Урысыем и Мафэ ипэгъокIэу республикэм щыпсэурэ ыкIи щеджэрэ ныбжьыкIэхэм гущыIэгъу тафэхъугъ. Ахэм мэфэкIым еплъыкIэу фыряIэм зыщыдгъэгъозагъ.

Гумэ Анжел, Мыекъопэ къэралыгъо технологическэ университетым щеджэ ыкIи Iоф щешIэ:

— Мэкъуогъум и 12-м къэралыгъомкIэ анахь мэхьанэшхо зиIэ мэфэкIхэм ащыщыр хэтэгъэунэфыкIы. Урысыем итарихъ, непэрэ хэхъоныгъэхэр, неущрэ мафэм имэхьанэ зэхэтшIэн амал къытеты. МэфэкIым зихэгъэгу шIу зылъэгъухэрэр зэрепхых, зыкIыныгъэм фещэх. Урысыем къыщыхъугъэу ыкIи щапIугъэ нэбгырэ пэпчъ къэралыгъом хэхъоныгъэ ышIыным иIахьышIу хилъхьаным мы мэфэкIым тыфещэ, тищыIэныгъэ зыфэдэщтым къэралыгъом инепэрэ ыкIи инеущрэ мафэхэр зэрелъытыгъэхэр къыдгурегъаIо.

Елена Тарарыкина, студентк:

— Урысыем и Мафэ сэркIэ къэралыгъом имэфэкI шъхьаIэхэм ащыщ. Титарихъ тызэкIэплъэжьмэ, зэо жъалымэу, нэмыкI чIыпIэ къинэу зэрыфагъэр макIэп. Ау пстэуми апхырыкIын ыкIи хэхъоныгъэхэр ышIынхэ ылъэкIыгъ. Тикъэралыгъо тырыгушхон, тапэкIэ лъыкIотэным тыфэлэжьэн фае. Ар ана- хьэу къызыгурыIон фаер ныбжьыкIэхэу неущрэ мафэр зэлъытыгъэхэр ары. Мы мафэм Урысыем икъалэхэм зэкIэми мэфэкI Iофтхьабзэхэр ащызэхащэх. Тэ- ри тиунагъокIэ хэтэгъэунэфыкIы. Тызэгъусэу мафэр тэгъакIо, нэужым мэшIоустхъум теплъы.

Пэнэшъу Назир, Мыекъуапэ щэпсэу:

— Урысыем и Мафэ мэфэкI анахь шъхьаIэу къэралыгъом иIэмэ ащыщэу сэлъытэ. Лъэпкъ зэфэшъхьафыбэу щыпсэухэрэр зэрепхых, зыкIыныгъэ къахелъхьэ. Къыхэзгъэщы сшIоигъу мэкъуогъум и 12-м сыкъызщыхъугъэ мафэр зэрэхэзгъэунэфыкIырэр. Ащ къыхэкIэу анахь мэхьанэшхо зэстырэ мэфэкIхэм ясатыр хэт. Мыщ фэдэу къэралыгъом имэфэкI шъхьаIэхэм ащыщым сыкъызэрэхъугъэм лъэ- шэу сырэгушхо. УзщапIугъэ хэгъэгур, укъызщыхъугъэ республикэр зыщымыгъэгъупшэхэу, ахэр бгъэлъэпIэнхэм мэфэкIым укъыфегъэущы.

Анастасия Нетребина, студентк:

— Къэралыгъом иныбжьыкIэхэр патриотизмэм фэзыпIурэ мэфэкIхэм ащыщэу мыр сэлъытэ. Урысыем сыкъызэрэщыхъугъэм сырэгушхо. Мыекъопэ къэралыгъо технологическэ университетэу сызщеджэрэм илъэсы къэс мэфэкIыр щыхагъэунэфыкIы. Мыгъэ Iофтхьабзэхэр зэхащэщтых. Ахэм сахэлэжьэнэу сина- сып къызэрихьыгъэмкIэ сэгушIо. Волонтер купэу зэхащагъэм сыхэтэу республикэм щыпсэурэ цIыфхэм нэпэеплъ цIыкIухэр яттыщтых. Ащ ишIуагъэкIэ мэфэкIым мэхьанэшхо зэри- Iэм джыри зэ анаIэ тырядгъэдзэщт ыкIи мэхьанэшхо зэриIэр агу къэдгъэкIыжьыщт.

АдэгущыIагъэр Гъонэжьыкъо Сэтэнай.