Адыгэ Республикэм и ЛIышъхьэу КъумпIыл Мурат социальнэ IофышIэм и Мафэ фэгъэхьыгъэ зэхэсыгъо тыгъуасэ зэхищагъ. Видеоконференц зэпхыныгъэ шIыкIэм тетэу ар кIуагъэ.

Iофтхьабзэм хэлэжьагъэх Адыгеим и Къэралыгъо Совет — Хасэм и Тхьаматэу Владимир Нарожнэр, АР-м и Премьер-министрэ игуадзэу Наталья Широковар, республикэм IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч, социальнэ лъэныкъом ичIыпIэ къулыкъухэм япащэхэр, социальнэ фэIо-фашIэхэр зыгъэцэкIэрэ стационар организациехэм яIофышIэхэр, муниципалитетхэм япащэхэр.

Адыгеим и ЛIышъхьэ пэублэ псалъэ къышIызэ, социальнэ къулыкъухэм яIофышIэхэм ямэфэкIыкIэ къафэгушIуагъ. Пандемием илъэхъан ахэм яIофшIэн мэхьанэшхо иIэ зэрэхъугъэр хигъэунэфыкIыгъ.

— Мы тхьамэфэ пчъагъэхэм Iоф зышIэгъэ, непи исэнэхьат пшъэрылъхэр зэрифэшъуашэу зыгъэцакIэхэрэм, IэпыIэгъу зищыкIагъэхэм алъыIэсыхэрэ, ахэм гъомылапхъэхэр ыкIи Iэзэгъу уцхэр яунэхэм афэзыхьырэ пстэуми тхьашъуегъэпсэу ятэIо. Шъори IэпыIэгъухэр шъуиIэх — тиныбжьыкIэхэр, волонтерхэр, предпринимательхэр. Адыгеим щыпсэухэу гупыкI зиIэхэм, мы охътэ мыпсынкIэм цIыфхэм IэпыIэгъу афэхъухэрэм инэу тафэраз, — къыхигъэщыгъ КъумпIыл Мурат.

Проектэу «#Мы вместе» зыфиIорэм къыдыхэлъытагъэу зэхэубытэгъэ гупчэхэм яволонтерхэмрэ Урысые народнэ фронтым идобровольцэхэмрэ зэгъусэхэу гъомылэпхъэ Iалъмэкъ мин 73-рэ фэдиз зигъот макIэхэм атырагощагъ. Джащ фэдэу Урысые Федерацием и Президентэу Владимир Пути- ным тыгъуасэ зэхищэгъэ телемостым Мыекъопэ районым иволонтерхэмрэ исоциальнэ къулыкъушIэхэмрэ хэлэжьагъэх.

Зэпахырэ узым зиягъэ ригъэкIыгъэ цIыфхэм социальнэ IэпыIэгъу тедзэ ягъэгъотыгъэнымкIэ къэралыгъом ипащэ унашъоу ышIыгъэхэм мэхьанэшхо зэряIагъэр, ащ яшIогъэшхо къызэрэкIуагъэр Адыгеим и ЛIышъхьэ хигъэунэфыкIыгъ.

— IэпыIэгъур игъом ыкIи икъоу зищыкIагъэхэм алъыIэсын фае. Пособиехэм ыкIи тынхэм адакIоу мы IэпыIэгъур Адыгеим щыпсэухэрэм игъом зэраIэкIахьэрэм мэхьанэшхо иI. Ар зэхэщагъэ зэрэхъурэм шъолъырым исоциальнэ къулыкъухэм яIахьышIу хэлъ, — къыIуагъ республикэм ипащэ.

Мы лъэныкъом Iоф щызышIэхэрэми IэпыIэгъу агъотыгъ. Мыхэм зэкIэмкIи сомэ миллион 30 фэдиз афатIупщыгъ. Ащ щыщэу сомэ миллион 18-рэ мин 710-р — Урысыем и Правительствэ иIэпэчIэгъэнэ фонд, сомэ миллион 11-рэ мини 180,4-р — республикэ бюджетым къатIупщыгъэх.

Министрэу Мырзэ Джанбэч къызэриIуагъэмкIэ, тынхэмкIэ IофшIэныр лъагъэкIуатэ, зэкIэмкIи аIэкIагъэхьащтыр сомэ миллион 44-м ехъущт. Непэрэ мафэм ехъулIэу социальнэ ухъумэным иотраслэ специалист мини 2,5-м ехъу щэлажьэ. ЦIыфхэм ящыIэкIэ-псэукIэ нахьышIу шIыгъэныр ары ахэм япшъэрылъ шъхьаIэр. ЦIыфхэм афагъэцэкIэрэ фэIо-фашIэхэми япчъагъи хэхъо зэпыт.

Адыгеим и ЛIышъхьэ къызэриIуагъэмкIэ, Iофхэм язытет зыпкъ зиуцожьыкIэ социальнэ IофышIэхэм атефэрэ республикэ ыкIи ведомственнэ тынхэр аратыжьыщтых.

Зыныбжь хэкIотагъэхэр зыщаIыгъхэ интернат учреждениехэм ялIыкIохэм къызэраIуагъэмкIэ, ахъщэ тынхэр зэкIэ игъом къаIэкIэхьагъэх, ащкIэ IэпыIэгъу къафэхъурэ Адыгеим и ЛIышъхьэ къыфэрэзагъэх.

Зэпахырэ узыр къапымыхьаным фэшI зыныбжь хэкIотагъэхэр яунэхэм къарымыкIынхэм мэхьанэшхо зэриIэр ыкIи интернат учреждениехэм ачIэс-хэр къэухъумэгъэнхэ зэрэфаер Адыгеим и ЛIышъхьэ къыIуагъ.

Зэхэсыгъом къыщыгущыIагъэх УФ-м ПенсиехэмкIэ фондым и Къутамэу Адыгеим щы-Iэм и ГъэIорышIакIоу Къулэ Аскэрбый, Урысыем социальнэ страхованиемкIэ и Фонд ишъолъыр Къутамэ ипащэу Натхъо Разиет, цIыфхэм IофшIапIэ ягъэгъотыгъэнымкIэ къэралыгъо къулыкъум и ГъэIорышIапIэу АР-м щыIэм ипащэу Галина Цыганковар, Адыгеим медикэ-социальнэ экспертизэм-кIэ иэксперт шъхьаIэу Батмэн ФатIимэт, IофшIэнымкIэ къэралыгъо инспекцием ипащэу Сихъу Русет.

Республикэм ипащэ къызэрэхигъэщыгъэу, пандемиемкIэ Iофхэм язытет къегъэлъагъо цIыфхэм социальнэ IэпыIэгъу афэхъугъэным исистемэ тапэкIэ хэхъоныгъэ ышIыным мэхьанэшхо зэриIэр. ЫпшъэкIэ зигугъу къэтшIыгъэ къулыкъухэм тынхэмкIэ, пособиехэмкIэ яIо зэхэлъэу Iоф зэдашIэнэу КъумпIыл Мурат къариIуагъ. Анахьэу цIыфхэм IофшIэпIэ чIыпIэхэр ягъэгъотыгъэнхэм анаIэ тырагъэтынэу къафигъэпытагъ.

— ЦIыфхэм апашъхьэкIэ къэралыгъом ыхьырэ социальнэ пшъэдэкIыжьхэр джыри нахь гъэлъэшыгъэнхэр хэгъэгум изакон шъхьаIэу — Урысыем и Конституцие щыгъэпытэгъэн фаеу УФ-м и Президент предложение къыхьыгъ. ЦIыфхэр социальнэу ухъумэгъэнхэм, ахэм ящыIэкIэ-псэукIэ нахьышIу хъуным ар фэIорышIэщт, — къыIуагъ КъумпIыл Мурат.

АР-м и ЛIышъхьэ ипресс-къулыкъу

Сурэтхэр А. Гусевым тырихыгъэх.