Республикэм и Лъэпкъ музей шIэныгъэмкIэ иIофышIэ шъхьаIэу, зэлъашIэрэ археологэу Тэу Аслъан Конституцием изэхъокIыныгъэхэм къатегущыIагъ.

— Конституцием зэхъокIыныгъэхэр зэрэфашIыхэрэм десэгъаштэ, — къытиIуагъ Адыгэ Республикэм культурэмкIэ изаслуженнэ IофышIэу Тэу Аслъан.

— Тарихъым ехьылIэгъэ зэхъокIыныгъэхэр гъэзетеджэхэм къыхагъэщых.

— Лъэпкъхэм гъашIэу къакIугъэр ары тарихъыр. Зытетым тетэу тарихъым утегущыIэн, птхын фае. КIатхыкIыжьыныр зыкIи къезгъэкIурэп, ащ фэдэ фитыныгъэ япты зэрэмыхъущтыр Конституцием харэтх.

— Шъыпкъэр цIыфхэм зэрагъашIэ ашIоигъу.

— Зыгорэхэм агу римыхьырэр къыхагъэщызэ, тарихъыр тэрэзэу къэзымытхыхэрэр бэ мэхъушъ, хэбзэ шапхъэкIэ тапэуцун тлъэкIын фае.

— Республикэ общественнэ движениеу «Адыгэ Хасэм» игъэцэкIэкIо куп ухэт.

— Тилъэпкъэгъухэу IэкIыб къэрал къикIыжьыхэрэм IэпыIэгъу ятыгъэным сыфэгъэзагъ. КъэкIожьыхэрэр дахэу мэпсэух, хэгъэгум хабзэу илъыр агъэцакIэ. Янэжъ-ятэжъхэр зыщыпсэущтыгъэхэ чIыгум зыкъыфэзыгъэзэжьхэрэм апэрэ уахътэм тишIуагъэу ядгъэкIын тлъэкIыщтым нахь зэIухыгъэу тытегущыIэ зыхъукIэ, яIофхэр лъыкIотэщтых.

— Щысэ къэпхьыгъэмэ дэгъугъэ.

— Адыгабзэр зэкIэми ашIэу ятарихъ чIыгу къагъэзэжьын алъэкIыщтэп. Ащ хэкIыпIэ къыфэтымыгъоты хъущтэп. Хэкужъым къэзыгъэзэжьырэ тилъэпкъэгъухэм ящыкIэгъэ тхылъхэр агъэхьазырынхэм фэшI Iофым хэкIыпIэу къыфагъотыщтыр нахь гъэкIэкIыгъэу зэхэпщэн плъэкIыщт. Арышъ, гу зышIыгъэу итарихъ чIыгу къэзыгъэзэжьырэм игумэкI-гупшысэхэр къыдэлъытагъэу хэбзэ шапхъэхэр штэгъэнхэ фае. Конституцием цIыфым ифитыныгъэхэр къэухъумэгъэнхэмкIэ зэхъокIыныгъэу фашIыхэрэр щыIэныгъэм нахьышIоу щыдгъэфедэнхэ тлъэкIэу тыпсэу сшIоигъу.

— УигухэлъышIухэр къыбдэхъунхэу пфэтэIо.

— Тхьауегъэпсэу.

ЕмтIылъ Нурбый.