Мэкъуогъум и 15-м Адыгэ Республикэм и Къэралыгъо Совет — Хасэм изэIукIэгъуищым ядепутатыгъэу КIырмыт Мухьдинэ ыныбжь илъэс 60 зэрэхъугъэр хигъэунэфыкIыгъ.

Илъэсыбэу Парламентым ащ Iоф зыщишIагъэм хэдзакIохэм ыкIи иреспубликэ гупсэу Адыгеим яфедэ зыхэлъыр къызэриухъумэрэм депутатхэр мызэу, мытIоу шыхьат фэхъугъэх. Ар законихъухьанымкIи, тилъэпкъэгъоу IэкIыбым исхэм ащыщэу Урысыем къэзгъэзэжьы зышIоигъохэм IэпыIэгъу ятыгъэнымкIи, культурэм ылъэныкъокIи афэгъэхьыгъэу щыт. Мухьдинэ нэбгырэ 1500-рэм къыщымыкIэу зыщызэблэкIыгъэ кIэлэцIыкIу хореографическэ ансамблэу «НЭФ» зыфиIорэм илъэсыбэ хъугъэу имеценат. IофшIэкIошхоу зэрэщытым ыкIи теубытагъэ хэлъэу рихъухьагъэр пхырищын шэнэу иIэм яшIуагъэкIэ зыщылэжьэрэ лъэныкъохэми, общественнэ-политическэ Iофэу Адыгеимрэ Краснодар краимрэ ащигъэцакIэрэми гъэхъагъэ мымакIэу ащишIыгъ.

Лъытэныгъэ зыфэтшIэу Мухьдин Мэдинэ ыкъор, псауныгъэ пытэ уиIэнэу, уигъашIэ кIыхьэ хъунэу тыгу къыддеIэу тыпфэлъаIо! «Синдика» зыфиIорэ холдинговэ компаниеу Москва щыIэм иапэрэ вице-президент IэнатIэу узыIутыми шIуагъэ къытэу уиIофшIэн щыпхырыпщынэу, уигухэлъхэр лъыбгъэкIотэнхэу мафэ пэпчъ амал къыуитынэу пфэтэIо!

АР-м и Къэралыгъо Совет —Хасэм хэтхэр