Адыгэ Республикэм исоциальнэ IофышIэхэу лъытэныгъэ зыфэтшIыхэрэр!

Шъуисэнэхьат епхыгъэ мэфэкIым фэшI тышъуфэгушIо!

Сэкъатныгъэ, ныбжь зиIэхэм, ветеранхэм, сабыибэ зэрыс унагъохэм мафэ къэс IэпыIэгъу афэхъухэрэм мы мафэм ящытхъу тэIо.

ЩыIэныгъэм чIыпIэ къин ригъэуцуагъэхэм шъуишIуагъэ зэряжъугъэкIырэмкIэ псапэ шъошIэ, республикэм исоциальнэ лъэныкъо ихэхъоныгъэ шъуиIахьышIу хэшъошIыхьэ.

Адыгеим ис цIыфыбэмэ ящыIакIэ зыфэдэ хъущтыр IэпэIэсэныгъэу, цIыфыгъэу, гукIэгъоу шъухэлъым бэкIэ елъытыгъ.

IофшIэн мыпсынкIэр дэгъоу зэрэжъугъэцакIэрэм, цIыфхэм шъугу зэрафызэIухыгъэм, зищыкIагъэм IэпыIэгъу ешъутыным шъузэрэфэхьазырым афэшI лъэшэу тызэрэшъуфэразэр шъуимэфэкI мафэ къэтэIо.

Адыгэ Республикэм исоциальнэ IофышIэхэм япшъэрылъхэр тапэкIи гъэхъагъэ хэлъэу зэрагъэцэкIэщтхэм, яхьалэлныгъэрэ ягукIэгъурэ нэмыкIхэм зэрадагощыщтым, фэIо-фашIэхэр зыфагъэцакIэхэрэм сыдигъуи нэгуихыгъэу зэрапэгъокIыщтхэм тицыхьэ телъ.

Ныбджэгъу лъапIэхэр, псауныгъэ пытэ, щыIэкIэ-псэукIэ дэгъу шъуиIэнэу, Iоф мыпсынкIэу жъугъэцакIэрэм гъэхъэгъакIэхэр щышъушIынэу тышъуфэлъаIо!

Адыгэ Республикэм и ЛIышъхьэу, Урысые политикэ партиеу «Единэ Россием» и Адыгэ регион къутамэ и Секретарэу КъумпIыл Мурат

Адыгэ Республикэм и Къэралыгъо Совет – Хасэм и Тхьаматэу

Владимир Нарожный