Адыгэ Республикэм и ЛIышъхьэу КъумпIыл Мурат Мыекъопэ районым ит поселкэу Табачнэм тыгъуасэ щыIагъ.

Шъугу къэдгъэкIыжьын, блэкIыгъэ илъэсым щыIэгъэ линие занкIэм илъэхъан мы псэупIэм дэсхэм республикэм ипащэ зыкъыфагъэзэгъагъ. 2019-рэ илъэсым щыIэгъэ хэушъхьэфыкIыгъэ зэIукIэгъум КъумпIыл Мурат цIыфхэм яупчIэхэм джэуапхэр къаритыжьыгъэх ыкIи ащ епхыгъэу хэбзэ къулыкъухэм пшъэрылъ гъэнэфагъэхэр афишIыгъэх. Адыгеим и ЛIышъхьэ ипшъэрылъкIэ АР-м мэкъу-мэщымкIэ и Министерствэрэ Мыекъопэ районым иадминистрациерэ тхьапэхэр къагъэхьазырыгъэх поселкэу Табачнэр къэралыгъо программэу «Къоджэ чIыпIэхэм хэхъоныгъэ ашIыныр» зыфиIорэм хэгъэхьэгъэнэу.

Муниципалитетым ипащэу Олег Топоровым къызэриIуагъэмкIэ, сабыибэ зэрыс унагъохэм псэупIэхэр ашIынхэ амал яIэным фэшI инфраструктурнэ псэуалъэхэм алъэныкъокIэ проектхэр агъэхьазырыгъэх. Непэрэ мафэм ехъулIэу чIыгу участкэ 200 агъэпсыгъ. 2022-рэ илъэсым нэс ищыкIэгъэ инфраструктурэр щыIэ хъущт. ЫпшъэкIэ зигугъу къэтшIыгъэ программэм къыдыхэлъытагъэу ащ сомэ миллиони 169-м ехъу пэIуагъэхьащт.

ЧIыпIэ хэбзэ къулыкъухэм цIыфхэм зэпхыныгъэ адыряIэу, зэгурыIохэу Iоф зэдашIэным мэхьанэшхо зэриIэр республикэм ипащэ къыхигъэщыгъ.

— ЧIыпIэ хэбзэ къулыкъухэм закъыфэзыгъазэхэрэм яIофыгъохэр псынкIэу зэхэфыгъэнхэ, ащ дакIоу псэупIэхэм тапэкIэ хэхъоныгъэхэр ашIынхэм епхыгъэ пшъэрылъхэр гъэцэкIэгъэнхэм тынаIэ тедгъэтын фае. АщкIэ лъэпкъ проектхэм ыкIи къэралыгъо программэхэм яшIогъэшхо къэкIо, — къыIуагъ КъумпIыл Мурат.

* * *

Адыгэ Республикэм и ЛIышъхьэ поселкэу Табачнэм зыщэIэм къэралыгъо программэхэм ягъэцэкIэн зэрэлъыкIуатэрэр, 2019-рэ илъэсым мыщ щыпсэухэрэм зэIукIэгъу-зэдэгущыIэгъоу адыриIагъэм ыуж пшъэрылъэу къыгъэуцугъагъэхэр зэшIохыгъэхэ зэрэхъугъэр зэригъэшIагъ.

АР-м и ЛIышъхьэ апэрэ чIыпIэу зэкIолIагъэр поселкэм иурамэу Шоссейнэм иобщественнэ чIыпIэу зэтырагъэпсыхьэрэр ары. УФ-м мэкъу-мэщымкIэ и Министерствэ ипрограммэ игъэцэкIэн къыдыхэлъытагъэу мыщ кIэлэцIыкIу ыкIи спорт площадкэ, зыгъэпсэфыпIэ щашIых. Проектым зэкIэмкIи сомэ миллиони 2,1-рэ пэIуагъэхьащт. Мылъкур федеральнэ, республикэ ыкIи район бюджетхэм къахэхыгъ.

IофшIэнхэр зэрэлъыкIуатэхэрэм КъумпIыл Мурат зыщигъэгъозагъ, подряднэ организацием илIыкIохэм гущыIэгъу афэхъугъ, анаIэ зытырадзэн фэе лъэныкъохэр афигъэнэфагъэх.

Джащ фэдэу псэупIэм дэс цIыфхэм республикэм ипащэ якIолIагъ, ящыIэкIэ-псэукIэ зыфэдэм кIэупчIагъ. КъызэраIуагъэмкIэ, илъэсым къыкIоцI поселкэм зэхъокIыныгъэшIухэр фэхъугъэх: урамхэр нахьышIоу къагъэнэфыхэ хъугъэ, псэупIэр зэтырагъэпсыхьэ, гъэстыныпхъэ шхъуантIэм иещэлIэн епхыгъэ IофшIэныр лъагъэкIуатэ, фельдшер-мамыку IэзапIэр агъэцэкIэжьыгъ, нэмыкIэу ашIагъэр бэ.

Къуаджэм щыпсэухэрэм ящыIэкIэ-псэукIэ нахьышIу шIыгъэным фытегъэпсыхьэгъэ къэралыгъо программэхэм ягъэцэ- кIэн анахь мэхьанэшхо зэрэратырэр Адыгеим и ЛIышъхьэ хигъэунэфыкIыгъ.

— ТызэдэгущыIэным тыфэхьазыр ыкIи республикэм  ипсэупIэхэм ятеплъэ нахьышIу хъунымкIэ къыттефэрэр зэкIэ тэгъэцакIэ. Ар IофшIэнышху  ыкIи едзыгъо пчъагъэу зэтеутыгъ, — къыIуагъ КъумпIыл Мурат.

АР-м и ЛIышъхьэ ипресс-къулыкъу