Унагъоу сабый къызэрыхъухьагъэхэр ПенсиехэмкIэ фондым емыкIуалIэхэу ны мылъкум исертификат афагъэпсынэу зырагъэжьагъэр мэлылъфэгъум и 15-м къыщыублагъ.

А уахътэм къыкIоцI Адыгеим щыпсэурэ унэгъуи 152-мэ тхылъыр къа­ратыгъ.

КIэлэцIыкIур къызэрэ­хъугъэм ПенсиехэмкIэ фондыр щызгъэгъуазэрэр ЗАГС-р ары. Нэужым кIэлэцIыкIумрэ ны-тыхэмрэ къэбарэу апылъыр ауплъэ­кIушъ, сертификатыр агъэпсы. Ным ар къызэрэте­фэрэр ыкIи зэрэхьазырыр «унэе кабинетэу» Пенсие­хэмкIэ фондым иинтернет нэкIубгъо щигъэпсыгъэм къыратхэ е къэралыгъо фэIо-фашIэхэм япорталкIэ къыфаIопщы.

КIэу джыри мыщ къы­хэхьагъэр сертификатыр джы электроннэ шIыкIэм тетэу къызэратырэр, на­хьы­пэрэм фэдэу тхьапэм зэрэтемытыжьыр ары. Ау ащ пае къэмынэу унагъом ищыкIагъэ хъумэ тхылъым икопие къыратыщт.

Шъугу къэдгъэкIыжьын, ны мылъкум къыщыдэлъы­тэгъэ ахъщэр унагъом псэу­кIэ амалэу иIэр нахьы­шIу шIыгъэным, кIэлэцIыкIум гъэсэныгъэ егъэгъотыгъэным, ным ипенсие игъэпсын пэIуигъэхьан фит. Джащ фэдэу ны мылъкум къыхэхыгъэ ахъщэ тын мазэ къэс къы­фэкIонэу ышIынэуи фитыныгъэ щыI.

2020-рэ илъэсэу тызы­хэтыр къызихьагъэм къыщыублагъэу ны мылъкур апэрэ сабыир къызфэхъугъэхэми къараты. Ащ къы­щыдэлъытэгъэ ахъщэр со­мэ 466617-рэ зэрэхъу­рэр. Мы илъэсым ищылэ мазэ и 1-м къыщегъэжьагъэу ятIонэрэ ыкIи ащ къыкIэлъыкIорэ сабый къызфэхъухэрэм ащ джыри сомэ 150000-рэ къа­фыхагъахъо.

Унагъом мыщ фэдэ IэпыIэгъу етыгъэным фэгъэ­хьыгъэ программэм 2026-рэ илъэсым нэс кIуачIэ иIэнэу ашIыгъ. Ащ итыгъэ­гъазэ и 31-м нэс сабыеу къэхъугъэм е апIунэу ашта­гъэм ны мылъкум исер­тификат къыратыщт, ау ахъщэр унагъом зыщигъэфедэщтым пIэлъэ гъэ­нэфагъэ иIэп.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу