Илъэс къэс мэкъуогъум и 22-м Iофтхьабзэу «ШIэжьым ишэф остыгъ» зыфиIорэм къыдыхэлъытагъэу зэрэ Урысыеу чэщым шэф остыгъэхэр щыхагъанэх. Хэгъэгу зэошхом итхьамыкIэгъо мафэхэр зэпызычыгъэхэм, ащ щыфэхыгъэхэм, псаоу къэнагъэхэм яшIэжь мыр фэгъэхьыгъ.

Пандемием ыпкъ къикIыкIэ «ШIэжьым ишэф остыгъэ» мыгъэ онлайн шIыкIэм тетэу мэкъуогъум и 8-м къыщегъэжьагъэу и 22-м нэс рекIокIы. Мыр зекIокIэ дахэу зэрэщытым имызакъоу, зы шэф остыгъэ пэпчъэу хагъэнэщтым зы сомэ ыуас, а ахъщэр Хэгъэгу зэо­шхом иветеранхэм ямедицинэ IэпыIэгъу пэIуагъэхьащт.

Урысые Федерацием и Президентэу Владимир Путиным иунашъокIэ мыгъэ шIэжьымрэ дзэ щытхъумрэ я Илъэсэу агъэ­нэфагъэм Iофтхьабзэу «ШIэжьым ишэф остыгъ» зыфиIорэр къыдыхэлъытагъ. Мурад шъхьаIэу ащ иIэр — Хэгъэгу зэошхом хэкIодэгъэ нэбгырэ миллион 27-м фэдиз шэф остыгъэ хэдгъэнэныр ыкIи ахэр тыгу къэдгъэкIыжьынхэр ары.

Iофтхьабзэм дегъэштэгъэным фэшI унэм исхэу шэф осты­гъэр хагъэнэн, зыфэшъыгъон зиIэхэм ясурэт аIыгъэу зытырахын социальнэ хъытыухэм е сайтэу «деньпамяти.рф» зыфиIорэм къарагъэхьанхэ алъэ­кIыщт.

Iэшъынэ Сусан.