Зэрэдунаеу зэлъызыкIугъэ коронавирусыкIэу COVID-19-р Урысыем къызехьэм, ащ зимыушъомбгъуным фэшI режим гъэнэфагъэу къэралыгъор зытехьагъэм анахьыбэу иягъэ зэригъэкIыгъэхэр кIэлэцIыкIу зэрыс унагъохэр ары.

ХъызмэтшIапIэхэм, организациехэм яIофшIэн къызэтеуцуи, щапIэхэр, салонхэр, бэдзэршIыпIэхэр, нэмыкIыбэхэр зызэфашIыхэм, ахэм гъотэу яIэм къыщыкIагъ е чIэзынэгъапэхэри бэу къахэкIыгъэх. Ары къэралыгъом IэпыIэгъу зэритыгъэхэм апэ ахэр зыкIишIыгъэхэр.

УФ-м и Президент гъэтхэпэ мазэм ыкIэм коронавирусым зимыушъомбгъуным, цIыфхэр ащ щыухъумэгъэнхэм фэшI режим гъэнэфагъэм техьэгъэн фаеу къызеIом, илъэси 3-м зыныбжь емыхъугъэ кIэлэцIыкIу зэрыс унагъоу ны мылъкум исертификат къызтефэхэрэм зэкIэми мэзищым, мэлылъфэгъум, жъоныгъуакIэм ыкIи мэкъуогъум, сомэ мин тфырытф афэтIупщыгъэнэу унашъо къышIыгъагъ. ЦIыфхэр зэхахьэ зэрэмыхъущтхэр къыдалъытэзэ, ащ пае унагъохэм лъэIу тхылъым нэмыкI зыпари амыгъэхьазырынэу, ари къэралыгъо фэIо-фашIэхэм япортал щыптын плъэкIынэу ашIыгъ.

Нэужым апэрэ сабыим пае ны мылъкур 2020-рэ илъэсым ищылэ мазэ и 1-м къыщыублагъэу зэрагъэнафэрэр, ащ ыпэкIэ къэхъугъэу, ау илъэси 3-м джыри зыныбжь нэмысыгъэхэр ахъщэ тыным зэрэхэныхэрэр къыдилъытэзэ, УФ-м и Президент зэкIэми сомэ мин тфырытфыр къафэкIонэу къышIыжьыжьыгъ.

УФ-м ПенсиехэмкIэ ифонд къызэритыгъэмкIэ, мы ахъщэ тедзэм пае нэбгырэ миллиони 2,8-м ехъумэ лъэIу тхылъхэр къатыгъэх. Фондым и Къутамэу АР-м щыIэм тызэрэщигъэгъозагъэмкIэ, мэлылъфэгъу ыкIи жъоныгъокIэ мазэхэм мыщ фэдэ ахъщэ тынэу пстэумкIи сомэ миллиони 104,5-рэ атIупщыгъ, мэкъуогъум пае и 5-м шIомыкIэу атыгъэр сомэ миллион 30 фэдиз мэхъу. Мы ахъщэ тедзэм пае лъэIу тхылъыр чъэпыогъум и 1-м нэс птын плъэкIынэу щыт.

КIэлэцIыкIоу илъэси 3-м зыныбжь шIокIыгъэу 16-м емыхъугъэхэм зэтыгъоу сомэ мин пшIырыпшI мэкъуогъу мазэм афэтIупщыгъэныри вирусым зэрарэу къыхьыгъэр унагъохэм нахь афэгъэпсынкIэгъэным фытегъэпсыхьэгъэ Iофтхьабзэхэм ащыщ. УФ-м и Президент мыщ кIэщакIо фэхъугъэри. ПстэумкIи лъэIу тхылъ миллиони 10-м ехъу мыщ пае Урысыем къыщатыгъ. ПенсиехэмкIэ фондым къызэрилъытагъэмкIэ, кIэлэцIыкIоу ахъщэ IэпыIэгъур зыфэкIощтыр миллион 22-рэ мэхъу. Ащ пэIухьанэу сомэ миллиарди 197,2-рэ къэралыгъом ибюджет къыхахыгъ. Мэкъуогъум и 1-м мы IэпыIэгъур атынэу рагъэжьагъ.

АдыгеимкIэ нэбгырэ мин 40 къызэралъытагъэр. УФ-м ПенсиехэмкIэ ифонд и Къутамэу АР-м щыIэм, мы мазэм икъихьагъум нэс пштэмэ, лъэIу тхылъ мин 34-м ехъу къыIэкIахьэгъагъ. Мэкъуогъум и 1-м сомэ миллион 466,5-рэ, къыкIэлъыкIорэ мафэм сомэ миллион 56-м ехъу атIупщыгъ.

КIэлэцIыкIоу илъэси 3-м къыщыублагъэу 7-м нэс зыныбжьхэм ахъщэ IэпыIэгъу афэгъэкIогъэным УФ-м и Президент кIэщакIо зыфэхъугъэр коронавирусым ыпкъ къикIыкIэ режим гъэнэфагъэм тытехьаным ыпэкI. Мэзэе мазэм Джэпсалъэу къышIыгъэм ар къыщиIогъагъ. Ау вирусым унагъохэр чIыпIэ къин зыредзэхэм, ащ игъэпсын нахь къызэрыкIоу ашIынэу ыкIи икъэтын агъэпсынкIэнэу унашъо къышIыгъ.

Унагъом гъотэу иIэр нэбгырэ пчъагъэу исым тегощагъэу, зы нэбгырэм тефэрэр цIыфыр зэрэпсэун ылъэкIыщт ахъщэ анахь макIэм нэмысырэмэ, мы ахъщэ IэпыIэгъур къытефэ. Мыр къызалъытэкIэ нэу е тэу IофшIапIэр чIэзынагъэм ащ IотыфэкIэ къыратыщтыгъэ лэжьапкIэр къыдалъытэрэп. ЦIыфыр зэрэпсэун ылъэкIыщт ахъщэ анахь макIэм ызыныкъо фэдиз кIэлэцIыкIум къыфэкIощтыр. ГурытымкIэ лъытагъэу, ар сомэ мини 5,5-рэ мэхъу. Зэхэубытагъэу апэрэ къэтыгъом къэкIощтыр, ари гурытымкIэ лъытагъэу, сомэ мин 38-рэ. Мы пособием пае федеральнэ бюджетым сомэ миллиарди 101-рэ щагъэнэфагъ, шъолъыр бюджетхэм къахахыгъэу ащ пстэумкIи къыхагъэхъощтыр сомэ миллиард 31-рэ мэхъу.

 Ахъщэ тыныр зытефэрэ унагъохэм мэкъуогъум и 1-м къыщыублагъэу афатIупщынэу рагъэжьагъ, ау, къэралыгъом ипащэ иунашъокIэ, щылэ мазэм къыщыублагъэу къыдэлъытагъэу къаты.

Мы пстэумэ коронавирусым зимыушъомбгъуным фэшI режим гъэнэфагъэм субъектхэр затехьэхэм IофшIэпIэ чIыпIэр чIэзынэгъэ ны-тыхэри къахеубытэх. Арэу щытми, ахэм апае хэушъхьафыкIыгъэу къэралыгъом IэпыIэгъу ыгъэнэфагъ. IофшIапIэ имыIэжьэу гъэтхапэм и 1-м ыуж цIыфхэм IофшIэпIэ чIыпIэхэр ягъэгъотыгъэнхэмкIэ къулыкъум иучет хэуцуагъэхэм мэзищым, мэлылъфэгъум, жъоныгъуакIэм ыкIи мэкъуогъум, лэжьэпкIэ анахь макIэм фэдиз, ар сомэ 12130-рэ, пособиеу къафэкIощт. Ащ нэмыкIэуи зыныбжь имыкъугъэу сабыеу яIэм пэпчъ сомэ мин щырыщ мэзищым къыратыщт.

Мыщ пае лъэIу тхылъыр порталэу «Работа в России» зыфиIорэм щыптын плъэкIыщт. Ными, тыми IофшIапIэр чIанагъэми, кIэлэцIыкIухэм апае ахъщэ тедзэр зым илъэIу тхылъ къызэратыщтыр. Къулыкъум къызэрэщыхагъэщыгъэмкIэ, IофшIапIэр чIэзынагъэм мэфипшIым фылъыхъущтых, ищыкIагъэм фэдэ къамыгъотымэ, пособиеу апэрэ мазэм фагъэнэфэгъагъэр къыфэкIощт.

ХЪУТ Нэфсэт.