Урысыем имызакъоу дунаим щызэлъашIэрэ тхэкIо цIэрыIоу Александр Пушкиныр мэкъуогъум и 6-м, 1799-рэ илъэсым къэхъугъ. Ащ итхыгъэхэр, ипоэзие жъы хъухэрэп, непи ар цIыфхэм ашIогъэшIэгъон. Ащ ипроизведениехэр бзэ зэфэшъхьафхэмкIэ зэрадзэкIыжьыгъэх. А. Пушкиныр зыгъэлъапIэхэрэм, ащ осэшхо фэзышIыхэрэм ащыщэу ГъукIэлI Нурбый поэтым фэгъэхьыгъэу ытхыгъэхэм  нэIуасэ шъуафэтэшIы. Шъузэбэ ныбжьыкI ШIу сэ слъэгъоу, Лидэ дахэр! Чэщэу кIорэм уигъэпшъыгъэу Сыд пай чъыем ухихьагъэу, Шъабэу загъорэ ущэIура? Сыд пай гукIэ узфэягъэм Зи гушIуагъо хэмылъагъоу, НитIур чъыIэу, мыущакоу Укъысэплъыра ущтагъэу? Сэ шIулъэгъоу сызыхэтым Сыщыуагъэу къысщегъэхъу, Джарэу щытзэ гу лъысэтэ Нэпсыр шъэфэу о ебгъэхэу. ЗэкIэнагъэу есхьыжьагъэм Уинэплъэгъу о IэкIэмызэу Упымылъэу сэ къэсIуагъэм СIапэ чъыIэу къэофызы. О сигупсэу, Лида, дахэу! Гъыным нэшъу уехъулIэщт. ЩымыIэжьым удэмыхэу Уфэшъыпкъэу упсэущта? КъыосэIо къэущыжьрэп Бэным дэлъым къыгъэзэжьрэп. Зэхихыщтэп уигъымакъи Угу ишъэфы иджэмакъи... Алъэгъужьрэп ащ къэгъагъи, Санэу щытым иIэшIугъи, УитхьэлъэIуи уишъыпкъагъи Гум ишъэфэу къэбгъэнагъи... УишIулъэгъу гъунэ имыIэу Бэрэ бгъэгум щыбгъэшIуагъ. УныбжьыкIэу кIасэу уиIэр Пасэу гъашIэм хэкIыжьыгъ. Хэчъыягъ ар насыпышIоу Зи о пыи къыпфимышIэу. Цахь ымышIэу уиуплъэкIоу КъыхэкIынэп дунай шIункIым. Шыблэм фэдэу къыкъоущтэп, Мафи чэщи къыошэщтэп. Иныбжьыкъуи къытэхъуапсэу, Къытхэхьащтэп тигъэмысэу.    Къэгъагъ Мэ пимыхэу къэгъагъ гъугъэ, Тхылъым дэлъэу зэгосхыгъэ; СшIэ сшIоигъоу ар зышIагъэр Джы гупшысэм сыщэлъыхъо:   Сыды гъатха къызщыкIыгъэр? Хэты ыIэ къыпичыгъа? Игухэлъ ащ сыд фэдагъа? Хэта тхылъым дэзылъхьагъэр?   Ар шIулъэгъум итамыгъа, Е чIэнагъэм къыхэкIыгъа, Хьауи зэщэу гъогу техьагъэу Мэзым, шъофым къырихыгъа?   Джы ахэр щыIэхэу огугъуа? Зэдэпсэухэу непэ пщэхъуа? Хьауи тIури гъонлэжьыгъэу, Мы къэгъагъэм фэдэ хъугъа?   Тверской бульвар ГъэпсэфыпIэм дэт тIысыпIэм, Щылэ мазэр къыздытес. Бгыпэм уехмэ зэхэхьапIэм, ЦIыфхэр Iасэу щызэхэс. Джэрз гъэчъыгъэ хэшIыкIыгъэу, ПаIор кIыбымкIэ щэигъэу, ЗиIэтыгъэу мыжъо лъагэм Мэгупшысэшъ тхакIор тет.   Лъэдэкъапэм къэсы абэр, Зэтедзагъэу Iужъу кIакор. Зыритыгъэу лъапэм тет, Инэплъэгъу гупшысэм хэт. Къэлэмыпэр хьацыкуалъэу, Жьыбгъэ чъыIэм щэчэрэгъу. Шъуатэм ибжъэ ыIэтыгъэу, Къысфэчэфэу огур къэплъэ.   Сыкъыоплъы, сыгу къыокIы, Осым шъхьапцIэу укъыхэкIы. ГъэпсэфыпIэр непэ нэкIы, Ос фыртынэр мыжъом епкIы. О дунаир пшысэ пшIыгъэу, Укъыхэплъы шъхьэр Iэтыгъэу. Сэ кIэлэгъур сыгу къэкIыжьы, Хым иныжъхэр къыхэкIыжьы.   Щыт чъыгаеу къэбгъэкIыгъэр, Дышъэ пшъэхъоу ещэкIыгъэр. Псыхъо гуащэр къыхэкIыгъэу, Дышъэ мажьэм ышъхьэ режьы. Чэтыужъыр пшысэм хэтэу ДэкIоежьы пшъэхъум тетэу. ГъэшIэгъонхэр мэзым щэхъух, Пшысэм Iэлхэр щэIэсэжьых.   КIымы-сымыр зэпигъаоу, Шхончыр чыжьэу къыщыуагъ. ТхакIом ышъхьэ ефэхыгъэу, Псыхъо ныбэм къыдэфагъ. ЛIыгъэ напэм лъыр къыпэчъы, Осы фыжьыр плъыжьэу мэчъы. Аужырэу джы мэтхэжьы, ГъашIэм лъыкIэ къыкIэтхэжьы.   ШъхьарыкIыгъ усакIом гъозыр, Шъхьарытыгъ IэзакIом гугъэр. Огур шIункIэу къефэхыгъ, Дунай хьафыр ыухыгъ. Iэпызыгъ ишхонч усакIом, ЗэпикIыгъ къэлэмыр шъхьакIом. ПцашIом бгъэгур пхырижъыгъ, Ипщыналъэ зэпитхъыгъ.   Дышъэ пшъэхъоу зэпызыгъэм, Тет чэтыур щыгъощагъэу. Огу зэлъагъэу пщэсы хъугъэм, Къыхэнагъ нэфылъыр бжьыгъэу. Дышъэ паIор шъхьащыгуагъэу, Тет иныжъыр бгым къэкIуагъэу. Iэнлъэ чагъэм къыIунагъэу, Мэгъы ныор кIэгъожьыгъэу.   Джэрз гъэчъыгъэр улъыигъэу, ШхъуантIэу Iэпсыр къечъэхыгъ, Пшъэхъур гъашIэм зэпитхъыгъэу, Мыжъо сыныр ыхъокIыгъ. ЦIыф Iэлыгъэу бгъэлъэпIагъэр Мэгупшысэшъ къыпкIэрыт. УкъедэIушъ усэу стхыгъэм Пшъхьэ уфагъэу пчэгум уит. ............................................ ГъашIэу тиIэр осым фэд, Ар зытIкIужькIэ тызэфэд. Щэр мыохъоу къытефагъ, Дышъэ кIэнэу къытфэнагъ. Ау щагъашIоу щаIэтыгъэу Хэти фаеп мыжъо лъапIэ. Рахъожьынэп а лъэгапIэм, Осыр тизэу ситIысыпIэ.