыпIэм щытыгъэх. ЧIычIэгъым къы­чIахыгъэх керамикэм, джэрзым хэшIыкIыгъэ пкъыгъохэр ыкIи артефактхэр. Ахэм къызэрагъэ­лъагъорэмкIэ, мы уахътэм псэущтыгъэхэм гъучI пкъыгъо зэфэшъхьафхэр къыдагъэкIыщтыгъэх.

— Мыр IофшIэн къинэу щыт. ЗэрэтлъэгъурэмкIэ, IэкIэ зыщетIэгъэхэ чIыпIэр секторхэмкIэ зэтыраутыгъ, специалистхэм ахэр ауплъэкIузэ тилъэпкъ итарихъ къытфа­Iуатэ, къытфызэIуахы. Iоф­шIэнхэр заухырэ нэуж къагъо­тыгъэ пкъыгъохэр респуб­ликэм къинэжьыщтых, Адыгеим и Лъэпкъ музей чIэ­­- лъы­щтых, — къыхигъэщыгъ КъумпIыл Мурат. (Тикорр.).