2001-рэ илъэсым къыщегъэжьагъэу УФ-м и Президент иунашъокIэ мэкъуогъум и 8-р социальнэ IофышIэм и Мафэу хагъэунэфыкIы. Къэралыгъом ыкIи обществэм ягукIэгъу щыкIэрэ цIыфхэм IэпыIэгъу афэхъугъэныр къыхэзыхыгъэхэр мы мафэм анахьэу къыхагъэщых.

Уджыхъу Нэфсэт илъэс тIокIырэ тфырэ хъугъэу социальнэ IофышIэу мэлажьэ. Апэрэ мафэм къыщегъэжьагъэу нэжъ-Iужъхэр зэригъэрэзэщтхэр ышIэщтыгъэ ыкIи иIофшIэн зэрифэшъуашэу фэмыгъэцэкIэным тещыныхьагъэп.

— Къунчыкъохьаблэ сыкъыщыхъугъ ыкIи ащ сыщапIугъ. Еджэныр къызысэухым, сикъоджэ гупсэ къэзгъэзэжьыгъагъ. Социальнэ IофышIэ щыкIэхэу къоджэ псэупIэм исовет ипащэ къысэолIагъ. ЛэжьапкIэу пылъыгъэр мэкIагъэ нахь мышIэми, лъэIур фэсымыгъэцэкIэныр емыкIоу къысщыхъугъ, — къытфеIуатэ Нэфсэт. — Джащ къыщегъэжьагъэу илъэс 25-рэ хъугъэу сиIофшIэн сыгу етыгъэу сэгъэцакIэ.

ЦIыфхэм ясоциальнэ фэIо-фашIэхэр зыгъэцэкIэрэ зэхэубытэгъэ Гупчэм икъутамэу Гъобэкъуае дэтым тигущыIэгъу Iоф щешIэ. Ащ къызэриIуагъэмкIэ, IэпыIэгъу фэе цIыфым анахьэу ищыкIэгъэ фэIо-фашIэхэр къегъэнафэх, ахэр зэрыт документ агъэхьазыры. Нэужым ащ тетэу социальнэ къулыкъушIэм иIофшIэн зэхещэ.

— Гъомылапхъэхэр къафэхьыгъэныр, Iэзэгъу уцхэр къафэщэфыгъэныр, коммунальнэ фэIо-фашIэхэм ятынкIэ IэпыIэгъу сафэхъуныр, пщэрыхьанхэмкIэ сишIуагъэ язгъэкIыныр ары сиIофшIэн хахьэрэр, — къеIуатэ Нэфсэт.

Нэфсэт нэжъ-Iужъи 9-мэ IэпыIэгъу афэхъу. Ощхи оси имыIэу ыгу етыгъэу иIофшIэн егъэцакIэ. Гъунэгъу псэупIэм щыIэ бэдзэрым, аптекэм афэкIонэу къелъэIух, нэмыкI фэIо-фашIэхэри афегъэцакIэх.

— Нэжъ-Iужъхэр згъэрэзэнхэр, згъэгушIонхэр ары пшъэрылъэу зыфэзгъэуцужьыгъэр, — игущыIэ лъегъэкIуатэ Нэфсэт. — Сыдигъуи ар сымыукъоным сыпылъ. IэпыIэгъу сызыфэхъу- рэ нэжъ-Iужъхэр къызэрэсфыщытхэм мэхьанэшхо есэты. Ахэр къысфэдэгъух, гуфэбэныгъэу апэзгъохырэр зэхашIыкIы. Апэрэ мафэу сыкъызыIухьагъэм къыщегъэжьагъэу сызфакIохэрэри ахэтых.

СигущыIэгъу нэмыкI IофшIэн къыгъотын гухэлъ ышIэу чIыпIэ ифагъэп. Иунагъо щыщым фэ- дэ хъугъэ нэжъ-Iужъхэм IэпыIэгъу афэмыхъужьыным егупшысэрэп.

— Сыд фэдэ лъэIу яIэми, ар зэрафэсшIэщтым сегупшысэ, — къытфеIуатэ тигущыIэгъу. — Сыгу афэгъу, IэпыIэгъу сафэхъуным, ящыIэныгъэ нахь псынкIэ афэсшIыным, агу къызэрэдэсщэещтым сыдигъуи сыпылъ. ЗгъэгушIохэу, IэпыIэгъу зязгъэгъотыкIэ гухахъо хэсэгъуатэ. Сызэрафыщытыр ежь- хэм къагурэIо ыкIи къысфэдэгъух. АщкIэ ахэм лъэшэу сафэраз. УиIофшIэн уасэ къыфашIэу уалъытэным нахь лъапIэ щымыIэу къысшIошIы.

Нэжъ-Iужъхэм агу къызэбгъэкIуныр IэшIэхэп. Ау Нэфсэт ар къыздигъэхъун ылъэкIыгъ. Илъэс тIокIырэ тфырэм къыкIоцI Iоф зэришIэрэм ымыгъэразэу зыкъыфэзыгъэзагъэ къахэкIыгъэп. Ащ мэхьанэшхо иIэу сэлъытэ.

Гъонэжьыкъо Сэтэнай.