Къалэу Мыекъуапэ и Прокуратурэ полицием иIофышIэщтыгъэу илъэс 24-рэ зыныбжьым къыфызэIуихыгъэ уголовнэ Iофыр хьыкумым фигъэхьыгъ.

УФ-м и Уголовнэ кодекс истатьяу 159-м къызэригъэнафэу иIэнатIэ къызфигъэфеди, гъэпцIагъэ зыхэлъ бзэджэшIагъэ зэрэзэрихьагъэмкIэ ар следствием ыгъэмысагъ.

ЗэрагъэунэфыгъэмкIэ, 2020-рэ илъэсым щылэ мазэм полицием икъулыкъушIэ Мыекъуапэ щыпсэурэ хъулъфыгъэм итранспорт къараригъэтыжьынэу ыкIи административнэ пшъэдэкIыжь тыраримыгъэлъхьанэу ыгъэгугъи, сомэ минищ къыIихыгъ.

Полицием иIофышIэщтыгъэм ылъэныкъокIэ Мыекъопэ къэлэ прокуратурэм къызэIуихыгъэ уголовнэ Iофым Мыекъопэ къэлэ хьыкумыр хэплъэнэу IэкIигъэхьагъ.

Мыщ ыпэкIэ къэлэ прокуратурэм къызэIуихыгъэ IофымкIэ хэгъэгу кIоцI къулыкъум иIофышIэ цыхьэ зэрэфамышIыжьырэм къыхэкIэу иIэнатIэ IуагъэкIыгъ, ащ ипащэхэм дисциплинарнэ пшъэдэкIыжь арагъэхьыгъ.