Лъэпкъ проектхэм ягъэцэкIэн
АР-м и Къэралыгъо Совет — Хасэм и Тхьаматэу В. Нарожнэр хэлэжьагъ лъэпкъ проектхэм ягъэцэкIэн зыщытегущыIэгъэхэ зэхэсыгъом.
Министрэхэм я Кабинет изэхэсыгъоу видеоконференцие шIыкIэм тетэу кIуагъэр зэрищагъ АР-м и ЛIышъхьэу КъумпIыл Мурат.
Зэхэсыгъом къыщаIуагъ мы лъэхъаным республикэм лъэпкъ проект 50 зэрэщагъэцакIэрэр, ахэм зэкIэмкIи сомэ миллиарди 4-м ехъу апэIухьащт. Анахь гъэхъэгъэшIухэр къызыщылъэгъуагъэхэр лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIоу сомэ миллион 525,6-рэ зыпэIухьанэу щытыр ары. А мылъкумкIэ мы лъэхъаным Мыекъуапэ ыкIи поселкэу Яблоновскэм гъогухэр ащагъэцэкIэжьых, километрэ 36-рэ ашIыгъах.
— Пандемием ыпкъ къикIыкIэ къиныгъохэм тарехьылIэми, лъэпкъ проектхэм ягъэцэкIэн пшъэрылъ шъхьаIэу къэнэжьы. IофшIэнхэр гъэпсынкIэгъэнхэм, 2021-рэ илъэсым республикэм иэкономикэ мылъку хэгъэхъогъэным мэхьанэшхо яI, — къыIуагъ АР-м и ЛIышъхьэ.
Зэхэсыгъом хэлэжьагъэхэр проект гъэнэфагъэхэм ягъэцэкIэн зэрэкIорэм, ахэм апэIухьащт мылъкоу къатIупщыгъэр зэрагъэфедэрэм, хэбзэ къулыкъухэм яIофшIэн шIуагъэу къыхьырэм атегущыIагъэх. Республикэм и ЛIышъхьэ пстэуми анаIэ тыраригъэдзагъ лъэпкъ проектхэу «Гъэсэныгъэр», «Демографиер» зыфиIохэрэр игъом гъэцэкIэгъэнхэм, федеральнэ гупчэм Iоф дэшIэгъэным, ведомствэхэр нахь дэгъоу зэдэлэжьэнхэм, IофшIэнхэр зэрэкIохэрэр мониторинг шIыгъэнхэм мэхьанэшхо зэряIэм.
Джащ фэдэу зэхэсыгъом щытегущыIагъэх социальнэ-экономикэ хэхъоныгъэ Адыгэ Республикэм ышIыным фытегъэпсыхьэгъэ унэе программэу 2024-рэ илъэсым нэс телъытагъэм игъэцэкIэн. Мы программэм епхыгъэ Iофыгъохэм атегущыIэхэ зэхъум анахь анаIэ зытырагъэтыгъэхэм ащыщых гъогу картэхэр ыкIи проектхэм мылъку афэтIупщыгъэныр.
АР-м и Къэралыгъо Совет — Хасэм ипресс-къулыкъу