ЗекIо лъэныкъом хэт экспертхэм къызэраIорэмкIэ, мыгъэ къызэIуахыжьыщт зыгъэпсэфыпIэхэм анахьыбэр блэкIыгъэ илъэсым щыIэгъэ уасэхэм атетыщтых. ЦIыфхэр нахь къякIолIэнхэм мыщ фэдэ шIыкIэр фытегъэпсыхьагъ.

Шъачэ дэт зыгъэпсэфыпIэ чIыпIэхэм ащыщхэм къызэратырэмкIэ, блэкIыгъэ илъэсым уасэу щыIагъэхэм къахагъэхъуагъэп. Ахэм къагурэIо уасэхэм къазыхахъокIэ, цIыфхэм япчъагъи къызэрэщыкIэщтыр.

ЗыгъэпсэфыпIэм кIон гухэлъ зиIэу къыкIэупчIэрэмэ япчъагъэ бэп. Ащ къыхэкIэу санаториехэм ащыщхэр мыгъэ къызэIуамыхыжьынхэу ары зэрагъэнафэрэр. Къыхэгъэщыгъэн фае коронавирусым зимыушъомбгъуным фэшI икъоу Iоф зэрамышIэщтыр. ГущыIэм пае, бассейнхэм защыбгъэпскIы хъущтэп, къызэрэпкIухьащтми шапхъэхэр пылъых.

Зэфэхьысыжьхэм къызэрагъэлъагъорэмкIэ, Шъачэ е Къырым укIоным пае зы нэбгырэм гурытымкIэ сомэ мин 20 — 30 фэдиз пэIухьащт. Ау зызгъэхъужьын гухэлъ зиIэхэмкIэ уасэр нахьыбэщт. Ащ фэдэ путевкэхэм сомэ мин 50 — 55-рэ атефэщт.

Мэкъуогъум и 1-м къыщегъэжьагъэу Роспотребнадзорым къыгъэуцугъэ пшъэрылъхэр зыгъэцэ- кIагъэу, медицинэ лицензие зиIэ зыгъэпсэфыпIэхэр къызэIуахыжьыгъэх.

Гъонэжьыкъо Сэтэнай.