Конституцием зэхъокIыныгъэу фашIыщтхэм къэралыгъом ис цIыфхэм амакъэ зыщатын алъэкIыщт мафэхэр агъэнэфагъэх. Пандемием ыпкъ къикIыкIэ цIыфхэм амакъэ зэратырэ шIыкIэм зэхъокIыныгъэхэр фэхъугъэх. Ащ тащигъэгъозагъ АР-м хэдзынхэмкIэ и Гупчэ комиссие итхьаматэ игуадзэу Елена Майор.

— ЦIыфхэр гумэкIыгъом щыухъумагъэхэ хъунхэм фэшI мэкъуогъум и 25-м къыщегъэжьагъэу бэдзэогъум и 1-м нэс амакъэ атын алъэкIыщт. ХэдзыпIэ участкэм къэкIонхэ е унэм исхэу амакъэ атын амал яIэщт, — тыщегъэгъуазэ тигущыIэгъу. — ХэдзыпIэм кIон шIоигъоныгъэ зимыIэм унэм къыфэкIонхэу кIэлъэIун ылъэкIыщт. ЫпэкIэ мыщ фэдэ фэIо-фашIэ сэкъатныгъэ зиIэ цIыфхэм афагъэцакIэщтыгъэмэ, джы ар пстэуми къадэхъущт.

Комиссием хэтхэр унэм исэу ымакъэ зытынэу къыкIэлъэIугъэм фэкIощтых, ау зыщыпсэурэм ихьащтхэп. ХэушъхьафыкIыгъэ Iалъмэкъэу бюллетенир зэрылъым унэм исэу ымакъэ зэритырэр къэзыушыхьатырэ лъэIу тхыгъэр кIыгъущт. Джащ фэдэу ащ къэлэмыр, ыIэхэр зэрилъэкIыщт пкъыгъор игъусэщтых. ЦIыфым ыдэжь комиссием илIыкIохэр къыIухьагъэх: Iалъмэкъыр къыраты, ымакъэ еты, нэужым къырахьакIырэ къэмланым редзэ.

— Джащ фэдэу хэдзыпIэ участкэхэр санитарнэ шапхъэхэм адиштэнхэм, амакъэ зытынэу къекIолIагъэхэм ящынэгъончъагъэ зэрифэшъуашэу къэухъумэгъэным пылъыщтых, — къыIуагъ Елена Майор. — Ащ нэмыкIэу, «мобильнэ хэдзакIу» зыфиIорэ шIыкIэр фаехэм къызфагъэфедэн амал яI. Ащ къикIырэр цIыфыр нэмыкI шъолъыр кIуагъэмэ, ащ ымакъэ къыщитын ылъэкIыщт.

Гъонэжьыкъо Сэтэнай.