Урысыем и Мафэ фэгъэхьыгъэ мэфэкI зэхахьэхэу Адыгэ Республикэм щыкIощтхэм культурэм иIофышIэхэр хэлэжьэщтых.

— Мыекъуапэ иурамэу Заводская, 3-м тиконцерт щызэхэтщэщт, — къытиIуагъ Адыгэ Республикэм и Къэралыгъо камернэ музыкальнэ театрэу Хьанэхъу Адамэ ыцIэ зыхьырэм ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс. — МэфэкIым тиартистхэр фэхьазырых, цIыфхэр агъэгушIощтых.

Адыгэ Республикэм изаслуженнэ артистхэу Ирина Кириченкэм, Елена Лепиховам, Давид Манакьян, Надежда Максимовам, артисткэу ЛIый Бэллэ, нэмыкIхэм хэгъэгум имэфэкI фэгъэхьыгъэ орэдхэр къаIощтых.

Искусствэр зышIогъэшIэгъонхэр яунэхэм арысхэу, шъхьангъупчъэхэр Iуахынхэшъ, музыкальнэ театрэм едэIунхэ алъэкIыщт.

НэкIубгъом щалъэгъущт

— Урысыем икъэралыгъо гъэпсыкIэ, хэгъэгум ис лъэпкъхэм язэпхыныгъэхэр гъэпытэгъэнхэм, мамыр щыIакIэм ихэхъоныгъэхэм, адыгэ лъэпкъ орэдхэм афэгъэхьыгъэ видео роликхэр Интернетым инэкIубгъохэм къащыдгъэлъэгъощтых, — яIофыгъохэм тащигъэгъозагъ Адыгеим и Къэралыгъо орэдыIо-къэшъокIо ансамблэу «Ислъамыем» ихудожественнэ пащэу, Урысыем, Адыгеим янароднэ артистэу, композиторэу Нэхэе Аслъан.

Республикэм икъалэхэм, ирайонхэм нэмыкI мэфэкI Iофтхьабзэхэр ащыкIощтых.

Сахьидэкъо Нурбый.