Урысые Федерацием и Конституционнэ Хьыкум Федеральнэ законэу «Страховой пенсиехэм яхьылIагъ» зыфиIорэм ия 17-рэ статья ия 3-рэ Iахь Урысые Федерацием и Конституцие димыштэу ылъытагъ.

ЯцIыкIугъом къыщегъэжьагъэу сэкъатыныгъэ зиIэхэм янэ-ятэхэм япенсие ахъщэ тегъахъоу иIэр якIалэхэм аныбжь зырикъукIэ аIахыжьы мыхъунэу, законэу «Страховой пенсиехэм яхьылIагъ» зыфиIорэм иположениехэм ащыщхэр Урысые Федерацием и Конституцие димыштэхэу, ащ гъэтэрэзыжьынхэр фэшIыгъэнхэ фаеу Урысые Федерацием и Конституционнэ Хьыкум ылъытагъ. Ащ фэгъэхьыгъэу Урысые Федерацием и Конституционнэ Хьыкум 2020-рэ илъэсым мэлылъфэгъум и 22-м ышIыгъэ унашъоу № 20-р зытетым къыщеIо.

«Федеральнэ законэу «Страховой пенсиехэм яхьылIагъ» зыфиIорэм ия 17-рэ статья ия 3-рэ Iахь Урысые Федерацием и Конституцие димыштэу лъытэгъэнэу, сыда пIомэ ицIыкIугъом къыщегъэжьагъэу сэкъатыныгъэ зиIэм ыныбжь зырикъукIэ ыкIи юридическэ мэхьанэ зиIэ Iофтхьабзэхэр ащ зэрихьанхэ ымылъэкIынэу хьыкумым зилъытэкIэ, ащ янэ-ятэхэм япенсие иIэгъэ ахъщэ тегъахъор къэгъэнэжьыгъэным епхыгъэ Iофыгъом изэшIохынкIэ екIолIэкIэ зэфэшъхьафхэр щыIэнхэмкIэ ар лъапсэ мэхъушъ ары», — къыщеIо унашъом.

Урысые Федерацием и Конституционнэ Хьыкум мы Iофым хэплъэнымкIэ лъапсэ хъугъэр ицIыкIугъом къыщегъэжьагъэу сэкъатыныгъэ зиIэ икIалэ къыдекIокIырэ И.К. Дашковам итхьаусыхэ тхылъ ары. Шъэожъыер 1999-рэ илъэсым къэхъугъ, ыныбжь илъэс 16-м зынэсым юридическэ мэхьанэ зиIэ Iофтхьабзэхэр зэрихьанхэ ымылъэкIынэу хьыкумым ылъытагъ. Ным ипенсие ахъщэ къыфытырагъахъощтыгъ, ау икIалэ ыныбжь илъэс 18 зэхъу нэуж нахьыбэрэ ащ теплъэжьыгъэп.

И. К. Дашковам пенсионнэ фондыр тэрэзэу зэрэземыкIуагъэм фэгъэхьыгъэ тхьаусыхэ тхылъыр хьыкумым рихьылIагъ. Ным ипенсие унагъомкIэ хэхъо шъхьаIэу зэрэщытым емылъытыгъэу ахъщэ тегъахъом ащ къыфегъэгъэзэжьыгъэным хьыкумым къыдыригъэштагъэп. Къом Iоф ышIэн ымылъэкIынэу алъытагъэми, нымкIэ ар Iыгъынэу щытэу ащ къызэримыкIырэр хьыкумым къыщыраIуагъ. Ащ ыуж бзылъфыгъэм Конституционнэ Хьыкумым зыкъыфигъэзагъ.

Конституционнэ Хьыкумым зэфэхьысыжьэу ышIыгъэр сэкъатыныгъэ зиIэхэу ны-тыхэм аIыгъын фаеу хъухэрэмкIэ хьыкум практикэ зыкI щымыIэу ары.

Конституционнэ Хьыкумым ыштэгъэ унашъом зэритымкIэ, Урысыем ифедеральнэ хэбзэгъэуцу илъэсныкъом къыкIоцI Федеральнэ законэу «Страховой пенсиехэм яхьылIагъ» зыфиIорэм ия 17-рэ статья ия 3-рэ Iахь нэфэгъэ икъу хилъхьан, Конституционнэ Хьыкумым иеплъыкIэ къыдилъытэзэ, И. К. Дашковам иIоф джыри зэ хьыкумыр хэплъэжьын фае.

АР-м и Конституционнэ Хьыкум исекретариат