Зэпахырэ узэу дунаир зэлъызыкIугъэм ыпкъ къикIыкIэ мыгъэ Урысыем и Мафэ фэгъэхьыгъэ Iофтхьабзэхэм янахьыбэр пэIудзыгъэ шIыкIэм тетэу зэхащэн фаеу хъугъэ.

ЗэкIэмэ анахь шъхьаIэу Адыгеим щыкIуагъэр кIэлэеджэкIо анахь дэгъоу республикэм исхэм ащыщэу зыныбжь илъэс 14 хъугъэхэм паспортхэр АР-м и ЛIышъхьэ мэфэкI шIыкIэм тетэу къызэраритыгъэхэр ары. Адыгэ республикэ филармонием ар щыкIуагъ. Нэужым ЗыкIыныгъэм ыкIи ЗэгурыIоныгъэм яплощадь Урысые Федерациемрэ Адыгэ Республикэмрэ ябыракъхэр щаIэтыгъэх.

Джащ фэдэу мы мафэм цIыфхэр нахьыбэу зыщызэхахьэрэ чIыпIэхэм быракъым техыгъэ лентэхэр волонтерхэм ащагощыгъэх, фэтэрыбэу зэхэт унэу Мыекъуапэ дэтхэм ящагухэм концертхэр ащыкIуагъэх. Нахь кIасэу къэлэ шъхьаIэм дэсхэр хэгъэгум игимн къызэрэзэдаIорэм хэлэжьагъэх.

Проектэу «Великие песни великой России» зыфиIорэм къыдыхэлъытагъэу Мыекъуапэ иорэдыIо коллективхэм «С чего начинается Родина» зыфиIорэ орэдыр къаIуагъ. Ари, нэмыкIэу къаIуагъэхэри социальнэ интернет нэкIубгъохэм къащагъэлъэгъуагъэх.

Мэкъуогъум и 12-м, пчэдыжьым Урысыем ибыракъ аIыгъэу парапланхэмкIэ Адыгеим ышъхьагъ ибыбагъэх. Проектэу «Перелет 2020.«Люди.Небо.Крылья» зыфиIорэм къыдыхэлъытагъэу мотопарапланхэмкIэ дэбыбаехи, километрэ 9700-у быбыгъэх. Мы Iофтхьабзэм пэщэныгъэр дызэрихьагъ Адыгеим щыщэу, Урысыем иавиацие псынкIэ и Зэхэт федерацие ивице-президентэу, дунаим тIогъогогъурэ ичемпион хъугъэу, Урыс географическэ обществэм и Адыгэ шъолъыр къутамэ хэтэу Игорь Потапкиным.

Джащ фэдэу Мыекъуапэ ирайонэу «МэздахэкIэ» заджэхэрэм дэжь волонтерхэм Урысыем ибыракъ щагъэIэгъагъ. Iофтхьабзэу «Флаги России» зыфиIорэм къыдыхэлъытагъэуи быракъыр Адыгеим щыпсэухэрэм яшъхьаныгъупчъэхэм ыкIи балконхэм къапалъэгъагъ.