Урысые политическэ партиеу «Единая Россия» зыфиIорэм хэбзэгъэуцун Iофэу ышIэрэми, социальнэ проект зэфэшъхьафэу кIэщакIо зыфэхъухэрэми ныгъом ыкIи кIэлэцIыкIугъом IэпыIэгъу ятыгъэным чIыпIэ ин ащырагъэубыты.

— КIэлэцIыкIухэм хэхъоныгъэхэр ашIынхэм, лъыкIотэнхэм апае амалышIоу непэ яттырэм бэкIэ епхыгъ къэралыгъом инеущырэ мафэ зыфэдэщтыр. Ащ фэшI «Единэ Россием» мы лъэныкъом лъэшэу ынаIэ тырегъэты. Мы уахътэм Iофыгъоу къэхъугъэр зэшIохыгъэным имызакъоу, неущырэ мафэри къыдэплъытэзэ лъэныкъо пстэумкIи укъызэдекIолIэн фаеу щыт, — къыIуагъ партием и Генсовет и Секретарэу Андрей Турчак.

КIэлэцIыкIухэм апае къэралыгъо IэпыIэгъу зэфэшъхьафэу щыIэхэм ежь иIахьэу ахилъхьащтхэм афэгъэхьыгъэ проектхэми «Единэ Россиер» кIэщакIо афэхъу. ГущыIэм пае, УФ-м просвещениемкIэ и Министерствэрэ стратегическэ инициативэхэмкIэ Агентствэмрэ ягъусэу «Помоги учиться дома» зыфиIорэ Iофтхьабзэр зэхащагъ. Ащ къыдыхэлъытагъэу, унагъоу зигъот макIэхэм арыс кIэлэцIыкIухэр пэIудзыгъэ шIыкIэм тетэу еджэнхэ алъэкIыным фэшI компьютерхэмрэ планшетхэмрэ афащэфыгъэх. Зы мазэм къыкIоцI ащ фэдэ техникэ 250-рэ субъектхэм афатIупщыгъ. Я 9 — 11-рэ классхэм арыс кIэлэеджакIоу ушэтынхэр зыпэ илъхэр ары нахьыбэу зыIэкIагъэхьагъэхэр.

Ащ нэмыкIэуи джыри зы проект партием рищэжьагъ. Коронавирусым ыпкъ къикIыкIэ мыгъэ кIэлэцIыкIухэм лагерхэр къафызэIуахынхэ амал щыIэп. Ащ фэшI онлайн шIыкIэм тетэу ахэр афызэхащагъэх. Мэкъуогъум и 1-м къыщыублагъэу мы онлайн Iофтхьабзэр макIо.

Зэрэдунаеу зэлъызыкIугъэ зэпахырэ узыр Урысыем къихьагъэу, ащ зимыушъомбгъуным фэшI къэралыгъор режим гъэнэфагъэм зытехьэм, кIэлэцIыкIу зэрыс унагъохэм IэпыIэгъу зэфэшъхьафхэр ятыгъэнхэм УФ-м и Президентэу Владимир Путиныр кIэщакIо фэхъугъ. Ахэр охътабэ темышIэу гъэцэкIэгъэнхэмкIэ ищыкIэгъэ хэбзэгъэуцугъэхэм япхырыщын «Единэ Россиемрэ» Правительствэмрэ Iоф зэдашIагъ.

Джащ фэдэу кIэлэцIыкIу къызфэхъугъэкIэ ны-тыхэу ащ зэрэлъыплъэхэрэм ыпкъ къикIэу IофшIапIэм мыкIохэрэм пособие анахь макIэу къаратырэм фэдиз джыри хэгъэхъогъэным мы партиер кIэщакIо фэхъуи, Къэралыгъо Думэм къыщыдырагъэштагъ.

Коронавирусым ыпкъ къикIыкIэ чIыпIэ къин ифэгъэ унагъохэм афагъэнэфэгъэ IэпыIэгъухэм ащыщ кIэлэцIыкIоу илъэси 3-м зыныбжь ехъугъэу, 16-м шъхьарымыкIыгъэхэм сомэ мин пшIырыпшIэу зэтыгъоу аратыгъэр. Мы ахъщэ IэпыIэгъур унагъом зыфакIокIэ, ащ чIыфэу телъым пэIухьанэу амыубытыжьыным фэшI ащ фытегъэпсыхьэгъэ шапхъэхэр «Единэ Россием ыгъэнафэхи, УФ-м и Къэралыгъо Думэ щаштагъэх.

— Ар кIэлэцIыкIу миллион 22-мэ анэсыгъ, унагъохэм нахьыжъэу арысхэр къыхэплъытэжьхэмэ, миллион 50-ми ехъущт. Ахэм къэралыгъом IэпыIэгъоу аритыгъэр чIыфэм пэIухьажьыныр тэрэзэп, — къыкIигъэтхъыгъ Андрей Турчак.

УФ-м и Президентэу Владимир Путиныр пэублэ классхэм арыс кIэлэеджакIохэм зэкIэми шхын стыр аIэкIэгъэхьэгъэным кIэщакIо фэхъугъэу мы илъэсым имэзэе мазэ къышIыгъэ Джэпсалъэм къыщыхигъэщыгъагъ. Мыщ фэгъэхьыгъэ законым партием дыригъэштагъ. Общественнэ транспортым ыпкIэ ытынэу зимыIэ е зымыIыгъ кIэлэцIыкIур водителым къыригъэкIын фимытэу шIыгъэным фэгъэхьыгъэ закоными партием исатырэ хэтхэм амакъэхэр фатыгъэх.

«Единэ Россием» ишIушIэкIэ кIэлэцIыкIоу нэбгырэ макIэхэм къяолIэрэ уз хьылъэ (орфанное заболевание) зиIэхэм ящыкIэгъэ Iэзэгъу уцхэр нахь къызIэкIэгъэхьэгъошIу хъугъэх. Ахэр IэкIыбым къызэрэращыщтхэм охътабэ темышIэным, нахь къызэрыкIо хъуным апае федеральнэ спискэм хэгъэуцогъэнхэу партием къыдихыгъ.

КIэлэцIыкIоу ибэу къэнагъэхэр бакалавриат ыкIи специалитет программэхэмкIэ апшъэрэ еджапIэм чIэхьанхэ хъумэ фэгъэкIотэнхэр яIэнхэм фэгъэхьыгъэ хэбзэгъэуцугъэр 2014-рэ илъэсым къыщыублагъ зыщыIэр, ау ащ 2021-рэ илъэсым нэс кIуачIэ иIэнэу къызэрэщыдэлъытагъэр. ЗаконопроектыкIэу «Единэ Россием» УФ-м и Къэралыгъо Думэ хилъхьагъэм фэгъэкIотэнхэм пIэлъэ гъэнэфагъэ ямыIэнэу къыщеIо.

Илъэс къэс «Собери ребенка в школу» зыфиIорэ Iофтхьабзэр партием субъектхэм ащызэхещэ. БлэкIыгъэ илъэсым изакъоу сабыибэ зэрыс, зигъот макIэу е щыIэныгъэм чIыпIэ къин ригъэуцогъэ унэгъо мини 160-мэ якIэлэцIыкIухэр еджапIэм чIагъэхьажьынхэмкIэ IэпыIэгъу афэхъугъэх.

Илъэс заулэ хъугъэу партием ипроектхэу «Детский спорт», «Строительство ФОКов» зыфиIохэрэр субъект зэфэшъхьафхэм ащыпхыращых. Ахэм къащыдэлъытагъэу 2019-рэ илъэсым изакъоу спортзал 745-рэ агъэцэкIэжьыгъ, площадкэ 407-рэ ящыкIэгъэ псэуалъэхэмкIэ зэтырагъэпсыхьагъэх, еджэпIэ 628-мэ спортклубхэр къащызэIуахыгъэх. А зэпстэумэ федеральнэ бюджетым къыхэхыгъэу сомэ миллиардрэ ныкъорэ фэдиз апэIухьагъ.

— КIэлэцIыкIоу илъэси 3-м къыщыублагъэу 7-м нэсэу зыныбжьхэм афэкIощт ахъщэ тыным епхыгъэ Iофхэр апэ зэшIозыхыгъэ субъектхэм республикэр ащыщ, — къыIуагъ партием ипроектэу «Крепкая семья» зыфиIорэм АдыгеимкIэ икоординаторэу, АР-м и Къэралыгъо Совет — Хасэм идепутатэу Евгения Дьячко-вам. — Джыри гъэтхэпэ мазэм мыщ ищыкIэгъэ хэбзэгъэуцу-гъэр аштагъ. ЗэкIэ унагъоу зытефэхэрэм IэпыIэгъур игъом аIэкIэхьаным «Единэ Россием» ифракцие хэтхэр лъэшэу лъэплъэх. Унагъохэм ащыщхэм ахъщэ тыныр къазэратефэрэр къэзыушыхьатырэ тхылъыр нахьыпэкIэ агъэхьазырыгъагъ, ау аужырэ мэзитIум къыхиубытэу япIалъэ икIыгъэу, Iоф хэфагъэх. Ахэм партием хэт депутатхэр онлайн шIыкIэм тетэу IэпыIэгъу афэхъугъэх. «Детский спорт» зыфиIорэ проектыр республикэм зыщыпхыращырэ илъэс заулэм къоджэ псэупIэхэм яеджапIэхэм ащыщыбэхэм спортзалхэр ащагъэцэкIэжьыгъэх. Непи а IофшIэныр лъагъэкIуатэ. Коронавирусым тызтыригъэхьэгъэ режимыр тыухымэ, «Строительство ФОКов» зыфиIорэ проектым къыдыхэлъытагъэу ашIыгъэ псэуалъэхэр къызэIуахыжьынхэшъ, нахьыпэрэм фэдэу кIэлэеджакIохэр рагъэблэгъэщтых. Ахэр а уахътэм лъэшэу ежэх.

Зэпахырэ узэу дунаир зэлъызыкIугъэм цIыфхэм IэпыIэгъу ятыгъэным АР-м и ЛIышъхьэу, партиеу «Единая Россия» зыфиIорэм ишъолъыр къутамэ и Секретарэу КъумпIыл Мурат кIэщакIо фэхъугъэу унагъоу зигъот макIэхэм, щыIэныгъэм чIыпIэ къин ригъэуцуагъэхэм, нэжъ-Iужъхэм апае гъомылапхъэхэр мызэу-мытIоу агощыгъэх. Джырэблагъэ мары Iалъмэкъ мин 20-м ехъу агъэхьазыри республикэм щатыгъ.

Хъут Нэфсэт.